ჟურნალის რედაქცია

სტომატიტის დროს გამოიყენეთ მუხის ქერქი

ხშირად მაქვს სტომატიტი. მშველის მუხის ქერქის ნაყენი, რომელიც ასე მზადდება:

• 1 სავსე ჩაის კოვზ მუხის დაქუცმაცებულ ქერქს დაასხით 1 ჭიქა წყალი, 20 წუთი ადუღეთ ნელ ცეცხლზე, შეფუთეთ, გააჩერეთ 2 საათი, გაფილტრეთ და ივლეთ პირში დღეში 2-3-ჯერ.

ასევე მინდა შემოგთავაზოთ ავიტამინოზის სამკურნალო საშუალება, რადგან სტომატიტის გახშირების მიზეზი ვიტამინების ნაკლებობაც ყოფილა:

• ერთმანეთში კარგად აურიეთ 2 ჩაის კოვზი წითელი მოცვის ნაყოფი, 3 ჩაის კოვზი ჭინჭრის ფოთოლი და 3 ჩაის კოვზი ასკილის ნაყოფი (ყველაფერი დააქუცმაცეთ). 4 ჩაის კოვზ ამ ნარევს დაასხით 1 ჩაის ჭიქა მდუღარე წყალი, 3-4 საათით დადგით, გაფილტრეთ და სვით თითო ჭიქა 3-4-ჯერ დღეში.

დაჟეჟილობას მოგიშუშებთ

ამას წინათ ჩემი შვილი შინ ნაჩხუბარი დაბრუნდა. მთელი სხეული დალურჯებული ჰქონდა. ჩვენ სოფლად ვცხოვრობთ, აფთიაქამდე კარგა შორია. უცბად გამახსენდა დედაჩემისგან ნასწავლი შინაური წამლის რეცეპტი, მაშინვე ვსინჯე და საუკეთესო შედეგი მივიღე. მინდა, ეს წამალი თქვენი ჟურნალის მკითხველსაც ვასწავლო:

• აიღეთ გიორგელას (ქათმისკუჭას) ოთხი ახალამოღებული ფესვი, კარგად გარეცხეთ, ჩაუშვით 1 ლიტრ ადუღებულ წყალში და ადუღეთ 20 წუთის განმავლობაში. ღრმა სისხლჩაქცევების დროს სვით თითო ჭიქა 20 წუთში ერთხელ, სანამ არ გათავდება, ხოლო შედარებით ზერელე სისხლჩაქცევების დროს მოიბანეთ ეს ადგილები თბილი ნახარშით და შეიხვიეთ. პროცედურა გაიმეორეთ დღეში სამჯერ.

თუ კბილი ხშირად გტკივათ

კბილები ჩემი სატკივარია. ჯერ დედაჩემს დავყავდი სტომატოლოგებთან, მერე უკვე თავად გახლდით მათი მუდმივი სტუმარი... თუკი რამ კბილის ტკივილის წამალი არსებობს, არც ერთი არ დამიტოვებია უყურადღებოდ. უამრავი ხალხური რეცეპტიც მოვაგროვე. აი რამდენიმე მათგანი:

• კბილის ტკივილს სწრაფად აცხრობს გამხმარი მუხის ქერქის ნახარშის პირში ჩაგუბება. ღრძილების ტკივილისთვის ხომ ეს ნახარში მისწრებაა. კარგი იქნება, თუ შიგ ცოტა ბერთოლეს მარილსაც გაურევთ.
• აიღეთ წვრილად დაჭრილი ჟოლოსა და პიტნის ფოთლები, დაასხით 30 გრამი ღვინის ძმარი და დააყენეთ მინის ჭურჭელში სამი დღით. ამის შემდეგ გაწურეთ და პირის ღრუში გამოივლეთ.
• აიღეთ სალბი, დაასხით მდუღარე წყალი და დააყენეთ. თბილ-თბილი ნაყენი ხშირად ივლეთ პირის ღრუში. გაიჩერეთ დიდხანს.
• გამოხრულ კბილში ჩაიდეთ დინდგელის ბურთულა - შესაძლოა, აღარასოდეს აგტკივდეთ.

ფიბრომიომას კიტრის ფოთლებით ვუმკურნალე

რამდენიმე წლის წინ ქალური პრობლემების გამო მივმართე გინეკოლოგს, რომელმაც საშვილოსნოს ფიბრომიომის დიაგნოზი დამისვა. მიომა, მართალია, დიდი არ ყოფილა, მაგრამ მკურნალობა ნამდვილად სჭირდებოდა. ჩვენს მიწა-წყალზე ხარობს უამრავი მცენარე, რომელიც ქალმა შეიძლება ჯანმრთელობის შესანარჩუნებლად გამოიყენოს. მე ამაში კიტრის ყუნწი და ფოთლები დამეხმარა.

• 1 სუფრის კოვზ წვრილად დაჭრილ კიტრის ყუნწსა და ფოთლებს დაასხით 3 ჩაის ჭიქა მდუღარე წყალი, შედგით ნელ ცეცხლზე, 5 წუთი გააჩერეთ და გადმოდგით, გააჩერეთ კიდევ 2 საათი და გადაწურეთ. ნაყენი გაყავით სამად, რომ 3 დღე გეყოთ, და მიიღეთ 2 სუფრის კოვზი ყოველ 2 საათში ერთხელ.

დაახლოებით 1 თვეში ფიბრომიომა შესამჩნევად დაპატარავდება და თუ დაავადება შორს წასული არ არის, 10-12 კვირაში შესაძლოა მთლიანად გაიწოვოს. საზოგადოდ, ფიბრომიომის მკურნალობა შეიძლება გაგრძელდეს ნახევარი წლიდან 3 წლამდე.

თუ ძალ-ღონემ გიმტყუნათ

თუ სამუშაო მუდმივ მობილიზაციას გთხოვთ, დროთა განმავლობაში შესაძლოა გამოიფიტოთ და ნერვული სისტემა, მერე კი სხვა ორგანოები და სისტემებიც დაიავადოთ. თუ დაღლილობას, ძილიანობასა და სისუსტეს უჩივით, მაგრამ დასვენებისა და გამოძინების საშუალება არ გაქვთ, მეტი ყურადღება უნდა დაუთმოთ კვებას. რაციონში შეიტანეთ რაც შეიძლება მეტი ხილი, კაკალი, თაფლი, ქიშმიში, ჭერმის ჩირი, შავი ქლიავი, ასკილი და კუნელი, აგრეთვე - თევზის ქონი, რომელიც მდიდარია D ვიტამინით. C, ა, და B ჯგუფის ვიტამინების საუკეთესო წყაროა ციტრუსები. გარდა ამისა, მოსაძლიერებლად, დაღლილობისა და ძილიანობის დასაძლევად მიიღეთ ასეთი სასმელები:

• ყოველი დღე დაიწყეთ ლიმონის, ფორთოხლის ან გრეიპფრუტის წვენით (ცხადია, იმ შემთხვევაში, თუ ციტრუსებზე ალერგია არ გაქვთ).
• ერთი სუფრის კოვზი ძახველი ჩაყარეთ გამთბარ თერმოსში, დაასხით ერთი ჭიქა მდუღარე წყალი, დააყენეთ რამდენიმე საათით, დროდადრო თერმოსი შეანჯღრიეთ. გააცივეთ, გაწურეთ. მიიღეთ 1/3 ჭიქა დღეში სამჯერ.
• ერთი სუფრის კოვზ შვრიას დაასხით ორი ჭიქა წყალი, ადუღეთ ნელ ცეცხლზე დაახლოებით ნახევარი საათი, გააცივეთ, გაწურეთ. მიიღეთ დღეში რამდენჯერმე, მცირე ულუფებით.
• ვარდკაჭაჭას ფესვები გაახმეთ და დაფქვით. ორი სუფრის კოვზი ჩაყარეთ გამთბარ ჭურჭელში, დაასხით ერთი ჭიქა მდუღარე, დააყენეთ თავდახურული და შეფუთული 40-60 წუთით, გაწურეთ. მიიღეთ 1 სუფრის კოვზი დღეში 4-5-ჯერ.
• სამლიტრიან მინის ქილაში ჩაყარეთ გარეცხილი ფიჭვის გირჩები, დააყარეთ 1 კგ შაქრის ფხვნილი, დაასხით 1 ლიტრი არაყი, დააყენეთ ბნელ, თბილ ადგილას, პერიოდულად შეანჯღრიეთ. სამი დღის შემდეგ მიღებული მოყავისფრო-მოწითალო სითხე ცალკე ჭურჭელში გადმოასხით. გირჩებს კიდევ ორჯერ დაასხით 1 ლიტრი არაყი და სამ-სამი დღის შემდეგ გადმოწურეთ. სამივე ექსტრაქტი ერთმანეთში აურიეთ. ამ სასმელს ფიჭვის ბალზამს უწოდებენ. ჩაასხით მუქ მინის ბოთლებში და შეინახეთ სიბნელეში. მიიღეთ 1 სუფრის კოვზი დღეში სამჯერ, ჭამამდე, სამი კვირის განმავლობაში.
• ლიმონითა და თაფლით შეზავებული პიტნის ჩაი სწრაფად დაგიბრუნებთ მხნეობასა და ენერგიას. სასმელი აუცილებლად ცხელი უნდა იყოს.
• ნახევარ ჭიქა მშრალ ასკილს დაასხით ნახევარი ლიტრი მდუღარე, თავზე მჭიდროდ დაახურეთ და დააყენეთ 20 წუთით. დალიეთ ჩაისავით.