მარიამ ფოლადაშვილი

დატვირთული დღეები ართულებს გულის ჯანმრთელობის პრიორიტეტად ქცევას. ხშირად, დატვირთული გრაფიკის პირობებში, ადამიანებს არ რჩებათ საკმარისი დრო ისეთი აქტივობებისთვის და ცვლილებებისთვის, როგორიცაა: რეგულარული ვარჯიში, საკმარისი ძილი და ჯანსაღი კვება.

თუმცა, არსებობს ცვლილებები, რომელთაც დიდი შედეგის მოტანა შეუძლიათ:

შეცვალეთ ელექტრონული კომუნიკაცია პირადი შეხვედრებით

კარგია, თუ ტექსტური შეტყობინებები, ელექტრონული ფოსტის გაგზავნა, სოციალური მედიის ან Zoom ზარები არ იქნება ძირითადი საშუალება სხვებთან კომუნიკაციისთვის, განსაკუთრებით მაშინ, თუ ეს მეთოდები გიტოვებთ მარტოობის ან იზოლირებულობის განცდას. მარტოობა წარმოადგენს ერთ-ერთ პრობლემას, რაც დაკავშირებულია გულის დაავადების, გულის შეტევის ან ინსულტის უფრო მაღალ რისკთან, ნათქვამია ამერიკული გულის ასოციაციის სამეცნიერო განცხადებაში, American Heart Association-ის ჟურნალში.

მარტოობისა და იზოლაციის წინააღმდეგ საბრძოლველად, შეეცადეთ შეცვალოთ თქვენი ელექტრონული კომუნიკაციის ნაწილი პირადი შეხვედრებით. შესაძლოა, თქვენს განრიგში იპოვოთ დრო და ადგილი მეგობართან ან კოლეგასთან ერთად გასეირნებისთვის, ფინჯანი ყავისთვის ან ხანმოკლე ლანჩისთვის. პირისპირ გატარებული დრო გეხმარებათ სხვებთან კომუნიკაციაში და შეიძლება ნაკლებად იზოლირებულად გრძნობდეთ თავს. ფიზიკურად თანადასწრება ხელს უწყობს კომუნიკაციაში მეტი ჩართულობის განცდას.

მკვლევართა ჯგუფის მიერ საზოგადოებრივი ჯანმრთელობის საერთაშორისო ჟურნალში გამოქვეყნებული ბოლო კვლევა ვარაუდობს, რომ უკეთესმა სოციალურმა კავშირმა შეიძლება შეამციროს დეპრესიის ან შფოთვის რისკი. ორივე დაკავშირებულია გულის დაავადებებთან ან გულის არსებული მდგომარეობის გაუარესებასთან.

შეცვალეთ არაჯანსაღი საუზმე უფრო ჯანსაღით

სწრაფმა და რაფინირებულმა, ნაჯერი ცხიმებით ან დამატებული შაქრით სავსე საუზმის რეგულარულად მიღებამ შეიძლება გაზარდოს კალორიების, წონის, სისხლში შაქრის ან ქოლესტერინის დონე, რაც არ არის კარგი გულისთვის.ამის ნაცვლად, შეარჩიეთ საუზმისთვის ბოჭკოთი მდიდარი საკვები.

ბოჭკო ხელს უწყობს არა მხოლოდ საჭმლის მონელებას, არამედ ამცირებს ცუდ ქოლესტერინს (,,ცუდი: ქოლესტერინის მაღალმა დონემ შეიძლება გამოიწვიოს არტერიების დახშობა), ხელს უწყობს სისხლში შაქრის დონის კონტროლს და ამცირებს დიაბეტის რისკს, რომელიც ასოცირდება გულის შეტევასთან და ინსულტთან. ბოჭკომ შესაძლებელია ხელი შეუწყოს ქრონიკული ანთების შემცირებას, ანთება დიდ როლს ასრულებს არტერიების დახშობაში და იწვევს გულის შეტევას.

ხილი, თხილი, მარცვლეული (შვრია, ქერი) და მრავალი სხვა საკვები მდიდარია ბოჭკოთი.

შეცვალეთ ეკრანთან გატარებული დრო რამდენიმე წუთი მედიტაციით

თუ დატვირთული დღის შემდეგ, დასვენებისას, დროს კვლავ ტელეფონთან და კომპიუტერთან ატარებთ, დიდი შანსია, რომ ცოტა დრო გამონახოთ მედიტაციისთვის, რაც მნიშვნელოვანია გულის ჯანმრთელობისთვის. კვლევებმა აჩვენა, რომ ადამიანებს, რომლებიც მედიტაციას უთმობენ დროს, აქვთ ქოლესტერინის, დიაბეტის, მაღალი წნევის, ინსულტის და კორონარული არტერიის დაავადების უფრო დაბალი მაჩვენებელი, ვიდრე იმ ადამიანებს, რომლებიც არ ასრულებენ მედიტაციას.

როგორ მოქმედებს მედიტაცია

მედიტაცია იწვევს სხეულის რელაქსაციას, ფიზიოლოგიურ ცვლილებას, რომელიც, ხელს უწყობს არტერიული წნევის, გულისცემის, სუნთქვის სიხშირის, ადრენალინის და სტრესის ჰორმონის კორტიზოლის დონის შემცირებას.

სარგებლის მიღება შესაძლებელია დღეში მხოლოდ 10-დან 20 წუთამდე მედიტაციის შესრულებით.

დატვირთულ დღეებში მედიტაციის შესრულების სწრაფი გზები მოიცავს ჩუმად ჯდომას, თვალების დახუჭვას და სუნთქვაზე ფოკუსირებას მოსმენილი ბგერების ან აზრების შეფასების გარეშე, რომლებიც თქვენს თავში ჩნდება. შეეცადეთ დაამშვიდოთ ტვინი დღეში რამდენიმე წუთის განმავლობაში.