ნანა ხუცაიძე

ნათესავებს, მაგრამ სარწმუნო ინფორმაციას ვერავისგან იღებს. სამაგიეროდ, ეცნობა უამრავ მითს ორსულობისა და მშობიარობის შესახებ. მოდით, განვიხილოთ რამდენიმე მათგანი.

• დასვენება, დასვენება და კიდევ ერთხელ დასვენება

ორსულად ხართ, მაგრამ ბროლის ლარნაკად ხომ არ ქცეულხართ? თუ უგუნებობას არ უჩივით, ექიმები არ გესაუბრებიან მუცლის მოშლის საშიშროებაზე და მკაცრ წოლით რეჟიმს არ გინიშნავენ, იცხოვრეთ ჩვეულებრივი ცხოვრებით. ცურვას, ტრენაჟორებზე ვარჯიშს და ველოსიპედით სეირნობას თავს ნუ დაანებებთ, მაგრამ ვარჯიშის ინტენსივობისა და სქემის შეცვლა აუცილებელია.

• იცხოვრეთ ძველებურად

სამწუხაროდ, ეს რჩევა ყოველთვის არ გამოგადგებათ. ნორმალურად მიმდინარე ორსულობის დროსაც კი რაღაც-რაღაცები იცვლება. მაგალითად, უეცრად ამჩნევთ, რომ თქვენი ოფისი მეტისმეტად დახუთულია, ავტომობილში ბენზინის საეჭვოდ ძლიერი სუნი დგას, სურნელი, რომელიც ადრე ძალიან მოგწონდათ, გულს გირევთ, მესამე ტრიმესტრის დასასრულს კი სამსახურისკენ მიმავალ გზაზე ყველა საზოგადოებრივი ტუალეტი გეცოდინებათ.

• როგორც არ უნდა გავსუქდე, მშობიარობის შემდეგ იოლად დავიბრუნებ ფორმას

ეს კი ნამდვილად მითია. ზოგი შესამჩნევად იმატებს წონას, ზოგი - ნაკლებად; ზოგი ადვილად იბრუნებს ფორმას მშობიარობის შემდეგ, ზოგიერთს კი ამისთვის სერიოზული ძალისხმევა სჭირდება...

• ორსულთა კოსმეტიკა

თანამედროვე ქალებმა იციან, რომ ორსულობისას სტრიების საწინააღმდეგო კრემების ხმარება აუცილებელია; თუ ვინმეს სტრიები გაუჩნდა, ესე იგი, ან კრემს არ ისვამდა, ან იაფფასიანი კრემი შეიძინა. სინამდვილეში კრემი ამ საკითხში ძალიან უმნიშვნელო როლს ასრულებს. სამაგიეროდ, დიდი მნიშვნელობა ენიჭება გენებს. იკითხეთ, ჰქონდა თუ არა სტრიები თქვენს დედას და ბებიას - მოსალოდნელია, თქვენც მათი ბედი გაიზიაროთ. სტრიების გაჩენა კანის ტიპზეა დამოკიდებული და არა კრემის წასმა-არწასმაზე, განურჩევლად მისი საფასურისა. რაც შეეხება, ზოგადად, კოსმეტიკას: ორსულობის დროს (ისევე, როგორც მანამდე და მის შემდეგ) მხოლოდ ხარისხიანი საშუალებები უნდა იხმაროთ. მშრალ კანს ყოველდღიური კრემი მოუხდება, ხოლო თმის ცვენას ხარისხიანი ვიტამინური კომპლექსის დროული მიღება შეგიმცირებთ.

ორსულთათვის განკუთვნილი სპეციალური კოსმეტიკა სხვებს არაფრით ჩამოუვარდება, მაგრამ არც აღემატება.

• არც შევიღებოთ და არც შევიჭრათ

შეღებვა არ შეიძლება, რადგან საღებავი ნაყოფისთვის საშიშია, - გეუბნებათ დედა. ბებია გარწმუნებთ, რომ თმის შეჭრით ბავშვს ჯანმრთელობას (ჭკუას, ძალას) ართმევთ. გიშლიან ლაქის წასმას, დეზოდო-რანტის, დეკორატიული კოსმეტიკისა და სუნამოს ხმარებას... არ გაგიკვირდეთ, თუ ამის შემდეგ ირგვლივ მყოფები თანაგრძნობით აღსავსე თვალებით შემოგხედავენ, თითქოს გეუბნებიან: ”რას იზამ, ორსულობა ყველას როდი უხდება”... სინამდვილეში ბოლოებგაყოფილი თმა, შეუღებავი თმის ძირები, მოუვლელი ხელები და ოფლის სუნი არავისაც არ უხდება.

საშიშია თუ არა საღებავი ნაყოფისთვის?

ჯერ ერთი, თანამედროვე საღებავები რადიკალურად განსხვავდება მათგან, დედათქვენისა და ბებიათქვენის ახალგაზრდობისას რომ ხმარობდნენ. მეორეც, რა მავნეც უნდა იყოს, ის მხოლოდ თქვენს კანსა და თმას მიაყენებს ზიანს. ჯერ ერთი, ჩვენი ორგანიზმი საკმაოდ ადვილად უმკლავდება ამ ტიპის ნეგატიურ ფაქტორებს, მეორეც, პლაცენტას სწორედ ის ევალება, რომ მავნე ნივთიერებები ნაყოფთან არ მიუშვას.

სხვა საქმეა სუნების გამძაფრებული აღქმა - თუ სალონში ჯდომა გიჭირთ, შეგიძლიათ, პარიკმახერი და მემანიკიურე სახლში დაიბაროთ.

• ორსულისთვის სტრესი მავნეა

საზოგადოდ, სტრესი არავისთვის არის სასარგებლო, მაგრამ ადამიანს ყოველდღიურად უამრავი უსიამოვნება ხვდება. ეს ნორმალურია. ადამიანის ორგანიზმს შეუძლია და პერიოდულად უნდა მიიღოს კიდეც ადრენალინის დოზა. განსაკუთრებით მძიმე სიტუაციაში მთავარია არა თავად სიტუაცია, არამედ მისდამი თქვენი დამოკიდებულება. გამუდმებით იმაზე ფიქრი, ხომ არ ავნო სტრესმა თქვენს შვილს, უფრო უარესია, ვიდრე ხანმოკლე ემოციური შეჯანჯღარება.

გნებავთ პოზიტივი და დადებითი ემოციები? საკუთარ თავს შთააგონეთ, რომ რაც არ უნდა მოხდეს, ყველაფერი რიგზე გექნებათ.

• ორსულობა ავადმყოფობა არ არის

ავადმყოფობა - არა, მაგრამ ორგანიზმის ძლიერი დატვირთვა ნამდვილად არის. ამ პერიოდში შესაძლოა გამწავდეს ქრონიკული დაავადებები, თავი იჩინოს ახლებმა, დედის ავადმყოფობამ კი შესაძლოა უარყოფითი გავლენა მოახდინოს ნაყოფის განვითარებაზე. ამიტომ ყურადღება მიაქციეთ საკუთარ განწყობას და ყური უგდეთ ექიმებს.

• ყველა ექიმი თავს იზღვევს

სამწუხაროდ, ეს მითი ნაწილობრივ მართალია, ზოგიერთ კონსულტაციაში მომსახურება ნამდვილად არ არის იდეალური, მაგრამ თუ ექიმი არ მოგწონთ, შეგიძლიათ არა მარტო სხვა სპეციალისტს, არამედ, საერთოდ, სხვა სამედიცინო დაწესებულებას მიაკითხოთ.

მშვიდად გაიკეთეთ ანალიზები, რომლებსაც ექიმი დაგინიშნავთ და მშვიდად ესტუმრეთ ყველა სპეციალისტს, ვისთან მისვლაც მოგიწევთ - ასეთია ორსულობის მართვის სტანდარტული სქემა, ამა თუ იმ პრეპარატის დანიშვნისას კი სიმტკიცე გამოიჩინეთ. არავითარ შემთხვევაში არ მიიღოთ ”ყოველი შემთხვევისთვის” გამოწერილი პრეპარატი. ყოველგვარი წამლის დანიშვნას მყარი საფუძველი უნდა ჰქონდეს. თუ გეეჭვებათ, რომ თქვენი ექიმი ”თავს იზღვევს”, კონსულტაციისთვის სხვასთან მიდით. იშვიათია, რომ რამდენიმე სპეციალისტმა ერთდროულად მოინდომოს ”თავის დაზღვევა”.

• ორსულთა კურსებს აუცილებლად უნდა დაესწროთ

უფრო კი, ვიდრე არა. თუ არ დაესწრებით, ქვეყანა არ დაიქცევა, მაგრამ მშობიარობა ცოტა უფრო მეტად გაგიჭირდებათ. იქ გასწავლიან, როგორ უნდა მოიქცეთ შეტევებისა და ჭინთვების დროს, როგორ ისუნთქოთ, როგორ გაუმკლავდეთ შიშს და ა.შ.

• ბავშვისთვის ტანსაცმლის წინასწარ ყიდვა არ შეიძლება

როგორ არ შეიძლება! მეტიც აუცილებელიც კია. რასაკვირველია, უბედური შემთხვევისგან არავინ არის დაზღვეული, მაგრამ ახალშობილთა სიკვდილიანობას არაფერი აქვს საერთო იმასთან, იყიდიან თუ არა მშობლები წინასწარ საბავშვო ნივთებს.

მშობიარობის შემდეგ საბავშვო ოთახის მოსაწყობად, ეტლისა და ტანსაცმლის შესაძენად, უბრალოდ, არ გეცლებათ. და მაინც, თუ მშობიარობამდე კატეგორიულად არ გსურთ საბავშვო ნივთების ყიდვა, შეარჩიეთ ისინი და ახლობლებს მათი სია დაუტოვეთ.

• ჯანმრთელ ქალს შეუძლია, სახლში იმშობიაროს

თეორიულად - დიახ, შეუძლია, მაგრამ რა კარგადაც უნდა მიმდინარეობდეს ორსულობა, ასეთი ქალები სასწრაფო დახმარების მანქანით ძალიან ხშირად მიჰყავთ უახლოეს სამშობიარო სახლებში. არის ისეთი სიტუაციებიც, როდესაც ყველაფერს წუთები წყვეტს. ეს ის წუთებია, რომლებიც გვყოფნის, რათა ქალი სამშობიარო ოთახიდან საოპერაციოში გადავიყვანოთ, მაგრამ არ კმარა, რომ სახლიდან სამშობიარომდე მიხვიდეთ...

თუ მშობიარობას მაინც სახლში აპირებთ, მოიძიეთ გამოცდილი ბებიაქალი და ყოველი შემთხვევისთვის გააფრთხილეთ უახლოეს სამშობიარო სახლში მომუშავე რომელიმე ექიმი, რადგან კრიტიკულ სიტუაციაში სასწრაფო დახმარების მანქანა ქალაქის მეორე ბოლოში არ წაგიყვანთ!

• აი, ვიმშობიარებ და ყველაფერი ადრინდელ კალაპოტში ჩადგება

თავს ნუ მოიტყუებთ, მშობიარობის შემდეგ ცხოვრება სრულიად შეიცვლება. რასაკვირველია, არა მაინცდამაინც უარესობისკენ... შეგიძლიათ, პირველსავე თვეებში დაიწყოთ მუშაობა, გაემგზავროთ დასასვენებლად, მაგრამ ამ ყველაფრის ორგანიზება სრულიად სხვაგვარად მოგიწევთ.

• ყველაფერს თვითონ ავუვალ

გაგიჭირდებათ. ბავშვზე ზრუნვა ძალიან ბევრ დროს წაგართმევთ. რასაკვირველია, შეიძლება, 18 საათი მოახმაროთ ბავშვს, ხოლო დანარჩენი 6 - დალაგებას, რეცხვას, საჭმლის მომზადებას და მაღაზიებში სიარულს, მაგრამ იცოდეთ: ძალიან მალე გამოიფიტებით. ასე რომ, თუ ვინმემ (დედამ, დედამთილმა, დეიდამ, მამიდამ) დახმარება შემოგთავაზათ, ცხვირს ნუ აიბზუებთ.

• მე ყველაფერი ვიცი!

მოდი, შევთანხმდეთ: თქვენ არაფერიც არ იცით. თეორიული და პრაქტიკული ცოდნა ერთმანეთისგან რადიკალურად განსხვავდება. მართალია, კურსებმა, ჟურნალებმა და წიგნებმა უამრავი რამ მოგცათ, მაგრამ ადრე თუ გვიან მაინც იჩენს თავს კითხვები, რომლებზეც ახალგაზრდა მშობლებს პასუხი არ აქვთ - წიგნებში ხომ ზოგადად ბავშვებზე წერია და არა კონკრეტულად თქვენს შვილზე. უფროსების გამოცდილება, ცხადია, გამოგადგებათ, მაგრამ მხოლოდ მას ნუ ენდობით. თავად აღზარდეთ შვილი და გადაწყვეტილებებიც თქვენ თვითონ მიიღეთ.