მსოფლიოს სპა-კურორტების ტოპათეული
სპა-კურორტები შეფასდა რამდენიმე კრიტერიუმის მიხედვით: კომფორტი, მომსახურების ფართო ასორტიმენტი, ინტერიერი და ეკოლოგია.
1. Clinique la prairie, შვეიცარია
ეს ცენტრი 1932 წელს ამოქმედდა. ის ჟენევის ტბასა და შვეიცარიის ალპებს შორის არსებულ მსოფლიოს ერთ-ერთ ულამაზეს კუთხეში, კურორტ მონტრეში მდებარეობს.
Clinique la prairie ერთადერთი კურორტია ევროპაში, რომელიც პაციენტს ესთეტიკური ხასიათის სრული კომპლექსის მომცველ სამედიცინო სამსახურს სთავაზობს. იგი განთქმულია ეფექტური დიაგნოსტიკით, ექსკლუზიური კოსმეტიკური მომსახურების ფართო სპექტრით, პლასტიკური ქირურგიით, გამაახალგაზრდავებელი პროგრამით.
კლინიკაში არის beautymed-განყოფილება. ამ განყოფილების პროგრამები სპეციალური მანუალური მასაჟისა თუ ელექტროსტიმულაციის მაღალტექნოლოგიური აპარატების, რბილი ლაზერისა და დრენაჟების კომბინირებით უზრუნველყოფს სისხლის მიმოქცევის გაუმჯობესებას, ორგანიზმის გამაგრებას, კუნთების დაძაბულობის მოხსნას. კლინიკის კონცეფციაა “ჯანმრთელობა, სილამაზე, კარგი განწყობილება”.
2. mayr & more, კარინთია, ავსტრია
აქ ყველა ახალჩამოსულთან მუშაობის სქემა ერთნაირია: გამოკვლევა, პრობლემებისა და დისფუნქციის გამოვლენა, მკურნალობისა და პირადი დიეტის შედგენა. ეს სპა ცნობილმა მეცნიერმა ფრანც მაიერმა დააარსა, ამიტომ აქ მკურნალობისადმი მიდგომა, რა თქმა უნდა, სავსებით მეცნიერულია. ყველა, ვინც აქ გაიარა კურსი, იფიცება, რომ ასე კარგად არასდროს უგრძნია თავი და არც ასეთი მოხდენილი და ჯანსაღი იერი ჰქონია!
3. ananda spa, ჰიმალაი, ინდოეთი
ეს გახლავთ აიურვედის მოყვარულთათვის განკუთვნილი კლინიკა. მაჰარაჯის სასახლის ტერიტორიაზე განთავსებული სპა-კურორტ ananda spa Himalaya-ს სტუმრები თავს რაჯებად გრძნობენ. აქ, მყუდროების, ზრუნვის, სიჩუმისა და სიმშვიდის ატმოსფეროში, სავსებით გაჯანსაღდებით და ადვილად მიაღწევთ სხეულისა და სულის ჰარმონიას. აქ ხომ მკურნალობის ძირითად კომპონენტებად იოგა, მედიტაცია და ძველინდური მეცნიერება აიურვედა მიიჩნევა. მიამატეთ ამას მდინარე განგის სანაპიროს უნიკალური ზომიერი კლიმატი, სუფთა ჰაერი, არაჩვეულებრივი პეიზაჟები და იდუმალი ჰიმალაი, ყვავილებისა და ტყის სურნელი - ეს ყველაფერი ადამიანს ჯანმრთელობისა და ძალ-ღონის აღდგენაში ეხმარება.
აიურვედა - ეს არა მარტო კომპლექსური მიდგომაა, არამედ კვების განსაკუთრებული წესებიც.
მათთვის, ვისაც სურს მთლიანად ჩაეფლოს აიურვედის სამყაროში, შემუშავებულია სპეციალური სპა-მენიუ, რომელიც გამოირჩევა არომატული ბალახებით, დიეტური ხორცით და თევზით დამზადებული ბოსტნეულის კერძების მრავალფეროვანი არჩევანით.
4. the source, como shambhala estate, ბალი
ეს არასტანდარტული ბალიური კურორტია. კომპლექსი მდებარეობს მდინარე აიუნგის სანაპიროზე, ქალაქ უბუდის მახლობლად, რომელიც ხელოვნებისა და ხელოსნების უძველესი ცენტრი გახლდათ, და ოკეანესთან არავითარი კავშირი არ აქვს. სასტუმრო თავის სტუმრებს არა მარტო არაჩვეულებრივ კომფორტს, არამედ განსაკუთრებულ ფილოსოფიასაც სთავაზობს. მისი არსი საკუთარ თავსა და ბუნებასთან ჰარმონიაში ცხოვრებაა.
უნიკალურ სპა-ცენტრში საკუთარ მაგალითზე დაინახავთ, რა ეფექტურია ჯანმრთელობის ტრადიციული აღმოსავლური საიდუმლოებები. აქვე შესაძლებელია გამოცდილი ინსტრუქტორის დახმარებით იოგასაც მიჰყოთ ხელი.
სპა-ცენტრი გთავაზობთ: სხვადასხვაგვარ მასაჟს (ბალიურს, ტაილანდურს, ინდურს), რეფლექსოთერაპიას, სხეულისა და სახის მოვლის პროგრამებს (აბაზანებს, ნიღბებს, შეფუთვას, აიურვედას, იოგას), საუნასა და ჯაკუზის.
5. chiva-som international health resort, ტაილანდი
ჩივა-სომის საერთაშორისო ცენტრი - ეს თანამედროვე მსოფლიო მედიცინის უახლესი მიღწევებისა და ბალახებზე დაფუძნებული მკურნალობისა და გაჯანსაღების ოპტიმალური მეთოდების თანხვედრაა. ის შედის small luxury hotels of the world-ის ჯაჭვში. ამ სასტუმროს ტიპის სპა-ცენტრს აქვს საკუთარი პლანტაცია, სადაც მოჰყავთ კოსმეტიკისთვის აუცილებელი სანელებლები. ცენტრის სახელწოდება ასე ითარგმნება: “სამოთხე ხმელეთზე”.
ჩივა-სომის სპეციალისტები საიდუმლოდ ინახავენ გაახალგაზრდავების, წონის დაკლების, მავნე ჩვევებისგან თავის დაღწევის, სხვადასხვაგვარი თერაპიის მეთოდებს.
კურორტის ვრცელი ნაკრძალი ტერიტორია, რომელიც მდიდარია უჩვეულო მცენარეებით, სუპერთანამედროვე აღჭურვილობა, პერსონალის პროფესიონალიზმი და გაჯანსაღების ექსკლუზიური მეთოდები - ეს მხოლოდ მცირე ნაწილია იმისა, რისი მიცემაც შეუძლია სტუმრებისთვის მსოფლიოს ამ ერთ-ერთ საუკეთესო გამაჯანსაღებელ ცენტრს.
6. mii amo spa at enchantment resort, არიზონა, აშშ
სასტუმრო Enchantment, რომელიც წითელი მთებით არის გარემოცული, ბოინტონის კანიონში, არიზონის მთების შუაგულში მდებარეობს. სასტუმროს აქვს არაჩვეულებრივი სპა-ცენტრი, რომელიც მოიცავს ღია აუზს წითელი კლდეების ხედით, გამოქვაბულში არსებულ ბუხრიან დახურულ აუზს, საუნას, თურქულ აბანოს, ჯაკუზისა და ფიტნესდარბაზს.
ცენტრის სიამაყეა ნატურალური პროდუქტების კოსმეტიკური პროცედურები. სხეულისთვის განკუთვნილი სკრაბები, კოსმეტიკური ნიღბები და შეფუთვისთვის განკუთვნილი პრეპარატები მნახველთა თვალწინ მზადდება.
სპა-ცენტრს მსოფლიო აღიარება მოუტანა ნატურალური რძისა და თაფლის აბაზანებმა. ცხელ რძეში იხსნება თაფლი, შემდეგ აბაზანა ადამიანისთვის მისაღებ ტემპერატურამდე გრილდება და ერთ-ერთი ყველაზე უჩვეულო ატრაქციონი რელაქსაციისთვის მზადაა.
აქვე ატარებენ სხვადასხვანაირ მასაჟს, სხეულისა და სახის მოვლის პროცედურებს, გთავაზობენ დიეტოლოგის კონსულტაციას, მედიტაციას, ჰიდროთერაპიას და სხვა სპეციალურ პროგრამებს.
7. the body holiday, სენტ-ლუსია
ეს გახლავთ არაჩვეულებრივი სამყარო, სადაც შეგიძლიათ მიიღოთ სიამოვნება, გაახალგაზრდავდეთ და მოდუნდეთ. და ეს ყველაფერი თქვენს საყვარელ სპორტის სახეობებთან, ჯანსაღ კვებასთან, ვარჯიშსა და პირადი მომსახურების პროგრამებთან არის შერწყმული. ამ სპა-ცენტრში დამუშავებულია და აქტიურად ინერგება The body holiday პრინციპით დასვენების უნიკალური კონცეფცია - სტრესისა და დაღლილობის მოხსნის, გაახალგაზრდავებისა და ძალ-ღონის აღდგენის ერთ-ერთი ყველაზე ეფექტური მეთოდი.
აქ ყველა სტუმარს ინდივიდუალურად უდგებიან. გამაჯანსაღებელი მეთოდების ვრცელ ჩამონათვალში უნიკალური მასაჟები, იოგა და აღმოსავლური ტანვარჯიში, ტაი-ჩი შედის.
8. cal-a-vie, კალიფორნია, აშშ
ეს სამკურნალო-გამაჯანსაღებელი კომპლექსი წარმოუდგენელი სილამაზის ბუნებაშია ჩაფლული, სადაც ადამიანი ნამდვილად დაისვენებს, მოდუნდება და სასიცოცხლო ძალით აღივსება. ცენტრი სტუმრებს სხეულისა და სულის გაჯანსაღების ოცზე მეტ პროგრამასა და კლასს სთავაზობს, რომლებიც სამკურნალო პროცედურებს, კოსმეტიკურ პროცედურებს და ნემსოთერაპიას მოიცავს. აქაური პროგრამების ნუსხაშია ფიტნესმომსახურება და ლათინური ცეკვებიც. ტარდება ორგანიზმის სამკურნალო და გასაწმენდი პროცედურების კომპლექსი. გაკვეთილები ეფუძნება იოგას, ციგუნისა და მედიტაციის უძველეს ხელოვნებებს.
9. terme di saturnia spa & golf resort, იტალია
terme di saturnia spa & golf resort სპა-სასტუმროა, რომელიც ქალაქ სატურნიის მახლობლად მდებარეობს. გამაჯანსაღებელი ცენტრი სტუმრებს ჯანმრთელობისა და სულიერი წონასწორობის აღსადგენად ხუთ ძირითად მიმართულებას სთავაზობს: ჰიდროთერაპიას, კოსმეტოლოგიას, ანტისტრესთერაპიას, დიეტასა და ფიტნესს.
terme di saturnia თერმული აბაზანებია, რომელთა მისაღებადაც აქ წელიწადის ყოველ დროს მსოფლიოს სხვადასხვა კუთხიდან უამრავი ხალხი ჩამოდის. აქ არსებულ წყალს ზამთარ-ზაფხულ ერთი და იგივე ტემპერატურა აქვს.
10. spa village, pangkor laut resort, მალაიზია
უნიკალური კუნძული მალაიზიის ნახევარკუნძულის დასავლეთ სანაპიროზე, ზურმუხტისფერ უბეში მდებარეობს და გარშემორტყმულია უძველესი ტროპიკული ტყით. ეს სპა-ცენტრი თავისი განუმეორებელი ატმოსფეროს წყალობით არაერთხელ შესულა მსოფლიოს საუკეთესო კურორტების ნუსხაში. აქ შემოგთავაზებენ ტალახის აბაზანებს და სხვადასხვა ტიპის მასაჟს - მალაიურს, ტაილანდურს, შიაცუს. აქვეა საუნა და ფიტნესცენტრი.
უძველესი ცოდნა, ულტრათანამედროვე ტექნოლოგიები და უნიკალური სამკურნალო მცენარეები ცენტრის სტუმრებს ჯანმრთელობის აღდგენას, ორგანიზმის გაჯანსაღებას, სხეულის მოვლას უადვილებს.