მარიკა დვალი

;

• მთავარია არჩევანი

სანამ ბავშვი ჯერ კიდევ პატარაა და თანამედროვე მოდის ტენდენციებში ვერ ერკვევა, ვარცხნილობის სტილი მშობლებმა უნდა შეარჩიონ. სასურველია, ვარცხნილობა მხოლოდ მოხდენილი კი არა, მოხერხებულიც იყოს, რათა ბავშვს თამაშისა და ცელქობის დროს თმა თვალებზე არ ჩამოეფხატოს.

ნუ იფიქრებთ, რომ ბიჭისთვის ვარცხნილობის შერჩევა ადვილია. მიმოიხედეთ და შეამჩნევთ, რამდენი რამ მოიფიქრეს მოდურმა სტილისტებმა მომავალი მამაკაცებისთვის. მრავალფეროვნებამ არ დაგაბნიოთ, არც ზედმეტი მოგივიდეთ - ისეთი ვარცხნილობა შეარჩიეთ, რომ ბავშვმა ბუნებრივი იერი არ დაკარგოს.

არავითარ შემთხვევაში, თუნდაც მოსალოდნელი დღესასწაულის ხათრით, აზრადაც არ გაივლოთ ბავშვის თმის ბუნებრივი ფერის შეცვლა. თმის ელფერის შესაცვლელმა უბრალო შამპუნმაც კი, რომელიც მოზრდილი ადამიანებისთვის უსაფრთხოა, ბავშვის ჯანმრთელობას შეიძლება ზიანი მიაყენოს.

• ვიწყებთ!

სტილისტის შერჩევისას ყურადღება მიაქციეთ არა მარტო მის პროფესიონალიზმს, არამედ ბავშვებთან ურთიერთობის უნარს. ნაკლებად სავარაუდოა, რომ მეტისმეტად დატვირთულმა სტილისტმა, რომელიც დღის განმავლობაში უამრავ კლიენტს ემსახურება, თქვენი პატარას მიმართ განსაკუთრებული სითბო გამოამჟღავნოს. ნაცნობებთან გაიკითხეთ, რომელ დალაქს აქვს ბავშვებთან ურთიერთობის ნიჭი. ის არც ზედმეტად მკაცრი უნდა იყოს და არც მეტისმეტად დამთმობი. უმჯობესია, სტილისტს წინასწარ შეხვდეთ, ერთად შეარჩიოთ ვარცხნილობის დეტალები და თქვენი ბავშვის ხასიათის თავისებურებებიც გააცნოთ, ურჩიოთ, როგორ მოიქცეს თქვენს შვილთან, როგორ დააწყნაროს აღელვებული ბავშვი - მიუხედავად იმისა, რომ დედ-მამაც იქვე იქნება, პატარა კლიენტთან ყველაზე მჭიდრო და უშუალო კონტაქტი ხომ მაინც სტილისტს აქვს. კარგი იქნება, თუ მეგობარს ან მეზობელს შეუთანხმდებით და ბავშვებს ერთად წაიყვანთ სილამაზის სალონში. სასურველია, მეორე პატარა უკვე "გამოცდილი" იყოს და მშვიდად იჯდეს სავარძელში, ვიდრე სტილისტი თავს დასტრიალებს. ასეთი თქვენს შვილზე კეთილისმყოფელ გავლენას მოახდენს.

• პირადი მაგალითის ძალა

ბავშვის მოსამზადებლად საკუთარი მაგალითი მოიშველიეთ. როცა სილამაზის სალონში წახვალთ, ბავშვიც წაიყოლეთ. გზაში ესაუბრეთ იმაზე, როგორ გაგალამაზებთ სტილისტი და როგორ უხდება ადამიანს კოხტა ვარცხნილობა. ხშირად შეიარეთ სილამაზის სალონში ბავშვთან ერთად და იმ სტილისტს გაესაუბრეთ, რომელთანაც პატარას მიყვანა გსურთ. თავის მხრივ, ისიც უნდა მიესალმოს პატარას.

მოაწყვეთ შინ პატარა საპარიკმახერო, ბავშვს დაანახვეთ, როგორ კრეჭთ ერთმანეთს თმას, თან კმაყოფილებით აღნიშნეთ, რა კარგია თმის შეჭრა. მოაწყვეთ სილამაზის სალონი თოჯინებისთვის. შეაჭერით თმის ბოლოები, თან აღნიშნეთ, რომ თოჯინას ახლა უფრო ლამაზი ვარცხნილობა აქვს, თმა თამაშში ხელს აღარ უშლის და, რაც მთავარია, უფრო ლამაზად გამოიყურება. შეიძინეთ სათამაშო მაკრატელიც და სტილისტის როლი ბავშვს დააკისრეთ. როცა შეამჩნევთ, რომ პატარა ასეთ თამაშს მიეჩვია, შეგიძლიათ, მშვიდად იყოთ - ესე იგი სილამაზის სალონის მიმართ შიში მოდისა და სილამაზის შეგრძნებით შეეცვალა.