როგორ ვიცხოვროთ ძუნწ ქმართან ერთად
როდესაც ქალი და მამაკაცი ერთმანეთისადმი სიმპათიით განეწყობიან და დაახლოებას იწყებენ, ისინი არც კი ფიქრობენ ისეთ პრობლემებზე, როგორიც არის ფულადი სახსრების განაწილება, და, რასაკვირველია, აზრადაც არ მოუვათ, რომ ეს პრობლემა ოდესმე შეიძლება მათაც შეეხოთ, ხოლო როდესაც დაქორწინების დრო მოვა, აღმოჩნდება ხოლმე, რომ ახალგაზრდები საერთოდ არ არიან მზად ამ საკითხის რეგულირებისთვის. სწორედ ამის შედეგია შოკი, რომელშიც ვარდება მამაკაცი, რომლის ცოლმა ძვირფას აქსესუარს თითქმის მთელი დანაზოგი მიახარჯა ან ქალი, როდესაც შეიტყობს, რომ ქმარმა სარეცხი მანქანის შესაძენი თანხა რესტორანში დახარჯა ან ტოტალიზატორში წააგო. რომ არ ინერვიულოთ და არც ერთმანეთს მოუშხამოთ გუნება, ეცადეთ, ყოველი შენაძენი ერთად დაგეგმოთ და ერთმანეთთან შეათანხმოთ. თანდათან ისწავლით ისეთი გადაწყვეტილების მიღებას, რომელიც ორივესთვის მისაღები იქნება, ეს კი უფრო მეტად გაამყარებს თქვენს კავშირს. ადვილი შესაძლებელია, ფინანსურ საკითხებთან დაკავშირებით მეუღლეებს შორის ყოველთვის არ იყოს ერთსულოვნება, მაგრამ მათ პატივი უნდა სცენ ერთმანეთის პოზიციას და ერთმანეთს ფლანგველობა ან სიძუნწე არ დააბრალონ. ჭკვიანი ქალი მიხვდება, რომ მამაკაცთან ყოველთვის შეიძლება მოლაპარაკება და საყიდლებს ნაადრევად დაგეგმავს, რათა მამაკაცი შეაჩვიოს იმ აზრს, რომ ფულის დახარჯვა მოუწევს. მაგალითად, განსაზღვრულ დღეს, ხელფასის აღების შემდეგ, შეგიძლიათ ერთად განიხილოთ, პირველ რიგში რისთვის უნდა გადადოთ ფული (აუცილებელი ხარჯია კომუნალური გადასახადები, სურსათი), ხელფასის მეორე ნაწილიდან გარკვეული თანხა შეიძლება გადაინახოთ იმ შენაძენისთვის, რომლის თაობაზეც უკვე შეთანხმდით (მაგალითად, სარეცხი მანქანისთვის, ავტომობილისთვის, ტელევიზორისთვის), ხოლო თუ რამე დარჩა, შეგიძლიათ, თქვენი შეხედულებისამებრ დახარჯოთ. მაგალითად, მამაკაცს შეუძლია სათევზაო აღჭურვილობა შეიძინოს, ხოლო ქალს - პარფიუმერია. შედეგად თავიდან აიცილებთ უკმაყოფილებასა და გაღიზიანებას ფულის დაუფიქრებელი ხარჯვის გამო. ზოგიერთ ოჯახს ერთგვარი საიდუმლო დანაზოგი აქვს. მის მნიშვნელობას ყველაზე უკეთ მაშინ ვხვდებით, როდესაც გაუთვალისწინებელი ხარჯი იჩენს თავს, მაგალითად, მკურნალობა დაგვჭირდება ან უმუშევრობა მოგვიკაკუნებს კარზე. ეს ერთგვარი დაზღვევაა შავი დღისთვის. ასეთი საიდუმლო დანაზოგი უნდა ჰქონდეს როგორც მამაკაცს, ასევე ქალსაც. მთავარია, ეს ერთმანეთის მოტყუებაში არ გადაიზარდოს. ცუდია, როდესაც მამაკაცი ძუნწია - ოჯახის მთელი ბიუჯეტი მის ხელშია მოქცეული, ცოლს თავად აძლევს განსაზღვრულ თანხას აუცილებელი შენაძენისთვის და თუ ის ამ თანხაში ვერ ჩაეტია, მოუწევს მოისმინოს ვრცელი ლექცია იმის შესახებ, როგორი მფლანგველია. ამის შემდეგ იწყება სკრუპულოზური ანგარიში და როდესაც აღმოჩნდება, რომ ცხოვრება ნამდვილად გაძვირდა, ქმარი მშვიდდება, მაგრამ მაინც აფრთხილებს მეუღლეს, ფული მომჭირნედ ხარჯოს, რადგან ეს უკანასკნელი ციდან არ ცვივა. ყოველივე ეს ოჯახის სიმტკიცეს თანდათან არღვევს. როდესაც ქმარი მფლანგველია, ეს ორმაგად სახიფათოა ოჯახისთვის, თუმცა მრავალი მამაკაცი ამაყობს კიდეც თავისი ხელგაშლილობით, თითქოს ეს მათ რესპექტაბელურობასა და საზოგადოებრივ მდგომარეობაზე მიუთითებდეს. სხვათა შორის, ამბობენ, რომ არსებობს კავშირი ფულისა და ახლობლებისადმი დამოკიდებულებას შორის: როდესაც ადამიანი ფულის ხარჯვაში ძუნწია, ის სიყვარულშიც იძუნწებს; თუ ფულს ზერელედ ეკიდება, სიყვარულშიც ზერელე იქნება. საუკეთესო ვარიანტია, როდესაც ფინანსური საკითხების მოგვარებისას ცოლ-ქმარი ფხიზელი გონების შენარჩუნებას ახერხებს, - მხოლოდ ამ შემთხევვაში იქნება ოჯახში წესრიგი და ჰარმონია, - ხოლო თუ ფინანსურ საკითხებზე დავა ყოველდღიურ რუტინად იქცა, შესაძლოა, თქვენი ქორწინებიდან მეტი არც არაფერი დარჩეს.