საიდან გაჩნდა ქალის რძეში რაკეტის საწვავი?!
26.02.2009
ტეხასის ტექნიკური უნივერსიტეტის სპეციალისტებმა ქალის რძეში პერქლორატები აღმოაჩინეს. ეს ქიმიური ნივთიერებები აღმოჩენილ იქნა ძროხის რძეშიც.
პერქლორატები ფართოდ გამოიყენება წარმოებაში. ისინი მყარ სარაკეტო საწვავს წარმოადგენს. ორგანიზმში მოხვედრილი პერქლორატები უარყოფითად მოქმედებს ფარისებრ ჯირკვალზე - ამცირებს მის მიერ იოდის მიტაცების უნარს. მედიცინაში კალიუმის პერქლორატი გამოიყენება როგორც დამხმარე თერაპიული საშუალება ფარისებრი ჯირკვლის ფუნქციის მომატების - თირეოტოქსიკოზის - დროს.
ქალის რძეში ეს ნივთიერებები საკმაოდ მაღალი კონცენტრაციით - 10,5 მკგ/ლ - აღმოჩნდა. ეს მაშინ, როცა სასმელ წყალში პერქლორატების კონცენტრაციის დასაშვები დოზაა 1 მკგ ლიტრზე.
მკვლევარების აზრით, მიღებული მონაცემები გარემოს ძლიერ დაბინძურებაზე მიუთითებს და აუცილებელს ხდის ორსულებისა და მეძუძური დედების სისხლში იოდის შემცველობის კონტროლს.
