პრობლემები და ფსიქოლოგიური დახმარება
- თქვენი მონათხრობიდან გამომდინარე, თქვენი ურთიერთობა ამ ეტაპზე კრიზისს განიცდის. თუმცა, ეს სრულიადაც არ ნიშნავს იმას, რომ ურთიერთობა დაუყოვნებლივ უნდა შეწყდეს. ამასთან, მიმდინარე სიტუაციაში არსებობს დადებითი მომენტებიც. ორივეს გესმით, რომ ამ სახით რომანის გაგრძელება შეუძლებელია. იმასაც ხვდებით, განშორებისთვის მზად არ ხართ. ეს ნიშნავს, რომ გამოსავალი ორივემ ერთად უნდა იპოვოთ. უნდა გაარკვიოთ, რა მოგწონთ და რა - არა ამ ურთიერთობაში. დაელაპარაკეთ საყვარელ ადამიანს და გადაწყვიტეთ, რისი შეცვლა გსურთ. ალბათ, დაგჭირდებათ დრო იმისათვის, რომ ერთმანეთისგან დაისვენოთ და ძალები მოიკრიბოთ.
- ვსწავლობ იმისათვის, რომ ვასიამოვნო დედას... ის ყოველთვის ოცნებობდა, რომ მე მუსიკოსი გავმხდარიყავი. ბავშვობიდან ვუკრავდი ფორტეპიანოზე. მე-9 კლასის შემდეგ მუსიკალურ სასწავლებელში ჩავაბარე, მაგრამ იქ სწავლა არ მომწონს. მინდა ყველაფერს თავი დავანებო, მაგრამ დაკარგული დრო მენანება და რა თქმა უნდა, მშობლებიც ვერ გამიგებენ. როგორ მოვიქცე?
- გახსოვდეთ, რომ განათლების მიღება, პირველ რიგში, თქვენთვის არის საჭირო. ამიტომაც, თუ თქვენ მტკიცედ ხართ დარწმუნებული იმაში, რომ მუსიკა თქვენი საქმე არ არის, უმჯობესია თავი დაანებეთ. რა თქმა უნდა, დასანანია დახარჯული დრო და ენერგია, მაგრამ რაც უფრო დიდხანს გააგრძელებთ ამ საქმიანობას, მით უფრო მეტ დროს დაკარგავთ. შეეცადეთ გაარკვიოთ, რით გსურთ დაკავდეთ მომავალში, რომელი სპეციალობა გიზიდავთ, თუმცა ნუ დაანებებთ თავს სწავლას მანამ, სანამ მკაფიოდ არ განსაზღვრავთ თქვენს მომავალ მიზანსა და საქმიანობას.
- ჩემი ყოფილი ქმარი ნაკლებ ყურადღებას უთმობს ჩვენს ბიჭს. გულმოდგინედ იხდის ალიმენტს, მაგრამ ბავშვი საერთოდ არ აინტერესებს, არ კითხულობს, როგორ არის მისი საქმეები სკოლაში. მხოლოდ იმას აზუსტებს, ყველაფერი კარგად არის თუ არა. ჩვენთან თვეში ერთხელ თუ შემოივლის და მაშინაც მიჭირს მისი ატანა, მისივე გულგრილობის გამო. რა ვქნა?
- შეეცადეთ თვითონ ესაუბროთ მას ბავშვის შესახებ: თუ როგორ სწავლობს სკოლაში ან სხვა რით არის დაკავებული. პერიოდულად შეახსენეთ, რომ ბიჭი ძალიან დაემსგავსა მამას. ნუ მოგერიდებათ იმის თქმა ყოფილი ქმრისთვის, რომ ბიჭი მოწყენილია მამის გარეშე და ენატრება ის, ხშირად ითხოვს მის ნახვას. ამასთან, შეეცადეთ ამ სიტუაციაში შეინარჩუნოთ მეტი სიმშვიდე და წონასწორობა. შესაძლოა, თქვენი ყოფილი მეუღლე მიეკუთვნება იმ "მშრალი" მამაკაცების კატეგორიას, რომლებიც თავის სიყვარულს მატერიალური მზრუნველობით გამოხატავენ.
- სამსახურში დამაწინაურეს, თუმცა ფორმალურად. უფროსი არ მაძლევს ჩემი ცოდნისა და შესაძლებლობების დემონსტრირების საშუალებას. მე ისევ რიგითი სპეციალისტის მოვალეობის შესრულებას ვაგრძელებ. როგორ შევცვალო სიტუაცია?
- შესაძლოა, თქვენს უფროსს სჭირდება დრო იმისათვის, რათა დარწმუნდეს თქვენს პასუხისმგებლობაში. ახლა მნიშვნელოვანია, კარგად შეასრულოთ ყველაფერი, რასაც დაგავალებენ. შემდეგ კი შესაძლებელი იქნება უფროსთან საუბარი, მით უმეტეს, რომ თქვენ გიცნობენ, როგორც კვალიფიციურ სპეციალისტს და თქვენც უნდა იშრომოთ ანაზღაურების შესაბამისად.
- უკვე ორი წელია ვხვდებით ერთმანეთს. მეჩვენება, რომ ამ ურთიერთობას მე უფრო სერიოზულად აღვიქვამ, ვიდრე ჩემი მეგობარი ახალგაზრდა კაცი. ახლახან სტუმრად ვიყავით. საუბარი შეეხო საკითხს, თუ როდისაა უმჯობესი ოჯახის შექმნა. ჩემმა შეყვარებულმა განაცხადა, რომ მხოლოდ 30 წლის შესრულების შემდეგ სურს ცოლის მოყვანა. გამოდის, რომ მას ჩვენი ერთად ყოფნა ვერ წარმოუდგენია...
- მიზეზი შეიძლება სხვა რამ იყოს. შესაძლოა იმ კონკრეტულ სიტუაციაში არ სურდა სასაცილოდ გამოჩენილიყო, თუ განაცხადებდა, რომ დაუყოვნებლივ სურს დაქორწინება. ან ლაპარაკობდა უბრალოდ იდეალურ ვარიანტზე. ჰკითხეთ მას პირდაპირ - თქვენ ხომ უკვე ორი წელია ხვდებით ერთმანეთს.
- ჩემი მეუღლე იმდენად მაიდეალებს, შიშიც კი გამიჩნდა, რომ ოდესმე შეიძლება იმედი გავუცრუო. მგონია, რომ მას უყვარს გამოგონილი ხატება. თვლის, რომ ვარ ბევრად უკეთესი, ჭკვიანი, კეთილი, ვიდრე სინამდვილეში. მუდმივად მეშინია, ვაითუ ერთხელაც შეამჩნიოს და მიხვდეს - სრულიადაც არ ვარ ისეთი იდეალური, როგორიც მას წარმოუდგენია. როგორ მოვიქცე?
- თქვენს ქმარს უყვარხართ სწორედ თქვენ და არა იდეალური ხატი. უბრალოდ სულ სხვაგვარად აღგიქვამთ, ვიდრე თქვენ აღიქვამთ თქვენს თავს. ხედავს იმ თვისებებს, რომლებსაც თქვენ ვერ ამჩნევთ. ნუ შეეკამათებით და ნუ შეეცდებით მის გადარწმუნებას. გჯეროდეთ მისი თუნდაც თქვენდამი ასეთი დამოკიდებულების გამო და ირწმუნეთ, რომ ნამდვილად შეგიძლიათ გახდეთ უკეთესი, უფრო ჭკვიანი და უფრო კეთილი.
- ველოდები ბავშვს საყვარელი მამაკაცისგან. არსებობს ერთი პრობლემა: იგი დაქორწინებულია სხვა ქალზე. თავდაპირველად მეუბნებოდა, რომ უნდოდა ბავშვი და აპირებდა ცოლთან განქორწინებას. ახლა კი გადაიფიქრა და მაიძულებს აბორტი გავიკეთო. მე კი ბავშვზე ვოცნებობ, მაგრამ არ მინდა უმამოდ გავზარდო. უნდა მქონდეს თუ არა იმედი, რომ ჩემი საყვარელი მამაკაცი ჩემ გვერდით იქნება?
- ალბათ, თქვენი საყვარელი მამაკაცი არ განქორწინდება. თუ იგი აპირებდა ამას, ცნობამ თქვენი ფეხმძიმობის შესახებ შესაძლოა უბიძგა, ესაუბრა ცოლთან. მარტო დარჩენის შიშმა არ უნდა იმოქმედოს თქვენს გადაწყვეტილებაზე.
- შეიძლება თუ არა, მეგობარს ვუთხრა უარი თხოვნაზე? ჩემმა დაქალმა გაიგო, რომ ჩემთან სამსახურში არის ვაკანტური ადგილი და მთხოვა დავხმარებოდი. საქმე ის არის, რომ მართალია ჩემი მეგობარია, მაგრამ კარგად ვიცი მისი უპასუხისმგებლობის ამბავი და არ მინდა, მის გამო ჩემი რეპუტაცია შეილახოს. განუწყვეტლივ მახსენებს, რეკომენდაცია გავუწიო. მე კი მეუხერხულება უარის თქმა. როგორ მოვიქცე?
- თუ თვლით, რომ თქვენი მეგობარი თავს ვერ გაართმევს აღნიშნულ სამუშაოს, მაშინ არ უნდა გაუწიოთ რეკომენდაცია. იქნებ მან სცადოს ამ ვაკანტურ ადგილზე მოწყობა თქვენ გარეშე. აუხსენით, რომ მიღების შესახებ გადაწყვეტილებას თქვენ არ იღებთ და შეგიძლიათ მოაწყოთ ისე, რომ გაიაროს გასაუბრება ამ პოსტის დასაკავებლად. უფროსს კი უბრალოდ მოახსენეთ, რომ გყავთ ნაცნობი, რომელიც ეძებს ვაკანსიას საჭირო სპეციალობით. დაე, უფროსმა თვითონ გადაწყვიტოს, გამოადგება თუ არა მას ეს კანდიდატურა.
- ვერ ვმგზავრობ სამარშრუტო ტაქსით. დარწმუნებული ვარ, რომ ავარიაში მოვყვები, რადგანაც შევსწრებივარ ან ტელევიზიით მინახავს სამარშრუტო ტაქსით ავარიის არაერთი შემთხვევა. შესაძლებელია თუ არა ამ შიშის გადალახვა?
- ტრანსპორტის არც ერთი სახეობა არ არის დაზღვეული ავარიისგან. შეეცადეთ, აიძულოთ თავი, რომ სამარშრუტო ტაქსით იმგზავროთ. გამოიყენეთ უსაფრთხოების ზოგიერთი ზომა. დაჯექით სალონში მძღოლის უკან და ხელი მოჰკიდეთ სახელურს.