თინათინ გოცაძე

პედანტიზმი, პედანტურობა, ერთი მხრივ, გულისხმობს წესების მკაცრად დაცვას, ყველა წვრილმანის გათვალისწინებას თუნდაც საქმის არსის უგულებე-ლყოფით, მეორე მხრივ კი დიდ პასუხისმგებლობას, კეთილსინდისიერებასა და ვალდებულებათა მკაცრად შესრულებას. პედანტები სიმართლისა და სიზუსტის სიყვარულით გამოირჩევიან. მოცემული ტესტი გამოგადგებათ როგორც თვითდიაგნოსტიკისათვის, ასევე საპასუხისმგებლო თანამდებობაზე შესაფერისი პირის მისაღებად.

ყურადღებით წაიკითხეთ შეკითხვები. თითოეულ კითხვას უპასუხეთ "კი" ან "არა". თუ ამ ორი ვარიანტიდან რომელიმეს შერჩევა გაგიჭირდათ, წარმოიდგინეთ თქვენი ცხოვრების ბოლო კვირა, შეაფასეთ ის, გააანალიზეთ ამ ხნის განმავლობაში მომხდარი მოვლენები და პასუხის გაცემაც გაგიადვილდებათ. ისიც გაითვალისწინეთ, რომ პასუხზე დიდხანს ფიქრი არ ღირს. როგორც წესი, პასუხი, რომელიც პირველად ამოტივტივდება ხოლმე გონებაში, ჭეშმარიტია.

კითხვარი

1) ცდილობთ თუ არა, საფულეში ქაღალდის კუპიურები მუდამ წესრიგში გქონდეთ? გაქვთ თუ არა ისინი დახარისხებული გარკვეული პრინციპით?

2) სიამოვნებით ჰკიდებთ თუ არა ხელს საპასუხისმგებლო საქმიანობას?

3) მიგაჩნიათ თუ არა, რომ სხვები ერთმანეთისადმი ნაკლებად მომთხოვნები არიან?

4) ძალიან გაღიზიანებთ ცუდად გასწორებული გადასაფარებელი ან უწესრიგოდ მიყრილი ფეხსაცმელები? გიჩნდებათ მათი დაუყოვნებლივ მოწესრიგების სურვილი?

5) ასრულებთ თუ არა შავ და საკირკიტო სამუშაოს ისევე გულმოდგინედ და საფუძვლიანად, როგორც საყვარელ საქმეს?

6) გიჭირთ თუ არა ჩაძინება მთელი დღის განმავლობაში ამა თუ იმ პრობლემაზე ფიქრის შემდეგ?

7) ადევნებთ თუ არა თვალყურს, რომ სახლში ყველა ნივთი თავის ადგილზე იდოს?

8) წამოხვალთ თუ არა სამსახურიდან სამუშაო დღის დასრულების შემდეგ, თუ საქმე ვერ დაასრულეთ?

9) ამოწმებთ თუ არა შინიდან გასვლისას ან დაწოლის წინ, დაკეტილია თუ არა კარი, ონკანები, გამორთულია თუ არა შუქი და ა.შ.?

10) ჩაის ან ყავის დასხმისას ფინჯანს ბოლომდე ავსებთ?

11) გიჩნდებათ თუ არა სურვილი, ხმამაღლა გამოლანძღოთ ვიღაც საზოგადოებრივი თავშეყრის ადგილას, შეიტანოთ ესა თუ ის შესწორება უკვე დანერგილ ვითარებაში?

12) მართალია, რომ არ გიყვართ სამოქმედო გეგმის შედგენა, რომ მუდამ დარწმუნებული ხართ - არაფერი გამოგრჩებათ, არაფერი დაგავიწყდებათ?

13) გიჩნდებათ თუ არა სურვილი, ჩამოაშოროთ რომელიმე საქმეს ესა თუ ის პიროვნება და თავად შეუდგეთ მის შესრულებას, რადგან სათანადო შედეგის მიღწევა მხოლოდ ამ გზით არის შესაძლებელი?

14) მართალია, რომ ხანგრძლივი და საკირკიტო საქმიანობა ზოგჯერ თავდავიწყებაში, უსიამოვნო ფიქრებისგან თავის დაღწევაში გეხმარებათ?

შედეგების შეჯამება

თითო ქულა დაიწერეთ № 1, 2, 3, 4, 5, 6, 7, 9, 10, 11, 13, 14 შეკითხვებზე "კი" პასუხისა და № 8, 12 შეკითხვებზე "არა" პასუხის გაცემის შემთხვევაში.

შეაჯამეთ ქულები და გაეცანით შეფასებას

0-4 ქულა - პედანტიზმის დაბალი დონე. თქვენ არ გიყვართ მოქმედების სტანდარტული ფორმების დაცვა. თქვენთვის მთავარია საქმის შესრულება სწრაფად და ნაკლები დანახარჯით და არა სიზუსტითა და ყველა დეტალის გათვალისწინებით. წვრილმანები თქვენთვის ნაკლებმნიშვნელოვანია, ხშირად გაღიზიანებთ კიდეც. როდესაც ამა თუ იმ პრობლემის გადაწყვეტას აჭიანურებთ, ამას განწყობის უქონლობითა და შეუფერებელი დროით ხსნით. ეცადეთ, მეტი დრო დაუთმოთ სამუშაოს ხარისხს. ყურადღება წვრილმანებსაც მიაქციეთ.

5-9 ქულა - პედანტიზმის საშუალო დონე. ყურადღებას აქცევთ როგორც პროცესს, ასევე შედეგს. არ ერთობით წვრილმანებით, თუმცა არც ზეცაში დაფრინავთ.

10-14 ქულა - პედანტიზმის მაღალი დონე. თქვენ გიყვართ წესების მკაცრად დაცვა, წვრილმანებსაც სათანადო ყურადღებას აქცევთ. გამოირჩევით პასუხისმგებლობით, კეთილსინდისიერებითა და ვალდებულებებისადმი ერთგულებით. საქმის პირნათლად შესრულება, სიმკაცრე, სიზუსტე თქვენი დამახასიათებელი თვისებებია. ყურადღებით დააკვირდით საკუთარ თავს, იქნებ ზოგჯერ ისე წვრილმანდებით, რომ ხეების უკან ტყეს ვეღარ ამჩნევთ? სამუშაოს ხარისხს, რა თქმა უნდა, დიდი მნიშვნელობა აქვს, მაგრამ მეტისმეტად დიდი ძალისხმევის გაღება ხომ არ გიწევთ ამისთვის? იქნებ შეძლოთ ეფექტურობის გაზრდა ნაკლები დანახარჯით?