მარიამ ფოლადაშვილი

საჭმლის მონელების მოშლა სიმპტომების ერთობლიობაა, რომლებშიც შედის მუცლის ტკივილი და დანაყრების შეგრძნება ჭამის დაწყებისთანავე. საჭმლის მონელების მოშლის სიმპტომები შეიძლება განვითარდეს დროდადრო ან ყოველდღიურად.

საჭმლის მონელების მოშლა შეიძლება საჭმლის მომნელებელი სისტემის სხვა დაავადების სიმპტომი იყოს. საჭმლის მონელების მოშლა, რომელიც არ არის სხვა დაავადებით გამოწვეული, მარტივი სამკურნალოა ცხოვრების წესის შეცვლით და მედიკამენტებით.

გამომწვევი მიზეზები:

საჭმლის მონელების მოშლა ბევრი მიზეზით შეიძლება განვითარდეს. ხშირად იგი დაკავშირებულია ცხოვრების წესთან და შეიძლება უარესდებოდეს გარკვეული საკვების, სასმლის ან წამლის მიღების შემდეგ. საჭმლის მონელების მოშლის ხშირი მიზეზებია:

• ცხიმიანი ან ცხარე საკვები;
• გადამეტებული კვება ან ძალიან სწრაფად კვება;
• ჭარბი კოფეინი, ალკოჰოლი, შოკოლადი და გაზიანი სასმელი;
• ზოგიერთი ანტიბიოტიკი, ტკივილგამაყუჩებელი და რკინის დანამატი;
• მოწევა;
• შფოთვა

საჭმლის მონელების მოშლა შეიძლება გამოიწვიოს სხვა საჭმლის მომნელებელი სისტემის პათოლოგიამ. ესენია:

• გასტრიტი;
• პეპტიური წყლული;
• ნაღვლის ბუშტის კენჭები;
• ყაბზობა;
• პანკრეასის ანთება;
• ცელიაკია;
• სისხლის მიმოქცევის შემცირება ნაწლავებში

სიმპტომები:

საჭმლის მონელების მოშლის მქონე პაციენტებში შეიძლება შეგხვდეს შემდეგი ნიშნები და სიმპტომები:

• ჭამის დროს სწრაფად დანაყრება;
• შემაწუხებელი სისავსის გრძნობა ჭამის შემდეგ;
• დისკომფორტი ან წვის შეგრძნება მუცლის ზედა ნაწილში - შეიძლება იგრძნოთ მსუბუქი ან საშუალო სიმწვავის ტკივილი მკერდის ძვალსა და ჭიპს შორის;
• შებერილობა მუცლის ზედა ნაწილში;
• გულისრევა

საჭმლის მონელების მსუბუქი მოშლა არ არის სანერვიულო. უმჯობესია მიმართოთ ექიმს, თუ დისკომფორტი ორ კვირაზე მეტხანს გაგრძელდება. დაუყოვნებლივ მიმართეთ ექიმს, თუ ტკივილი მწვავეა და თან ერთვის:

• წონაში უმიზეზო კლება და მადის დაკარგვა;
• ყლაპვის გაძნელება, რომელიც უარსდება;
• მრავალჯერადი პირღებინება;
• ზოგადი სისუსტე ან დაღლილობა

უნდა მიმართოთ სამედიცინო დახმარებას, თუ გაქვთ:

• სუნთქვის უკმარისობა;
• ოფლიანობა ან მკერდის ტკივილი, რომელიც ვრცელდება ყბის, კისრისა და მხრის არეში;
• მკერდის ტკივილი ვარჯიშის ან სტრესის დროს