სამზარეულოს გამწოვი
სამზარეულოს გამწოვი არ არის ინტერიერის ის დეტალი, რომელიც სტილს ქმნის. ამ ხელსაწყოს წმინდა პრაქტიკული დანიშნულება აქვს: წმენდს ჰაერს ნამწვისგან, კვამლისა და ჭვარტლისგან და სუნებს მთელ ბინაში გავრცელების საშუალებას არ აძლევს. ალბათ დამეთანხმებით - ძალიან არასასიამოვნოა, როცა საღამოს საძინებელში შესულს იმ თევზის სუნი დაგხვდებათ, რომელიც ვახშმად მიირთვით.
გაფილტვრა და განდევნა გამწოვი ხელსაწყოები ორი ტიპისაა:
- გამწოვი ვენტილაცია: ის განდევნის კვამლსა და ჭვარტლს და მოგაშორებთ უსიამოვნო სუნს. ასეთი გამწოვი უკეთ ასუფთავებს ჰაერს, მაგრამ მისი დაყენება ყველგან არ არის შესაძლებელი. ის შეიძლება გამოვიყენოთ იმ სახლებში, სადაც კარგად მუშაობს ჰაერის გამწმენდი.
- ჰაერის გამწმენდი: ეს გაცილებით მარტივი სისტემაა. ის განდევნის ჰაერს ფილტრის საშუალებით, იცავს ბინას კვამლისგან, მაგრამ თითქმის ვერ აკავებს სუნს. თუმცა არსებობს გამწოვის ისეთი მოდელებიც, რომლებსაც ორივე ფუნქციის შესრულება შეუძლია.
გამწოვის ხმარება რთული არ არის: ჩართე-გამორთე. დროდადრო ის უნდა გარეცხოთ და ფილტრი გამოუცვალოთ. აგრეგატები აღჭურვილია ცხიმოვანი ფილტრით - ის აკავებს კვამლს. უფრო ძვირად ღირებულ მოდელებს აქვს უფრო ნატიფი გამწმენდები - ნახშირისა, რომლებიც განდევნიან სუნს. ცხიმოვანი ფილტრის გამოცვლა საჭირო არ არის, ის ირეცხება ხელითაც და ჭურჭლის სარეცხი მანქანითაც. ნახშირის ფილტრი მოგემსახურებათ 4-6 თვიდან 2 წლამდე, შემდეგ კი ახლის შეძენა მოგიწევთ.
გამწოვისთვის მნიშვნელოვანი პარამეტრია ხმაური. სპეციალისტთა აზრით, მისი დონე არ უნდა აღემატებოდეს 50 დეციბელს. ეს ინფორმაცია აუცილებლად უნდა მოიძიოთ ტექნიკურ პასპორტში ან დააზუსტოთ მაღაზიაში, კონსულტანტთან. არსებობს როგორც იაფფასიანი, ასევე ძვირად ღირებული დანადგარები.
ძვირფას მოდელს მოხდენილ დიზაინთან ერთად მრავალი ფუნქციაც აქვს, მაგრამ ყველა გჭირდებათ თუ არა, თავად უნდა გადაწყვიტოთ, ამიტომ მოდელი უნდა შეარჩიოთ თქვენი შესაძლებლობებისა და მოთხოვნილებების გათვალისწინებით. ხარისხიან გამწოვს სუნებისა და დაბინძურებული ჰაერის 96%-ის განდევნა შეუძლია, თანაც საკმაოდ ოპერატიულად - 6-8 წუთის განმავლობაში.
გამოყენების ინსტრუქცია
- გაზქურაზე რაიმე მიგეწვათ, სამზარეულო ნამწვით აივსო? ნუ იჩქარებთ ყველა კარისა და ფანჯრის დახურვას და მთელი სიმძლავრით გამწოვის ჩართვას! სუფთა ჰაერის ნაკადის გარეშე ვენტილატორის ძრავს თავისი მოვალეობის შესრულება გაუჭირდება და უფრო და უფრო უარესად იმუშავებს, ამიტომ გააღეთ სამზარეულოს ან მისი მოსაზღვრე ოთახის ფანჯრები.
- სანამ გამწმენდის რეცხვას შეუდგებოდეთ, ის ელექტროქსელიდან უნდა გათიშოთ. გამწოვის კორპუსის ყველა დეტალი უნდა გაიწმინდოს, ოღონდ ნუ გახეხავთ, თორემ შესაძლოა, ზედაპირი დააზიანოთ. დაალბეთ ცხიმოვანი ნადები სველი ხელსაწმენდით, რომელზეც ცხიმის საწინააღმდეგო სპეციალური საშუალება ესმება.
სასარგებლო ფუნქციები
ნარჩენის გასასვლელი ვენტილატორში - ეს ფუნქცია საშუალებას აძლევს გამწოვს, გამორთვის შემდეგ დაბალი სიმძლავრით კიდევ 5-15 წუთი განაგრძოს მუშაობა. კერძის მომზადებას რომ დაასრულებთ, შეგიძლიათ გამორთოთ ქურა, გამწოვი და გახვიდეთ სამზარეულოდან. ჭკვიანი ხელსაწყო გაწმენდს ჰაერს და თვითონვე გაითიშება.
ინტერვალური ჩართვა
როგორც წესი, ამ ფუნქციას ფლობენ ძვირად ღირებული მოდელები. საათში ერთხელ ვენტილაცია ავტომატურად ირთვება და დაბალი სიმძლავრით მუშაობს. ეს იმას ნიშნავს, რომ ბინა მუდმივად არის უზრუნველყოფილი სუფთა ჰაერის ნაკადით.
ავტომატური ჩართვა მაჩვენებლით
გამწოვის სრულყოფილი მოდელები, რომლებსაც მართავს ელექტრონიკა, თვითონვე ირთვება და ითიშება. როცა საჭიროა ჰაერის გაწმენდა, ტემპერატურისა და ტენიანობის მაჩვენებლები დანადგარს მუშაობის დაწყების ბრძანებას აძლევენ, ხოლო როცა მაჩვენებლები ნორმის ფარგლებს უბრუნდება, აჩერებენ.
სუფთა ჰაერის რეცეპტი
ფსიქოლოგებს მიაჩნიათ, რომ უსიამოვნო სუნი ადამიანს აღიზიანებს, იწვევს თავის ტკივილს და დეპრესიასაც კი. იმაზე, თუ როგორ მუშაობს ჰაერის გამწმენდი, ბევრად არის დამოკიდებული ჩვენი განწყობილება. სამზარეულოში მუდამ სუფთა ჰაერი რომ იყოს, საჭიროა, გამწოვი მუდამ კრიალებდეს.
რეცხვა-წმენდის წესები
- არ დაივიწყოთ, რომ გამწოვი ელექტრომოწყობილობაა და თავდაპირველად ელექტროქსელიდან უნდა გაითიშოს.
- ამის შემდეგ უნდა განისაზღვროს, რომელი ფილტრი აქვს გამწოვს. ლითონისა (უმეტესად - ალუმინისა, იშვიათად - თუჯისა) რეგულარულ წმენდას მოითხოვს. გაწმენდის დრო რომ მოუვა, ამას სპეციალური ინდიკატორი მიგანიშნებთ. ნახშირისა და აკრილის ფილტრი კი არ იწმინდება - მას ცვლიან.
- გამწოვის კორპუსსაც სჭირდება რეგულარული გასუფთავება - მტვრისგან, ცხიმისგან, ჭვარტლისგან... რისგანაც უნდა იყოს ის დამზადებული: ალუმინისგან, უჟანგავი ლითონისა თუ მინისგან, დაფარული იყოს მინანქრით - არასოდეს გამოიყენოთ უხეში ღრუბელი ან სახეხი: ის გლუვ ზედაპირს დაკაწრავს.
- ღილაკები - ეს ის ადგილებია, სადაც ნადები ინტენსიურად გროვდება და ყველაზე ძნელი მოსაცილებელია. ისინი განსაკუთრებული სიფრთხილით უნდა გაიწმინდოს. არ შეიძლება მათში წყლის მოხვედრა!
როცა ბრწყინავს სამზარეულო - ბრწყინავს დიასახლისიც, ამისთვის კი დღეს უამრავი დამხმარე საშუალება არსებობს.