ნანა კალანდაძე

ზღვა, მარილიანი წყალი, მარილით გაჯერებული ჰაერი, მზე თავისებურ გავლენას ახდენს თმაზე - აუხეშებს, ახუნებს. იმისთვის, რომ ლამაზად გარუჯული სხეულის მომხიბვლელობას თმისაც დაემატოს, საზღვაო სეზონის შემდეგ აუცილებლად უნდა ვიზრუნოთ მის რეაბილიტაციაზე, დავუბრუნოთ უწინდელი ბზინვარება და მშვენიერება.

დაიბანეთ თმა სწორად

რამდენად ხშირად უნდა დავიბანოთ თმა? აქ, უპირველეს ყოვლისა, ჩვენი შეგრძნებებით უნდა ვიხელმძღვანელოთ. არ გაქვთ სუფთა თმის შეგრძნება? ამჩნევთ, რომ თმა წებოვანი გაგიხდათ და ცხიმისაგან გიპრიალებთ? უნდა დაიბანოთ. ჩვეულებრივ, ნორმალურ თმას იბანენ 3-5 დღეში ერთხელ, მშრალს - უფრო იშვიათად, 7-9 დღეში ერთხელ, ცხიმიანი თმა კი შეიძლება ყოველდღე დავიბანოთ, ოღონდ სპეციალური შამპუნით.

ბალზამები და ნიღბები

მთავარი შეცდომა, რომელსაც უშვებენ თმის კონდიციონერებისა და ნიღბების გამოყენებისას, ის არის, რომ ჰგონიათ, თითქოს ისინი მხოლოდ პრობლემური, მაგალითად, მშრალი და მტვრევადი თმისათვის იყოს მიზანშეწონილი, ხოლო მან, ვისაც ცხიმიანი თმა აქვს, ბალზამით არ უნდა ისარგებლოს. სრულიადაც არა!

სწორად შერჩეული საშუალებები რგებს როგორც მშრალ, ისე ცხიმიან თმას. ბალზამის გამოყენება არ გამორიცხავს ნიღბის ხმარებას - ის უნდა გაიკეთოთ კვირაში ერთხელ მაინც. ნებისმიერი ტიპის თმისთვის აუცილებელია კვება და დატენიანება.

იმ ნიღბის ხანგრძლივი მოქმედება, რომელიც თმისთვის აუცილებელ ნივთიერებებს შეიცავს, შესანიშნავი შედეგის გარანტიას იძლევა. ერთი ულუფა შამპუნი ყველაზე ხშირი და გრძელი თმისთვისაც კი სავსებით საკმარისია, ხოლო თუ მოკლე თმა გაქვთ - იხმარეთ უფრო ნაკლები.

პროტეინების შემცველი ინტენსიურად აღმდგენი ნიღაბი თმას ამაგრებს, სიგლუვესა და ბზინვარებას ანიჭებს. ის მშრალი და დაზიანებული თმისთვის არის განკუთვნილი. ყველა ტიპის თმაზე განსაკუთრებით კეთილისმყოფელ გავლენას ახდენს შამპუნი, რომელიც მკვდარი ზღვის მინერალებს შეიცავს.

თმის შეღებვა გადაწყვიტეთ?

ზღვის კურორტებიდან დაბრუნების შემდეგ ქალებს ხშირად უჩნდებათ სიახლის სურვილი. მზეზე გახუნებული თმა ისედაც ითხოვს საღებავს.

გსურთ, რადიკალურად შეიცვალოთ თმის ფერი? მაშ, მოდი, საღებავი შევარჩიოთ. უპირატესობა მიანიჭეთ მდგრად, ინტენსიურ საღებავს.

თუ საკუთარი თმის ფერის გაძლიერება ან თმისთვის განსაკუთრებული ელფერის მიცემა გსურთ, უნდა აირჩიოთ საღებავი, რომელიც ნაკლები მდგრადობით გამოირჩევა ან ფერის მიმცემი საშუალებები: ბალზამი, მუსი, გელი, შამპუნი.

დამოუკიდებლად გსურთ თმის შეღებვა? დადგით ორი სარკე ისე, რომ საკუთარ კეფას ხედავდეთ. დაყავით თმა რიგებად და დაიდეთ საღებავი თმის ძირებზე. ყურადღება მიაქციეთ, რომ საღებავი თანაბრად განაწილდეს, რათა თმა არ აჭრელდეს.

თმის შესაღებავად სასურველია შეიძინოთ სპეციალური ბრტყელი ფუნჯი. ასეთი ფუნჯით თმაზე საღებავის დადება ძალიან მოხერხებულია.

უფრთხილდით საღებავის მოხვედრას კანზე ან ტანსაცმელზე. მკაცრად დაიცავით შეღებვისთვის განკუთვნილი დრო.

როგორ დავივარცხნოთ თმა

უკეთესია, თუ თმის დასავარცხნად გამოიყენებთ ნატურალური ხის სავარცხელს ან ჯაგრისს. თმის ვარცხნა ძირებიდან დაიწყეთ. არასოდეს დაივარცხნოთ სველი თმა, ოდნავ მაინც შეიშრეთ. გრძელი თმა ჯერ ხელის თითებით გააცალკევეთ, რამდენადაც შესაძლებელია, და მერეღა დაიწყეთ ჯაგრისით ან სავარცხლით ვარცხნა.

ბევრი ქალი დაბანის დროს ივარცხნის თმას, ეს კი დაუშვებელია, რადგან ამ დროს თმის ძირები გაფართოებულია და თმა ცვივა. თუ ასე სისტემატურად იქცევით, თმა საგრძნობლად შეთხელდება.

თუ ყველა მითითებას გულდასმით შეასრულებთ, თქვენი თმა ბზინვარებასა და ხიბლს დაიბრუნებს და გარუჯულ სხეულთან სრულ ჰარმონიაში მოვა.