შვედეთში ნიკოტინის საწინააღმდეგო ვაქცინის გამოსაცდელად ემზადებიან
.
კვლევაში, რომელიც მომავალ წელს დასრულდება, მონაწილეობას მიიღებს სკანდინავიის ქვეყნების 400-მდე მკვიდრი.
შვედური კომპანია Independent Pharmaceutica-ს მიერ შემუშავებული ექსპერიმენტული ვაქცინა Niccine-ის გავლენით ნიკოტინის საწინააღმდეგო ანტისხეულები ორგანიზმში მანამდე გამომუშავდება, ვიდრე ნიკოტინი თავის ტვინში არსებულ დაკმაყოფილების ცენტრს მიაღწევს. ამგვარად, მწეველი მოწევისგან ჩვეულ სიამოვნებას ვეღარ იღებს და ბოლოს და ბოლოს სიგარეტისადმი ლტოლვა უქრება.
ნიკოტინის საწინააღმდეგო ანტისხეულები ბუნებრივ პირობებში არ წარმოიქმნება, ამიტომ ვაქცინა ნიკოტინთან ერთად ანტივირუსული იმუნური რეაქციის გამომწვევ კომპონენტებს შეიცავს. ექსპერიმენტში მონაწილეობის მსურველები მრავალწლიანი სტაჟის მქონე მწეველები არიან და ყველა მათგანს სურს ამ მავნე ჩვევისგან გათავისუფლება. მათ ნახევარს დაენიშნება ექსპერიმენტული პრეპარატი, მეორე ნახევარს (საკონტროლო ჯგუფს) კი - პლაცებო. თითოეულ მონაწილეს 4 თვის განმავლობაში გაუკეთდება ექსპერიმენტული პრეპარატის ოთხი ინექცია, რის შემდეგაც დაიწყება 12-თვიანი დაკვირვების პერიოდი. მოქმედების ანალოგიური პრინციპის მქონე ვაქცინის შემუშავებას კიდევ რამდენიმე ფარმაცევტული კომპანია ცდილობს. ზოგიერთი ასეთი პრეპარატი ამჟამად კლინიკური გამოცდის სტადიაშია.
