სმის რეჟიმი ზაფხულში
საოფლე ჯირკვლები, თირკმელები, ფილტვები და კუჭ-ნაწლავის ტრაქტი ორგანიზმიდან წყალთან ერთად გამოყოფს წიდას. წყალი სილამაზეს უნარჩუნებს თმასა და კანს. ყოველივე ამის გამო მის ბალანსს ზაფხულში განსაკუთრებული ყურადღება უნდა მიექცეს. ეს იმას ნიშნავს, რომ წყლის სმით უნდა ავინაზღაუროთ მისი დანაკარგი და, რაც მთავარია, ყურადღება მივაქციოთ, რას ვსვამთ. გაუწყლოების ნიშანს თავად ორგანიზმი იძლევა - კანი და ლორწოვანი გარსები შრება, ადამიანს სახეზე სისხლი აწვება, უეცარი სისუსტე ეუფლება, გაღიზიანება იპყრობს, ყურადღება უქვეითდება. ყოველივე ეს ორგანიზმის დამცველობითი რეაქციაა წყლის დეფიციტზე. ორგანიზმი ამით გვანიშნებს, რომ დაირღვა მისი ჰომეოსტაზი და საფრთხე ემუქრება ქსოვილებში საკვები ნივთიერებების ოპტიმალურ კონცენტრაციას. გამძაფრებული წყურვილის შეგრძნების საფუძველზე ტვინი გვაიძულებს, მივიღოთ სითხე და ორგანიზმი გაუწყლოებისგან ვიხსნათ. წყლის სადღეღამისო ნორმა სხეულის მასის ყოველი კილოგრამის 30 მლ-ზე გამრავლებით უნდა გამოვიანგარიშოთ. ამ ფორმულის თანახმად, ადამიანმა დღე-ღამეში დაახლოებით 1,5-2 ლიტრი წყალი უნდა სვას, ზაფხულში - უფრო მეტი.
როგორია წყლის სმის სწორი რეჟიმი
დილით, გაღვიძებისთანავე უნდა დალიოთ ერთი-ორი ჭიქა წყალი, აუცილებლად ოთახის ტემპერატურისა. ეს ორგანიზმს ღამით ოფლიანობისა და სუნთქვის პროცესში დაკარგული მარაგის აღდგენაში დაეხმარება. დღის განმავლობაში ნივთიერებათა ცვლის დაბალანსებისა და ფიზიოლოგიურ პროცესთა სტიმულაციისთვის აუცილებელია საათში ერთხელ ნახევარი ან ერთი ჭიქა წყლის სმა. წყალი, როგორც უკვე აღვნიშნეთ, ოთახის ტემპერატურისა უნდა იყოს. ზოგს ჰგონია რომ ცივი, ყინულიანი წყლით უფრო უკეთ მოიკლავს წყურვილს. ფიზიოლოგიური თვალსაზრისით ეს მცდარი შეხედულებაა. ცივი და, მით უმეტეს, ყინულიანი წყალი ვნებს პირ-ხახის, საყლაპავისა და კუჭის ლორწოვან გარსს. ზაფხულში გახურებული ლორწოვანის კაპილარები სიცივის გავლენით უეცარ სპაზმს განიცდის, რაც მნიშვნელოვან ანატომიურ-ფიზიოლოგიურ ცვლილებებს იწვევს. გარდა ამისა, ორგანიზმს დიდი ძალისხმევა უხდება, რომ მიღებული წყალი, ვიდრე მეტაბოლიზმის პროცესში ჩართავს, სხეულის ტემპერატურამდე გაათბოს. თუ წყურვილის მოკვლა გსურთ, ოთახის ტემპერატურის წყალი უნდა სვათ, თუ კალორიების დაწვა გაქვთ განზრახული - ოდნავ უფრო გრილი, მაგრამ არავითარ შემთხვევაში - ცივი ან ყინულიანი.
წყალი თუ ტკბილი სასმელები
გახსოვდეთ: ზაფხულში, როდესაც წყალზე ორგანიზმის მოთხოვნა ასე იმატებს, მარაგი აუცილებლად ამ სითხითვე უნდა შეივსოთ და არამც და არამც - ტკბილი გაზიანი სასმელებით ან ლუდით. ტკბილი და გაზიანი სასმელების უმრავლესობა შეიცავს ნივთიერებებს, რომლებიც ქსოვილებში სითხის შეკავებას იწვევს. თუ ზომიერად მიიღებთ, მაგალითად, დღე-ღამეში არა უმეტეს 500 მლ-ისა, არაფერს გავნებთ. პრობლემა ის არის, რომ პაპანაქება სიცხეში ზომიერების შენარჩუნება შეუძლებელია, ბევრი ლიტრობით სვამს გამაგრილებელ სასმელებს. ტკბილ გაზიან სასმელებს დამატებული აქვს საგემოვნო სტიმულატორები, რომლებიც ასტიმულირებს გემოვნების რეცეპტორებს, ხელოვნურად აძლიერებს წყურვილს და სრულიადაც ვერ ავსებს ორგანიზმის წყლის მარაგს. ერთადერთი ალტერნატივაა ჩვეულებრივი წყალი, სურვილისამებრ, ლიმონით ან პიტნით. ზაფხულში სასურველია უგაზო მინერალური წყლების სმაც. რა თქმა უნდა, ზომიერად. კარგია მწვანე ჩაი, ბურახი, ახალგამოწურული ნატურალური წვენები. მინერალებისა და მიკროელემენტების შესანარჩუნებლად და ორგანიზმში მათი მარაგის შესავსებად ჟოლოს, მაყვლის, მოცხარისა თუ ქაცვის ნაყოფს ნუ მოხარშავთ - დაასხით მდუღარე წყალი, გააჩერეთ 2-3 საათით და გაგრილებული დალიეთ. ყავა და, საზოგადოდ, კოფეინის შემცველი სასმელები შარდმდენი ეფექტით გამოირჩევა, ასე რომ, ორგანიზმს არათუ ვერ ავსებს წყლით, ართმევს კიდეც მარაგს, რაც ზაფხულში განსაკუთრებით არასასურველია. არც ცივი ლუდი კლავს წყურვილს, ეს მხოლოდ მოჩვენებითი ეფექტია. პირიქით, ასტიმულირებს გამომყოფი სისტემის ფუნქციას და შარდთან ერთად წყლის დამატებითი რაოდენობის კარგვას უწყობს ხელს. ამრიგად, ორგანიზმის წყლის მარაგი არათუ ვერ ივსება, ლუდის წყალობით კიდევ უფრო მცირდება. ალკოჰოლური სასმელების სმა პაპანქება სიცხეში კიდევ უფრო სარისკოა. ბახუსისთვის დამახასიათებელ უსიამოვნო სიმპტომებთან ერთად გაუწყლოებასაც იწვევს. ზაფხულში ალკოჰოლური სასმელების მიღებით სერიოზულ დარტყმას აყენებთ გულ-სისხლძარღვთა სისტემას. გულის პათოლოგიათა განვითარების ალბათობა ამ დროს ათჯერ იზრდება. ასე რომ, თამამად სვით წყალი, სხვა სითხის მიღებისას კი დაფიქრდით, რამდენის დალევას აპირებთ და რა სარგებლობას მოუტანს ის თქვენს ორგანიზმს.
