მსოფლიოს საუკეთესო კლინიკების ტოპათეული
1. ბარმუნგრადის საერთაშორისო კლინიკა, ბანგკოკი
ეს გახლავთ სამხრეთ-აღმოსავლეთ აზიის არა უბრალოდ უდიდესი კლინიკა, არამედ მთელი “ჯანმრთელობის ქალაქი”, რომელიც 1980 წელს არის დაარსებული. 2002 წელს ამ კერძო სამკურნალო დაწესებულებამ ამერიკული სტანდარტის JCL-ის აკრედიტაცია მიიღო. სადღეისოდ აქ ამერიკული და ევროპული განათლების მქონე 945 ექიმი მუშაობს, მკურნალობს მილიონი პაციენტი (მათ შორის 400 ათასი უცხოელი სხვადასხვა კონტინენტიდან).
აქ განსაკუთრებით კარგად არის განვითარებული მედიცინის ისეთი დარგები, როგორებიცაა კარდიოქირურგია და ორთოპედია (სულ 55 სახეობის სამედიცინო საქმიანობა ხორციელდება). ტაილანდის ცენტრში მდებარე ამ საავადმყოფოს სახელი ითარგმნება როგორც “ადამიანებზე ზრუნვა”.
2. მატილდას საერთაშორისო ჰოსპიტალი, ჰონკონგი
ბანკირ გრავილ შარპის ფულით აშენებულმა ამ ჰოსპიტალმა პაციენტების მიღება 1907 წელს დაიწყო. თავდაპირველად აქ ემიგრანტებს მკურნალობდნენ, სადღეისოდ კი ეს გახლავთ კლინიკა, სადაც მსოფლიოს მრავალი კუთხიდან ჩადიან პაციენტები. მატილდას ჰოსპიტლის მრავალრიცხოვანი პერსონალი წყნარი ოკეანის რეგიონში ყველაზე მაღალ ანაზღაურებას იღებს. ყოველწლიურად უდიდესი თანხები გამოიყოფა საავადმყოფოს შემდგომი განვითარებისთვის.
/* (c)AdOcean 2003-2021, Advertline.https:mkurnali.ge.mkurnali zones.________ _____ */
ado.slave('adoceanadvertlinegelpmmhkfobb', {myMaster: 'gC_g7BxQlx9UWDeCK7yaEdkgIoxg2l6o6JUmNs2rvgn.i7' });
ამ სამკურნალო დაწესებულებამ განსაკუთრებით გაითქვა სახელი მაღალკვალიფიციური ონკოლოგიური და ხელოვნური განაყოფიერების სერვისებით. საავადმყოფოსთან მუშაობს საქველმოქმედო ფონდები: ბავშვთა განვითარების ფონდი და მატილდას სახელობის საბავშვო ფონდი.
3. პარკვეის კლინიკა, სინგაპური
პარკვეის კლინიკა უდიდესი ცენტრია, სადაც მედიცინის თითქმის ყველა მიმართულებაა თავმოყრილი. საავადმყოფოს ბაზაზე ფუნქციობს: ამბულატორიული ქირურგიის ცენტრი, თვალის დაავადებათა ცენტრი, ღვიძლის ტრანსპლანტაციის ცენტრი, ონკოლოგიური ცენტრი, ჰემატოლოგიისა და ღეროვანი უჯრედების ცენტრი.
აქ განსაკუთრებით მაღალ დონეს მიაღწია ავთვისებიანი ახალწარმონაქმნების მკურნალობამ.
პარკვეის კლინიკაში მომუშავე ყველა ექიმს სტაჟირება ამერიკაში, ევროპასა და იაპონიაში აქვს გავლილი. დაწესებულება თანამედროვე სამკურნალო და სადიაგნოსტიკო აპარატურით არის აღჭურვილი.
4. ჯონს ჰოპკინსის ჰოსპიტალი, ბალტიმორი, მერილენდის შტატი
ეს გახლავთ პირველი უდიდესი ამერიკული კლინიკა, რომელმაც ფაქტობრივად აშშ-ის მთელ ჯანდაცვის ორგანიზაციას დაუდო საფუძველი. ბოლო ოცი წელია, ის ატარებს აშშ-ის ნომერ პირველი საავადმყოფოსა და მსოფლიოს ათიდან ერთი საუკეთესო კლინიკის საპატიო სტატუსს.
ჰოსპიტალში განსაკუთრებით მძლავრადაა განვითარებული მედიცინის ისეთი მიმართულებები, როგორებიცაა ბავშვთა ფსიქიატრია, კარდიოქირურგია, პედიატრია, ენდოკრინოლოგია, გინეკოლოგია, უროლოგია, ნეიროქირურგია.
2008 წელს აქ ჩატარდა ჰემისფერექტომიის უნიკალური ოპერაცია - რასმუსენის ენცეფალიტით დაავადებულ 6 წლის გოგონას თავის ტვინის ნახევარი ამოჰკვეთეს. ამ ოპერაციის შემდეგ პაციენტი გადარჩა, მეტიც - მთლიანად შეინარჩუნა აზროვნების უნარი და პიროვნულობა.
5. ამერიკული ჰოსპიტალი, პარიზი
ეს საავადმყოფო 1906 წელს გაიხსნა საფრანგეთში მცხოვრები ამერიკელების სამკურნალოდ. ამჟამად ეს გახლავთ უდიდესი კერძო საერთაშორისო კლინიკა, რომელიც აკრედიტებულია JCL (აშშ) და HAS (საფრანგეთი) სტანდარტებით. ამერიკულ ჰოსპიტალში დღესდღეობით სხვადასხვა სპეციალობის 400 ექიმი მუშაობს, რომელთაც განათლება ევროპასა და ამერიკაში აქვთ მიღებული. ფუნქციონირებს 197-საწოლიანი სტაციონარი, დღის სტაციონარი, ამბულატორიული განყოფილება. დსთ-ს ქვეყნების საქმიანი ბომონდისთვის მეტად პოპულარულია აქ ჩატარებული CHECK-UP დიაგნოსტიკის ერთდღიანი პროგრამები.
6. უელსის პრინცის ჰოსპიტალი, სიდნეი
ეს კლინიკა დაარსდა 1852 წელს საქველმოქმედო საზოგადოების ხელშეწყობით, რომელიც უსახლკარო ბავშვებს მფარველობდა. 1915 წელს მოხდა მისი სამხედრო ჰოსპიტლად ტრანსფორმირება, ხოლო თანამედროვე სტატუსი კლინიკამ 1953 წელს მიიღო. დღესდღეობით ეს გახლავთ მსოფლიოში უმძლავრესი ონკოლოგიისა და ტრანსპლანტოლოგიის ცენტრი. აქვე ფუნქციობს პერინატალური ცენტრიც (ორსულების, მშობიარეების და ახალშობილების დახმარება). 1984 წელს აქ წარმატებით ჩატარდა კიდურებზე თითების გადანერგვის პირველი ოპერაცია. 1994 წელს აქვე შეიქმნა ენდოსკოპიის უმსხვილესი ცენტრი აზიაში.
7. მეიოს კლინიკა, აშშ
სინამდვილეში ეს გახლავთ კლინიკების მთელი ქსელი, რომლებიც განლაგებულია მინესოტის, ფლორიდისა და არიზონის ტერიტორიებზე. მას ჯონს ჰოპკინსის ჰოსპიტლის შემდეგ მეორე ადგილი უკავია აშშ-ში პაციენტთა მომსახურების ხარისხის მიხედვით. თავდაპირველად ეს საავადმყოფოები ამბულატორიული დახმარების ცენტრებად იყო ჩაფიქრებული, მაგრამ თანდათანობით ისინი მრავალპროფილურ დაწესებულებებად ჩამოყალიბდა და ქვეყნის ჯანდაცვის “ოქროს სტანდარტად” იქცა. ამჟამად მეიოს კლინიკაში 3 000-მდე თერაპევტი მუშაობს, რომლებიც მსოფლიოში ანალოგის არმქონე სამედიცინო სამსახურს უწევენ პაციენტებს. ყოველწლიურად აქ სხვადასხვა ქვეყნიდან ჩასული 500 ათასი პაციენტი მკურნალობს.
კლინიკაში აქტიურად ვითარდება გენომიკა (მოლეკულური გენეტიკის მიმართულება, რომელიც ცოცხალი ორგანიზმების გენომსა და გენებს სწავლობს). იქ ეს მიმართულება ყოველდღიურ პრაქტიკაში უკვე დიდი ხანია გამოიყენება.
8. ლონდონის კლინიკა
ლონდონი 1932 წელს ექიმთა მცირერიცხოვანი ჯგუფის მიერ დაარსებული კლინიკა თანდათან ქვეყნის უდიდეს საავადმყოფოდ იქცა.
ლონდონის კლინიკაში დანერგილია ისეთი ურთულესი სამედიცინო ტექნოლოგიები, როგორებიცაა ქირურგია რობოტების გამოყენებით, ღეროვანი უჯრედების გადანერგვა და ღვიძლის ტრანსპლანტაცია. მაღალ დონეზეა განვითარებული ონკოლოგიაც.
ყოველწლიურად აქ მკურნალობს 155 ათასი პაციენტი, მათ შორის 20 ათასი - სტაციონარში და 125 ათასი - ამბულატორიულად. კლინიკა თანამშრომლობს საქველმოქმედო საზოგადოებებთან, რომლებიც ავთვისებიანი ახალწარმონაქმნების წინააღმდეგ იბრძვიან.
9. ჰირსლანდენის კლინიკა, ციურიხი
ეს გახლავთ 14 კერძო კლინიკისგან შემდგარი ჯგუფი, რომელიც შვეიცარიის მთელ ტერიტორიაზეა მიმობნეული. პირველი მათგანი 1932 წელს გაიხსნა. ჰირსლანდენის კლინიკა მრავალპროფილურია და იქ კომპლექსური მკურნალობა წარმოებს, დაწყებული სრულყოფილი დიაგნოსტიკით, დამთავრებული რეაბილიტაციით. აქ პრაქტიკაში გამოიყენება გამა-დანის უახლესი მოდელი, რომელიც სიმსივნეების და თავის ქალას ღრუს სხვა პათოლოგიების მაღალი სიზუსტით მკურნალობის საშუალებას იძლევა. ის ერთადერთი ეგზემპლარია ქვეყანაში. საავადმყოფოების ქსელში შემუშავებულია მკურნალობის საკუთარი სტანდარტები და დოკუმენტაციის წარმოების მეთოდები.
10. წმინდა ლუკას სამედიცინო ცენტრი, ფილიპინები
ეს ცენტრი ამერიკელმა მისიონერებმა დააარსეს 1903 წელს და სადღეისოდ აზიაში ერთ-ერთ უდიდეს კლინიკად ითვლება, რომელიც JCL სტანდარტით არის აკრედიტებული. აქ მედიცინის ყველა მიმართულებაა თავმოყრილი, ხოლო პაციენტების მკურნალობა თანამედროვე დასავლური სტანდარტების შესაბამისად ხდება. ცენტრი სამხრეთ-აღმოსავლეთ აზიის საუკეთესო სამედიცინო დაწესებულებების ხუთეულში შედის. სტაციონარული მკურნალობის გარდა, აქ ყოველთვის არის შესაძლებელი CHECK-UP ერთდღიანი დიაგნოსტიკის პროგრამის გავლა. უცხოელ პაციენტებს ორგანიზაციის მომსახურებათა მისაღებად შეუძლიათ, უცხოელი პაციენტების დახმარების ცენტრს მიმართონ.
