რა უნდა იცოდეთ სეზონური გრიპის შესახებ
იგი აინფიცირებს სასუნთქ სისტემას. სეზონური გრიპის ვირუსი ყოველწლიურად ცირკულირებს.
სიმპტომები
გრიპი ხასიათდება როგორც მსუბუქი, ისე მძიმე მიმდინარეობით. მისთვის დამახასიათებელი სიმპტომებია: საერთო სისუსტე, ცხელება,ხველა, ყელის ტკივილი, ცხვირიდან გამონადენი, თავის ტკივილი, ტკივილი კუნთებში. შესაძლოა განვითარდეს დიარეა და ღებინება.
გრიპი ადამიანიდან ადამიანზე გადაეცემა ხველით, ცემინებით, ვირუსით დაბინძურებულ საგნებთან ან ზედაპირებთან შეხებით.
გრიპმა შესაძლებელია გამოიწვიოს გართულებები, განსაკუთრებით მაღალი რისკის ჯგუფებში. გრიპის გართულებებია:
პნევმონია, სუნთქვის გაძნელება, ჰიპოქსია, ციანოზი, ძილიანობა, კრუნჩხვები, კუნთების მკვეთრი სისუსტე, დეჰიდრტაცია, თანმხლები დაავადებების გართულება, როგორიცაა გულის უკმარისობა, ასთმა, დიაბეტი. ბავშვებში შესაძლოა გამოვლინდეს ყურის ინფექციები. ჩვილ ბავშვებს გრიპის დროს შესაძლოა განუვითარდეთ ფებრილური კრუნჩხვები, ცრუ კრუპის სინდრომი.
გრიპის მეორადი გართულებების, ჰოსპიტალიზაციისა და ლეტალობის მაღალი რისკის ქვეშ იმყოფებიან:
- ჩვილები და ადრეული ასაკის ბავშვები, განსაკუთრებით 2 წლამდე;
- ორსულები და ხანდაზმულები 65 წელს ზევით;
- ქრონიკული დაავადების მქონე პირები: ასთმა, ფილტვის ქრონიკული ობსტრუქციული დაავადება, გულის შეგუბებითი უკმარისობა, დიაბეტი, ღვიძლისა და თირკმელების ქრონიკული დაავადებები.
არსებობს გრიპის საწინააღმდეგო ანტივირუსული პრეპარატები, რომლებიც გამოიყენება გრიპის საწინააღმდეგოდ. ანტივირუსული პრეპარატები უნდა მიიღოთ მხოლოდ ექიმის დანიშნულებით.
თვითმკურნალობა ანტიბიოტიკებით თუ სხვა პრეპარატებით დაუშვებელია.
გრიპის სიმპტომების გამოვლენა ჩვეულებრივ იწყება ვირუსის ორგანიზმში მოხვედრიდან 1-4 დღის შემდგომ, საშუალოდ 2 დღის განმავლობაში.
უმეტესწილად გრიპის მქონე ადამიანი გადამდებია დაავადების სიმპტომების გამოვლენამდე 1 დღით ადრე და გამოვლენიდან კიდევ 5-7 დღის განმავლობაში. ბავშვები ჩვეულებრივ 7 დღეზე მეტ ხანს არიან გადამდებები.
გართულებების გარეშე მიმდინარეობისას 1-4 დღის განმავლობაში სხეულის ტემპერატურა ნორმალიზდება და მე-7-10 დღიდან იწყება გამოჯანსაღება.
გრიპის გადატანის ან ვაქცინაციის შემდგომ ყალიბდება დროებითი იმუნიტეტი, რომლის საშუალო ხანგრძლივობა 1 წელია და მერყეობს ადამიანის ასაკის, ჯანმრთელობის მდგომარეობისა და ვაქცინაში გამოყენებული ანტიგენების შესაბამისად. გრიპის ვირუსისაგან თავის დასაცავად აუცილებელია ყოველწლიური ვაქცინაცია.
იმუნიტეტის ჩამოყალიბებას 2-3 კვირა სჭირდება, ამიტომ აცრა უნდა ჩაიტაროთ გრიპის სეზონის დაწყებამდე.
გრიპის ვაქცინა არ იწვევს დაავადებას, ვინაიდან წარმოადგენს ვირუსის ინაქტივირებულ სახეცვლილ ფორმას, რომელსაც შეუძლია მხოლოდ იმუნიტეტის გამომუშავება.
რა უნდა გააკეთოთ გრიპისაგან თავდასაცავად
განსაკუთრებული სიფრთხილე უნდა გამოჩინონგამოიჩინეთ ორსულებმა და ქრონიკული დაავადებების მქონე პირებმა, უნდა მოერიდნონ მასიური თავშეყრის ადგილებს, ხოლო თუ გრიპის სიმპტომები იჩენს თავს მიმართეთ ექიმს.
აუცილებელია ხელები საპნით და გამდინარე წყლით ხშირი დაბანა, რათა შემცირდეს ხელით ვირუსის გადატანის შესაძლებლობა.
აუცილებელია დაავადებულთა თვითიზოლაცია. თუ გაქვთ მაღალი ტემპერატურა თავის, კუნთების, სახსრებისა და ყელის ტკივილით, დარჩით სახლში, მოერიდეთ ჯანმრთელ ადამიანებთან კონტაქტს.
ხშირად გაანიავეთ საცხოვრებელი ადგილი და დაალაგეთ სველი წესით.
მნიშვნელოვანია სიმპტომური მკურნალობა, მიიღეთ სიცხის დამწევი საშუალებები და ტკივილდამაყუჩებლები, უმჯობესია მედიკამენტის მიღებამდე გაიაროთ კონსულტაცია ექიმთან.
იმ შემთხვევაში თუ გამოვლინდება ისეთი სიმპტომები, როგორიცაა სუნთქვის გართულება, ქოშინი, ცხვირ-ტუჩის მიდამოს ციანოზი, მოვარდისფრო სისხლიანი ნახველი, ლეთარგია, ჩვილ ბავშვებში - ძუძუს წოვის შეუძლებლობა, გაუწყლოვება, ყიფლიბანდის დაძაბულობა - სასწრაფოდ მიმართეთ ექიმს.