ლალი ჩხიკვაძე

ამიტომაც არის, რომ ძლიერი სქესის წარმომადგენლები თმას ინერციით იჭრიან, ისე, როგორც ბავშვობაში კრეჭდა დედა, თუნდაც ეს ვარცხნილობა არ უხდებოდეს, არ შეესაბამებოდეს მათი თმის ტიპსა და სახის ფორმას. ზოგიერთი პრობლემას მარტივად წყვეტს: თავს სულმთლად იპარსავს ან დახუჭუჭებული დალალებით დადის და უკვირს, რატომ არ ეწყობა კარიერა და პირადი ცხოვრება.

ხშირი, მოვლილი თმა მამაკაცის მიმზიდველობისა და წარმატების მნიშვნელოვანი ფაქტორია. საუკეთესო კოსტიუმი და ჰალსტუხიც კი უეფექტოდ გამოიყურება, თუ თავზე ყვავის ბუდე გადგათ.

მამაკაცის ვარცხნილობის შერჩევისას მთავარი წესი ასეთია: თმის ყოველ ტიპს - თავისი გადაწყვეტა.

• ოდნავ ტალღოვანი, ხშირი თმა

ოდნავ ტალღოვანი, ხშირი თმა ბუნების ნამდვილი საჩუქარია, რადგანაც მისთვის შეიძლება შეირჩეს ვარცხნილობის, სტილის უამრავი ვარიანტი.

ამ ტიპის თმის შეჭრისას უხეშ შეცდომად ითვლება თმის დიდი რაოდენობით აღება საფეთქლებთან. ასეთი ვარცხნილობა აკურატულად კი გამოიყურება, მაგრამ მეტისმეტად კონსერვატიულია, თანაც მალე კარგავს ფორმას.

მისაღები ვარიანტია ზემოთ ოდნავ გრძლად დატოვება, გვერდებზე და უკან - შედარებით მოკლედ გაკრეჭა.

უფრო თანამედროვე სტილისაა ვარცხნილობა, რომლის დროსაც თმის სიგრძე ყველგან ერთნაირი რჩება - 3-4-სმ. ასეთ შემთხვევაში გექნებათ მოვლილი და ბუნებრივი იერი, როგორიც, მაგალითად, პირს ბროსნანს.

შეიძლება, უფრო მოკლედაც შეიჭრათ და ამით ხაზი გაუსვათ თქვენს მამაკაცურობას. ასეთ შემთხვევაში მისაბაძ მაგალითად ბრედ პიტი გამოგადგებათ.

• ხშირი თმა

თუ თმა ხშირი გაქვთ, შეგიძლიათ, დალალები მხრებამდე გაიზარდოთ, - ასეთ შემთხვევაში ჯონ ტრავოლტას დაემსგავსებით.

• სწორი და თხელი თმა

მამაკაცთა უმრავლესობა სწორი და თხელი თმის მოსურნეა, რადგან მისი მოვლა უფრო იოლია, თუმცა ცუდმა ვარცხნილობამ ისიც შეიძლება გააფუჭოს.

მაგალითად, ამ ტიპის თმის მეტისმეტად მოკლედ შეჭრა არ შეიძლება, თუმცა მოსწავლეებს ასეთი ვარცხნილობა ნამდვილად უხდებათ.

უკეთესი იქნება, თუ თმას ოდნავ მოვიზრდით და ისე დავივარცხნით, რომ მცირედი მოცულობა მივცეთ.

სწორი თმა საშუალებას მოგცემთ, გაიკეთოთ კლასიკური ვარცხნილობა, როგორიც აქვს, მაგალითად, მეთ დეიმონს. კერძოდ, გვერდებზე, ზემოთ და უკან რამდენიმე საფეხურად აიჭრათ, ხოლო შუბლზე მოკლედ ჩამოიშალოთ.

უფრო თამამი ვარიანტია მოკლედ ან საშუალო სიგრძეზე შეჭრილი თმა, რომელსაც შემდეგ ფიქსატორის, სავარცხლისა და საკუთარი თითების საშუალებით ხელოვნურად მისცემთ უწესრიგო იერს. ასე ივარცხნიან დევიდ ბეკჰემი, დენიელ კრეიგი და ჯუდ ლოუ.

• ხვეული გრუზა თმა

ხვეული გრუზა თმა არა მარტო მომხიბლავია, არამედ მდიდრულიც, თუმცა კი ძნელი მოსავლელია და მათ პატრონებს დაუმორჩილებელი ხვეულების მოსათვინიერებლად გელებისა და კრემების ხმარება უწევთ. ასეთი თმის შეჭრასა და დავარცხნაზე უარის თქმის უფლება მხოლოდ სტუდენტებსა და პოეტებს (მსახიობებს, მხატვრებს) აქვთ. აწეწილი დალალები საქმიან სტილთან შეუთავსებელია.

კლასიკური ვარიანტი: შეიჭერით თმა მოკლედ, როგორც მოიქცა ჯასტინ ტიმბერლეიკი, როდესაც მოზარდი სექს-სიმბოლოს იმიჯის შეცვლა მოისურვა. მოკლე ნახევრად ტალღოვანი თმა მეტად კეთილშობილურად გამოიყურება.

• სიმელოტე

სიმელოტე - ესეც ერთგვარი "ვარცხნილობაა". ნუ შეეცდებით მის შენიღბვას - ეს მხოლოდ ხაზს გაუსვამს პრობლემას.

თუ თმა მხოლოდ შუბლსა და საფეთქლებზე შეგითხელდათ, უკეთესია, მიბაძოთ ნიკოლას კეიჯს - თმა რამდენიმე სანტიმეტრით გაიზარდოთ და ისე დაივარცხნოთ, რომ აქცენტი მისი ზრდის ხაზზე არ გადაიტანოთ.

თუ თმა შესამჩნევად არის გაცვენილი, შეგიძლიათ რადიკალური და ოპტიმალური ვარიანტი აირჩიოთ: გადაიპარსოთ. მოხერხებულიც არის და მამაკაცურიც. ბრიუს უილისი, ზინედინ ზიდანი ამის საუკეთესო მაგალითია.

ნუ აღიქვამთ ვარცხნილობას ვალდებულებად, რომელიც უნდა მოიხადოთ და დაივიწყოთ. ყოველდღიურ იმიჯს მეტი ყურადღებით მოეკიდეთ - არავინ მიაქცევს ყურადღებას თქვენს უნაკლო კოსტიუმს, თუ თმა მოწესრიგებული არ გექნებათ. ნუ მოგერიდებათ, ჩაიხედოთ მამაკაცთა ჟურნალებში და თვალი ადევნოთ ვარცხნილობის აქტუალურ ტენდენციებს.