ტკბილი გაზიანი სასმელი პოდაგრის განვითარების რისკს ზრდის
პოდაგრა უმეტესად ფეხის თითებს აზიანებს. დაავადების განვითარებაში გარკვეულ როლს ასრულებს მემკვიდრეობა, ჭარბი კვება, ხორციანი საკვებისა და ალკოჰოლური სასმელების (განსაკუთრებით - ლუდისა და ყურძნის ღვინის) ჭარბი მიღება, ცხოვრების ჰიპოდინამიური რეჟიმი. არცთუ იშვიათად პოდაგრა თირკმლის უკმარისობისა და სისხლის დაავადების ფონზე ვითარდება. წინათ პოდაგრას არისტოკრატთა დაავადებას უწოდებდნენ. დღეს ის უფრო და უფრო მეტად ვრცელდება სხვადასხვა სოციალურ წრეში. ბოლო რამდენიმე ათწლეულის განმავლობაში აშშ-ში პოდაგრით ავადობამ 2-ჯერ და მეტად მოიმატა. ეს გაზიანი სასმელების მოხმარების მატებას დაემთხვა და, როგორც უახლეს გამოკვლე-ვათა შედეგები ადასტურებს, ეს კავშირი შემთხვევითი არ არის. მეცნიერები აკვირდებოდნენ ამერიკელ მამაკაცებს (ექიმებს, ვეტერინარებს, სანიტრებსა და ფარმაცევტებს), რომელთაც პოდაგრა არ ჰქონიათ. 12 წლის განმავლობაში ისინი მკვლევარებს რეგულარულად აწვდიდნენ ინფორმაციას ყოველდღიური ცხოვრების, დიეტის, მოხმარებული ალკოჰოლური სასმლის შესახებ. პოდაგრის შეტევები 755 პირს აღერიცხა. ინფორმაციის ანალიზის შედეგად დადგინდა, რომ პოდაგრის განვითარების რისკს, სხეულის მასის, ალკოჰოლისა და დიეტის სხვა თავისებურებებისგან დამო-უკიდებლად, პირდაპირი კავშირი აქვს გაზიანი სასმლის მოხმარების სიხშირესთან. იმ მამაკაცებს შორის, ვინც დღეში ორ ქილა გაზიან სასმელს მაინც სვამდა, პოდაგრის 85%-ით მეტი შემთხვევა აღირიცხა, ვიდრე მათ შორის, ვინც გაზიან სასმელს თვეში ერთხელ ყიდულობდა, ხოლო მათ, ვინც ყოველდღე ერთ ქილა გაზიან სასმელს მაინც სვამდა, პოდაგრის განვითარების რისკი 45%-ით მაღალი ჰქონდათ. მკვლევარები ამ კანონზომიერებას უკავშირებენ ფრუქტოზას, რომელიც გაზიანი სასმელების დამატკბობლად გამოიყენება. ცნობილია, რომ ორგანიზმში ამ ნახშირწყლის მოხვედრა სისხლში შარდმჟავა მარილების მატებას იწვევს.