ნინო ჩარგეიშვილი

ამერიკელი მეცნიერები გვირჩევენ, კატარაქტის პროფილაქტიკისთვის საკვებ რაციონში უხვად ჩავრთოთ მწვანე ბოსტნეული - ისპანახი, მწვანე სალათა, კომბოსტო.

ცნობილია, რომ კატარაქტის განვითარებას ხელს უწყობს გენეტიკური განწყობა, ცხოვრების წესის ზოგიერთი თავისებურება და გარეგანი ფაქტორების ზემოქმედება. უკანასკნელი ფაქტორი უმთავრესად მზის ულტრაიისფერი გამოსხივების მავნე ზემოქმედებას გულისხმობს, რაც ბროლის ქსოვილებში ჟანგვით-სტრესულ პროცესებს უდებს სათავეს და საბოლოოდ მის შემღვრევამდე - კატარაქტამდე მივყავართ.

მეცნიერებმა ლაბორატორიულ პირობებში შეისწავლეს მწვანე ბოსტნეულში უხვად არსებული ორი ანტიოქსიდანტის - ლუთეინისა და ზეაქსანთინის გავლენა ბროლის ოპტიკურ თვისებებზე. გაირკვა, რომ ანტიოქსიდანტური აქტივობა - ჟანგვითი სტრესის თავიდან აცილების უნარი - აღნიშნულ ნივთიერებებს ათჯერ მეტი აქვთ, ვიდრე ცნობილ ანტიოქსიდანტს - A ვიტამინს. ამ უნარის წყალობით ლუთეინისა და ზეაქსანტინის შემცველ ბოსტნეულს ძალუძს, ეფექტური წინააღმდეგობა გაუწიოს ბროლზე ულტრაიისფერის სხივების ნეგატიურ გავლენას.

ღვინო ამცირებს ოსტეოპოროზის განვითარების რისკს

ბრიტანელი მეცნიერები ამტკიცებენ, რომ ცოტაოდენი ღვინის ყოველდღიური მიღება ზრდის ძვლების სიმკვრივეს და, აქედან გამომდინარე, შეუძლია შეამციროს ოსტეოპოროზის განვითარების რისკი. ლუდსა და სხვა ალკოჰოლურ სასმელებს ასეთი თვისება არ აქვთ.

ოსტეოპოროზი დაავადებაა, რომლის დროსაც ძვლები ფაშრდება, მყიფე ხდება და ადვილად იმტვრევა. ეს დაავადება უმთავრესად ქალებს ემართებათ მენოპაუზის პერიოდში. ექსპერტებს მიაჩნიათ, რომ არსებობს კავშირი კვების რაციონს, ალკოჰოლური სასმელების მოხმარებასა და მოტეხილობის რისკს შორის.

მეცნიერებმა დასკვნის გამოტანამდე შეისწავლეს 50 წელს გადაცილებული 1000 ბრიტანელი ქალის ჯანმრთელობის მდგომარეობა, მათი კვებითი ჩვევები და ალკოჰოლური სასმელების მიმართ დამოკიდებულება. გამოკვლევის მონაწილეებს ჩაუტარდათ მენჯ-ბარძაყის სახსრების, თეძოს ძვლებისა და ხერხემლის სკანირება მათი სიმტკიცის დასადგენად. გამოკვლევის ერთ-ერთი ავტორი ამბობს, რომ ღვინის ზომიერი მიღება ზრდის ძვლის ქსოვილის მინერალურ სიმკვრივეს, მაშინ როცა ტრადიციული ინგლისური სამზარეულო (ვირთევზას ფილე, ხრაშუნა კარტოფილი, პარკოსნები, ძეხვეული და ხორცის ღვეზელი) მის სიმკვრივეს ამცირებს.

ჯერჯერობით უცნობია, რატომ უწყობს ხელს ღვინის მცირე დოზა ძვლების გამკვრივებას. მეცნიერები ვარაუდობენ, რომ ამის მიზეზია ამ სასმელში შემავალი პოლიფენოლი, რომელიც, როგორც ცნობილია, ხელს უწყობს ჯანმთთელი, მტკიცე ძვლების ზრდას. ამავე დროს, მეცნიერები გვაფრთხილებენ, რომ ღვინო ძვლებისთვის მხოლოდ მცირე დოზით არის სასარგებლო, ალკოჰოლის ჭარბმა მოხმარებამ კი შესაძლოა უკუეფექტი - ძვლოვანი ქსოვილის დასუსტება - გამოიწვიოს.

დიდი ხანია დადგენილია, რომ ღვინის ზომიერი მიღება ხელს უშლის ჭარბი წონის დაგროვებას, აქვეითებს მოხუცებულობის ჭკუასუსტობის განვითარების რისკს, ხოლო წითელი ღვინის აქტიურ ინგრედიენტს, რესვერატროლს, უნარი შესწევს, კომპენსირება გაუწიოს ფიზიკური აქტიურობის დეფიციტს და რამდენადმე გადაავადოს მჯდომარე ცხოვრების წესის უარყოფითი შედეგები.

თავის ტკივილთან ბრძოლის ოთხი საშუალება

თავის ტკივილი ხშირად ერთი შეხედვით უმიზეზოდ იჩენს თავს და თავაისთავად გაივლის. მიზეზების ჩამოთვლა შორს წაგვიყვანს. მეტიც - ზოგჯერ მიზეზი ძნელი დასადგენია. ზოგი თავის ტკივილს ტკივილგამაყუჩებელი პრეპარატებით ებრძვის, ზოგი კი ელოდება, როდის გაივლის ის. მათთვის, ვინც წამლების ხშირად სმას ერიდება, მეცნიერებმა შეიმუშავეს 4 რჩევა, რომელთა დახმარებითაც ტკივილი შეიძლება შევასუსტოთ და გავაქროთ კიდეც.

1. მასაჟი. დამტკიცებულია, რომ შაკიკით დაავადებული ადამიანი მასაჟისთვის კვირაში თუნდაც 2-3-ჯერ გამოძებნის დროს, მას თავის ტკივილი, სულ ცოტა, ორჯერ ნაკლები სიხშირით შეაწუხებს. მასაჟი აუმჯობესებს სისხლის მიმოქცევას და ხელს უწყობს ორგანიზმის მოდუნებას, ეს ორი ფაქტორი კი უმთავრეს როლს ასრულებს თავის ტკივილის ინტენსივობის შემცირებაში.

2. დაჭიმვა. დახარეთ თავი მარჯვნივ-მარცხნივ; ასწიეთ-დასწიეთ; ნელა აბრუნეთ. თავს ერთ მხარეს რომ დახრით, კისერი დაახლოებით 5 წამი უნდა გააჩეროთ დაჭიმული. საწყის მდგომარეობაში დაბრუნებისას 5 წამი უნდა დაისვენოთ.

3. სითბო და სიცივე. თუ ტკივილი მოპულსირეა, საფეთქლის მიდამოში ყინული ან სველი პირსახოცი უნდა მივიდოთ - აქ გადის მნიშვნელოვანი არტერია, რომელიც სისხლით კვებავს თავის ტვინს. ტემპერატურის დაქვეითება სწრაფად შეამცირებს ტკივილის შეგრძნებას. როცა ტკივილი დამწოლი ხასიათისაა, კარგია სითბო კისრის უკანა მხარეს.

4. შესაბამისი ატმოსფერო. თავის ტკივილი ხშირად დაძაბულობით არის გამოწვეული. მეცნიერები გვირჩევენ, ვისწავლოთ მოდუნება. ამაში დაგვეხმარება სასიამოვნო მუსიკა, სუნთქვის კონტროლი და სხვა.

დაბოლოს, თავის ტკივილი უმიზეზოდ არ წაროიშობა - ეს არის სიგნალი, რომელიც მიგვანიშნებს, რომ ორგანიზმში რაღაც მოიშალა, ამიტომ მისი უგულებელყოფა არ შეიძლება.