როგორ დავიცვათ თავი - მკურნალი.გე

ეკა ჭავჭავაძე

მწერების დასაფრთხობად სპეციალური საშუალებები - რეპელენტები გამოიყენება, მათ გასანადგურებლად კი - ინსექტიციდები.

რეპელენტების ხმარების წესები ზედმიწევნით უნდა დავიცვათ - არასწორი ექსპლუატაციის ან მაღალი კონცენტრაციით გამოყენების შედეგად შესაძლოა ნერვული სისტემა, ღვიძლი ან თირკმელები დავიზიანოთ. ოთახში, სადაც 3 წლამდე ასაკის პატარები იმყოფებიან, რეპელენტების გამოყენებას არ გირჩევთ. რაც შეეხება მოზრდილებს, მათთვის მწერების საწინააღმდეგო პროფილაქტიკური საშუალებების გამოყენება ნებადართულია ნებისმიერი ფორმით, კანზე წასმა იქნება ეს, ოთახში აეროზოლის სახით გაშვება თუ კვამლის ხრჩოლება.

• ბუზებმა თავი რომ არ მოგაბეზრონ

1. შინ დიდხანს არ გააჩეროთ ნაგვის ნარჩენები.
2. ერიდეთ ნაგავსაყრელებს და სააგარაკო ადგილის შერჩევისას გაითვალისწინეთ მის ირგვლივ არსებული გარემოს სანიტარული მდგომარეობა.
3. სუფთად შეინახეთ საკვები და ჭურჭელი. ნუ დატოვებთ მათ უთავსახუროდ.
4. ხშირად დაალაგეთ ბინა სველი წესით.
5. გამოიყენეთ მწებავი ქაღალდი ან სპეციალური აეროზოლი.
6. თუ ბუზებს მარტივი ხერხებით ვერ უმკლავდებით, შეგიძლიათ, გამოიყენოთ პროფილაქტიკური ინსექტიციდი - სრულიად უვნებელი გვირილის პრეპარატი, რომელიც, ანალოგიური საშუალებებისგან განსხვავებით, ერთიანად სპობს არა მხოლოდ დაფრთიანებულ მავნებლებს, არამედ მათ ჭუპრებსა და მატლებსაც კი. მისი მისხურება შესაძლებელია როგორც კარ-ფანჯრებზე, სანაგვე ყუთებზე, საყოფაცხოვრებო ნივთებზე, ისე შალეულზე, ბეწვეულსა და მატყლის ლოგინზე. ამგვარად, იგი მხოლოდ ბუზებისგან კი არა, ქსოვილების დაუძინებელი მტრისგან - ჩრჩილისგანაც საიმედოდ დაგიცავთ.

• პედიკულოზის საწინააღმდეგოდ

თანამედროვე ფარმაკოლოგიური მრეწველობა პედიკულოზის საწინააღმდეგო უამრავ პროფილაქტიკურ თუ სამკურნალო საშუალებას გვთავაზობს. ისღა დაგვრჩენია, ამ არსენალიდან მაქსიმალური ეფექტის მქონე საშუალება შევარჩიოთ. კარგი იქნება, შინ ყოველთვის იქონიოთ ტილების საწინააღმდეგო პროფილაქტიკური საპონი. გამოგადგებათ ჩვეულებრივი ღვინის 3-%-იანი ძმარიც - იგი პატარას დაბანის შემდეგ უნდა გადაავლოთ თმაზე. ძმარი აზიანებს და შლის წილის ქიტინოვან საფარველს, რომლითაც იგი თმის ღერს ემაგრება. ასე რომ, დაუპატიჟებელ სტუმარს პატარას თმაში ინტენსიური გამრავლების საშუალება აღარ მიეცემა.

• მუნის პროფილაქტიკა

1. დაავადებულის დაუყოვნებლივ მკურნალობას, რათა არ მოხდეს ინფექციის გავრცელება.
2. დაავადებულის თეთრეულისა და ტანსაცმლის დეზინფექციას.

მიზანშეწონილია დაავადებულის იზოლაცია მკურნალობის დასრულებამდე.

მუნის ტკიპას სეზონური აქტიურობა და პასიურობა არ ახასიათებს. მისი გააქტიურება უფრო მიგრაციულ პროცესებს უკავშირდება, რაც ზაფხულობით განსაკუთრებით ხშირია, ამიტომ მუნის საწინააღმდეგო პროფილაქტიკურ ღონისძიებებს განსაკუთრებული ყურადღება წელიწადის ამ დროს უნდა მივაქციოთ.

• ქვეწარმავლები რომ არ მომრავლდნენ

1. საგულდაგულოდ დაასუფთავეთ საცხოვრებელი ადგილები.
2. შენობების ირგვლივ 15-20 მეტრის რადიუსზე აუცილებლად მოთიბეთ ბალახი.
3. ქვეწარმავლები მღრღნელებით სავსე ადგილებს ეტანებიან, ამიტომ ებრძოლეთ ვირთხებს.
4. აუცილებელია ორმოებისა და წყლით სავსე თხრილების ამოვსება და ამოშრობა.
5. გულგრილად ნუ ჩაუვლით დატბორილ სარდაფებს, სამშენებლო მასალების გროვებს, დიდი ხნის მანძილზე დაუსუფ¬თავებელ სანაგვე ბუნკერებს. მათი აღმოჩენისას დროულად მიმართეთ სათანადო უწყებებს, რომლებსაც მათი ლიკვიდაცია ავალიათ.

• მწერის კბენის თავიდან ასაცილებლად

1. ნუ ისეირნებთ ფეხშიშველი ბაღებსა და ბოსტნებში.
2. ნუ მოკრეფთ ხილსა და ყვავილებს ისეთი ადგილებიდან, რომლებიც ხშირი აყვავებული ტოტებითა და ტკბილი ნაყოფით არის დაფარული - გამორიცხული არ გახლავთ, იქ რომელიმე აგრესიულ მწერს ჰქონდეს ბუდე.
3. გახსოვდეთ: ბზიკისა და კრაზანის მოკვლისას დაზიანებული შხამიანი ტომსიკიდან გამოიყოფა ქიმიური ნივთიერება, რომლის სუნს მოკლულის თანამოძმეები უმალვე შეიგრძნობენ და გაშმაგებულნი მიიწევენ "ბრძოლის ველისკენ". ასე რომ, მაშინვე მოსცილდით "მკვლელობის" ადგილს, თორემ დაღუპულის მეგობართა იერიშის მოგერიება მოგიწევთ.
4. იქ, სადაც ბევრი მწერია, გამოიყენეთ რეპელენტები, ატარეთ გრძელსახელოიანი ზემოთა ტანსაცმელი და გრძელტოტებიანი შარვლები.
5. საღამოობით ნუ გააღებთ ფანჯრებს, თუ ოთახში სინათლე გინთიათ - ეს მწერებს იზიდავს.
6. შინ და აგარაკზე სავენტილაციო მილებსა და ფანჯრებზე ნუ დაგავიწყდებათ დამცავი ბადეების აკვრა.