როდის და რატომ ტარდება ცისტოსკოპია - მკურნალი.გე

რუბრიკები

ოჯახის მკურნალის ანონსი

იანვარი 2020

როდის და რატომ ტარდება ცისტოსკოპია

როდის და რატომ ტარდება ცისტოსკოპია
ცისტოსკოპია საშარდე გზების დაავადებათა დიაგნოსტიკის უმნიშვნელოვანესი და სადღეისოდ ფართოდ გავრცელებული მეთოდია. მეტიც, სადიაგნოსტიკო მნიშვნელობის გარდა, მას სამკურნალო დატვირთვაც აქვს, რადგან ხშირად გამოიყენება სამკურნალო-თერაპიული მანიპულაციის სახით, მაგალითად, პოლიპებისა თუ სიმსივნეების მოსაკვეთად, დაზიანებული ზედაპირის კოაგულაციისთვის, შარდის ბუშტში სამკურნალო სითხეების შესაყვანად და სხვა. ცისტოსკოპიის მნიშვნელობასა და ჩვენებებზე გვესაუბრება თბილისის სახელმწიფო სამედიცინო უნივერსიტეტის პირველი საუნივერსიტეტო კლინიკის ონკო-უროლოგიური მიმართულების ხელმძღვანელი - ლევან მოთიაშვილი:

- ბატონო ლევან, როდის და რომელი პათოლოგიების დროს ინიშნება ცისტოსკოპია?

- ცისტოსკოპია შარდის ბუშტის ენდოსკოპიური კვლევაა, რომლის დროსაც შარდსადენი მილის გავლით სპეციალური ხელსაწყოს,
ცისტოსკოპის დახმარებით ვიზუალურად თვალიერდება შარდის ბუშტის შიგნითა ზედაპირი.

ცისტოსკოპია უროლოგიაში ერთ-ერთ ყველაზე აუცილებელ გამოკვლევად ითვლება და შარდსადენი მილის, შარდის ბუშტისა და თირკმლის ზოგიერთი დაავადების დიაგნოსტიკისათვის გამოიყენება, მაგალითად: ქრონიკული და ინტერსტიციული ცისტიტის, შარდის ბუშტის სიმსივნეების, კენჭების, პროსტატიტის, პროსტატის ადენომისა და კიბოს, შარდ-სასქესო სისტემის განვითარების ზოგიერთი ანომალიის
სადიაგნოსტიკოდ. ცისტოსკოპია ტარდება აგრეთვე შარდის ბუშტის ტრანსურეთრული რეზექციის შემდეგ, მკურნალობის ეფექტის შესაფასებლად.

მიუხედავად იმისა, რომ ცისტოსკოპია სადიაგნოსტიკო საშუალებაა, მისი დახმარებით შესაძლებელია მთელი რიგი სამკურნალო მანიპულაციების ჩატარება: უცხო სხეულების, მცირე ზომის კონკრემენტების და სიმსივნეების მოცილება, ეროზიებისა და წყლულების კოაგულაცია, შარდსაწვეთის სტენტის ჩადგმა და სხვა.

- რა მნიშვნელობა და უპირატესობა აქვს ამ ენდოსკოპიურ მეთოდს?

- შარდ-სასქესო სისტემის დაავადებათა დიაგნოსტიკისათვის გამოიყენება კვლევის სხვა მეთოდებიც: ულტრასონოგრაფიული, რენტგენოლოგიური კვლევები, ასევე კომპიუტერული და მაგნიტურ-რეზონანსული ტომოგრაფია, მაგრამ მხოლოდ ცისტოსკოპია იძლევა იმის საშუალებას, რომ დეტალურად დათვალიერდეს და შეფასდეს შარდსადენი მილის და შარდის ბუშტის შიგნითა ზედაპირი, აუცილებლობის შემთხვევაში გაკეთდეს ბიოფსია ანთებითი თუ სიმსივნური კერიდან შემდგომი ჰისტო-მორფოლოგიური შესწავლის მიზნით.

- რა სირთულეები ახლავს მანიპულაციას, რა გართულებები შეიძლება მოჰყვეს მას?

- ანატომიური თავისებურების გამო მამაკაცებთან ცისტოსკოპია შედარებით რთული ჩასატარებელია (მამაკაცის შარდსადენი მილი დაახლოებით 6-ჯერ აღემატება სიგრძეში ქალის შარდსადენ მილს), ამიტომ მამაკაცებთან ცისტოსკოპია რეკომენდებულია ნარკოზით (ზოგადი ან სპინალური).

ადეკვატური სტერილობისა და ქირურგიული ტექნიკის დაცვის შემთხვევაში გართულებები პრაქტიკულად არ ვითარდება, თუმცა ზოგჯერ შესაძლებელია შარდსადენი მილის დაზიანება ან ინფექციური გართულებები.

- საჭიროებს თუ არა ცისტოსკოპია პაციენტის წინასწარ მომზადებას? რამდენ ხანს ყოვნდებიან პაციენტები კლინიკაში მანიპულაციის შემდეგ?

- ეს დამოკიდებულია ანესთეზიის სახეობაზე. როგორც უკვე მოგახსენეთ, მამაკაცებთან, ასევე ადვილად აღგზნებად და ფსიქიკურად გაუწონასწორებელ პაციენტებთან რეკომენდებულია ცისტოსკოპიის ჩატარება ნარკოზით.

ადგილობრივი ანესთეზიის (ადგილობრივი გაუტკივარების) დროს პაციენტი მანიპულაციამდე დაახლოებით 3-4 საათით ადრე წყვეტს საკვების მიღებას. პროცედურის ჩატარების შემდეგ კლინიკაში ყოვნდება დაახლოებით 1 საათს.

ზოგადი ანესთეზიის შემთხვევაში პაციენტი საკვების მიღებას წყვეტს 10-12 საათით ადრე, სითხის მიღებას 3-4 საათით ადრე მანიპულაციამდე, კლინიკაში კი რამდენიმე საათს ყოვნდება.

- რა არის ცისტოსკოპიის უკუჩვენება?

- შარდ-სასქესო სისტემის მწვავე ანთებითი დაავადებები, ორგანიზმის ინფექციური პროცესები, თანდართული ცხელებით და ინტოქსიკაციით, შარდსადენისა და შარდის ბუშტის ტრავმული დაზიანებები, ორსულობა, ჰემოსტაზის (სისხლის შედედების) დარღვევა.

- რა სიხშირით შეიძლება ცისტოსკოპიის ჩატარება?

- ცისტოსკოპია შესაძლებელია პრაქტიკულად ნებისმიერი ასაკის პაციენტს ჩაუტარდეს. რაიმე შეზღუდვა მანიპულაციის ჩატარების სიხშირის მხრივ არ არსებობს.
გააკეთეთ კომენტარი
კომენტარი არ გაკეთებულა
დიეტოლოგია
დიეტებზე საუბრისას მნიშვნელოვანია ოქროს შუალედის დაცვა. ყველა უკიდურეს ზომას - ცილოვან, ცხიმოვან ან რთულ ნახშირწყლოვან (ფაფები, მაკარონი) დიეტებს
ადამიანები ხშირად ჩივიან, რომ წონას ვერ იკლებენ, მიუხედავად იმისა, რომ დიეტასაც იცავენ,
ჯანსაღ კვებასა და წონის კლებას მჭიდრო კავში­რი აქვს. ოცნებობთ ჭარბი წონის მოშორებაზე,
კატეგორიის სხვა სტატიები
ათეროსკლეროზული დავადება ძირითადად ასაკოვან პირებში გვხვდება, თუმცა არ არის გამორიცხული,
ბიომარკერები ის ნივთიერებებია, რომელთა აღმოჩენაც ხდება ავადმყოფი ადამიანის ქსოვილებსა და სითხეებში ჯანმრთელი პირებისათვის
ანგიოგრაფია სისხლძარღვების რენტგენოლოგიური კვლევაა. ის სისხლძარღვების, სისხლის მიმოქცევისა და
ჩინელ მედიკოსთა აზრით, შინაგან ორგანოთა ნებისმიერი სახის პათოლოგია (ნორმიდან გადახრა) გარეგნულად გამოიხატება
დიაგნოსტიკური კვლევების უმრავლესობა ძალზე უმნიშვნელო რისკს უკავშირდება,
პნევმონიით ან ფილტვის დაზიანებით გამოწვეული სუნთქვითი ფუნქციის დარღვევა ერთ-ერთი ყველაზე საშიში და პოტენციურად
ვირუსების ნაწილაკები საათობით ინარჩუნებენ აქტივობას მშრალ, თბილ და უმოძრაო ჰაერში
ყველაზე ხანდაზმული ქალი მსოფლიოში, 116 წლის კეინ ტანაკა იაპონიაში, ფუკუოკეში ცხოვრობს.
თმა შედგება ცილისგან (კერატინი) და დამცავი თხელი ფენა კუტიკულისგან. წყლის ზემოქმედების შედეგად თმა ადვილად
საკმარისია ეს 4 ტესტი და მოსაუბრეს გაშლილი წიგნივით წაიკითხავთ - აცხადებენ ტესტის ავტორები.
+
გახდი რეკომენდებული ექიმი
თუ გსურთ ერთის გარდა რამოდენიმე კლინიკის მითითება დააწექით ღილაკს.
მკურნალის რედაქცია დაგიკავშირდებათ ტექნიკური დეტალების შესათანხმებლად
+
გახდი რეკომენდებული კლინიკა
თუ გსურთ ერთის გარდა რამოდენიმე კლინიკის მითითება დააწექით ღილაკს.
მკურნალის რედაქცია დაგიკავშირდებათ ტექნიკური დეტალების შესათანხმებლად
+
შეტყობინება წარმატებით გაიგზავნა !
მკურნალის რედაქცია დაგიკავშირდებათ ტექნიკური დეტალების შესათანხმებლად