დევი დევიძე

.

• „გამარჯობა, ფეხის თითებს შორი კანი მისკდება, ფეხისგულზე და ქუსლებზე კანი მექერცლება, ხშირად ბუშტებიც მიჩნდება და ზოგჯერ ქერქსაც იკეთებს. მივედი ექიმთან და დამინიშნა დასალევად რაღაც წამალი დიდ ხნით (კვირაში მხოლოდ ერთ ტაბლეტი უნდა დავლიო) და ფესზე წასასმელად კრემიც, სითხეც, თან ფეხის ფრჩხილის და ფეხსაცმელების დამუშავება მასწავლა. ვიმკურნალე გარკვეული პერიოდი და აშკარა უკეთესობა შევამჩნიე. ექიმის დანიშნულება შევწყვიტე, მოვერიდე ტყუილად წამლის მოხმარებას. ახლა ისევ დამეწყო იგივე პრობლემები ფრჩხილზე. რა ვქნა? გთხოვთ მირჩიეთ ხალხური საშუალება“

როგორც ჩანს, საქმე სოკოვან დაავადებასთან გვაქვს. სამწუხაროდ, სოკოვან დაავადებებს ბევრი იცნობს.

სოკოები დედამიწაზე მრავალი მილიონი წელია ცხოვრობენ. ისინი დღედაღამ უტევენ ადამიანის ორგანიზმს. კანის სოკოვან დაავადებებს -მეცნიერულად მათ მიკოზებს უწოდებენ -იწვევენ მიკროსკოპული ზომის სოკოები, რომლებიც ადამიანის კანსა და ლორწოვან გარსებზე პარაზიტობენ. ადამიანის ორგანიზმში სოკოს სპორები მიკროტრავმის ადგილებიდან იჭრებიან. დაავადების სიმძიმე და ბუნება სოკოს სახეობასა და დაზიანების ადგილზეა დამოკიდებული.

სოკოვანი დაავადების განვითარებას ხელს უწყობს ყველა ის ფაქტორი, რომელიც ორგანიზმის თავდაცვით ძალებს ასუსტებს. დასუსტებულ ორგანიზმში სოკო ადვილად აზიანებს კანს, ლორწოვან გარსებს, ფრჩხილებს, თმებს, ფილტვებს, სასქესო ორგანოებსა და საყლაპავს.

მიკოზები ქრონიკულად მიმდინარეობს, ამიტომ მათი მკურნალობა წამლების ერთი კოლოფის მიღებით არ ამოიწურება, მათ დიდხანს მკურნალობენ.

გასათვალისწინებელია ისიც, რომ მკურნალობის პროცესში დაავადების ნიშნები შეიძლება გაქრეს, მაგრამ ეს იმას არ ნიშნავს, რომ ავადმყოფობა განიკურნა, პაციენტები კი ხშირად სწორედ ამ დროს წყვეტენ მკურნალობას და მცირე ხნის შემდეგ გაოცებულნი აღმოაჩენენ, რომ დაავადებამ უწინდელზე მეტი ძალით იფეთქა. უნდა იცოდეთ, რომ არასრული კურსის შემდეგ ხელახლა თავჩენილი დაავადება გაცილებით ძნელად ემორჩილება მკურნალობას. ასეთ ვითარებაში სამკურნალო პრეპარატების ოდენობა და დოზირება უფრო მეტია (შესაბამისად, მეტი თანხაც იხარჯება), ხოლო მედიკამენტების ხანგრძლივი მიღება მათი გვერდითი ეფექტების გამო არცთუ უსაფრთხოა.

ამიტომ გირჩევთ, ექიმის ყველა დარიგება ზედმიწევნით შეასრულოთ. სოკოვანი დაავადების მკურნალობა, წესისამებრ, ორ ეტაპად ტარდება.

1. პირველი, მოსამზადებელი ეტაპის მიზანი ფუფხის, გარქოვანებული ელემენტების მოცილება და მწვავე ანთებითი მოვლენების ჩაცხრობაა. საჭიროების შემთხვევაში პირველი ეტაპი ექიმმა შეიძლება თავიდან გაიმეოროს.
2. ამის შემდეგ კი მკურნალობის მეორე, ძირითადი ეტაპი იწყება, რომლის დროსაც სხვადასხვა სამკურნალო საშუალებით ან მათი კომბინაციით ცდილობენ, საბოლოოდ გაანადგურონ ან დათრგუნონ დაავადების გამომწვევი სოკო-პარაზიტები.

დროულად დაწყებული და ბოლომდე მიყვანილი მკურნალობა საუკეთესო თუ არა, კარგ შედეგს მაინც იძლევა. მთავარია, პრობლემის გამოვლენისთანავე გვერდით გადადოთ ყალბი მორცხვობა, დროულად მიმართოთ პროფესიონალ დერმატოლოგს და მისი დანიშნულება ზედმიწევნით შეასრულოთ.

ახლა კი გთავაზობთ სოკოვანი დაავადების საწინააღმდეგო რამდენიმე საშუალებას, რომლებიც ხალხურმა მედიცინამ შემოგვინახა:

1. 50 გრამ ჩვეულებრივი მაყვლის ფოთოლს დაასხით ერთი ლიტრი მდუღარე წყალი. გააგრილეთ და იხმარეთ სველი საფენების სახით (კარგია კანის ანთების, ეგზემისა და სოკოვანი დაავადების დროს) ან ყელსა და პირის ღრუში გამოსავლებად.
2. აიღეთ თანაბარი ოდენობით მაყვლის ფოთოლი, გულყვითელას ყვავილი, შვიტა, სამურაბე ვარდის ფურცლები, ცოცხანა და მუხის ქერქი. წვრილად დააქუცმაცეთ და ერთმანეთში აურიეთ. აიღეთ დაახლოებით 50 გრამი ნარევი, დაასხით ერთი ლიტრი ცივი წყალი და ხარშეთ თხუთმეტი წუთის განმავლობაში ნელ ცეცხლზე. გამოიყენეთ საფენების სახით.
3. სამკურნალო სალბის ფოთლები დაფხვენით და შეურიეთ ცხელ გამდნარ კარაქში 1:9 თანაფარდობით. მიღებული მალამო კარგია ფსორიაზის, ეგზემის, ნეიროდერმიტის, სოკოვანი და კანის სხვა დაავადებების სამკურნალოდ.
4. სოჭის ზეთით დაასველეთ დოლბანდი და 10-20 წუთით დაიდეთ სოკოთი დაზიანებულ ადგილებზე. პროცედურა ყოველდღე ჩაიტარეთ. კურსის ხანგრძლივობა 7-10 დღეა.

დაბოლოს, მას შემდეგ, რაც სამკურნალო კურსს დაასრულებთ, აუცილებელია, ლაბორატორიული გამოკვლევის მეშვეობით ერთხელ კიდევ დარწმუნდეთ სოკოს არარსებობაში, მომდევნო ერთი წლის განმავლობაში პროფილაქტიკისთვის დროდადრო გაესინჯოთ ექიმს და ზედმიწევნით დაიცვათ პირადი ჰიგიენა.

კიდევ ერთი: გაცილებით უკეთეს შედეგს მიიღებთ, თუ ხალხური და თანამედროვე სამკურნალო საშუალებების კომბინაციით იმკურნალებთ, ოღონდ ჯერ თქვენს მკურნალ ექიმს დაეკითხეთ. გვერწმუნეთ, სასურველ შედეგს მიიღებთ.