ლალი ჩხიკვაძე

გარემოს არასახარბიელო ფაქტორებისაგან კანის ბუნებრივ დაცვას უზრუნველყოფს ჰიდროლიპიდური მანტია. ეს არის თხელი აპკი ეპიდერმისის ზედაპირზე. ჰიდროლიპიდური ბარიერი ხელის მტევნებზე ძალიან სუსტადაა გამოხატული, ამიტომ ის განსაკუთრებით მგრძნობიარეა ყინვისა და ქარის ზემოქმედებისადმი და სწრაფად კარგავს ტენს. მდგომარეობას ართულებს ისიც, რომ ამ მიდამოში არ არის ცხიმოვანი ჯირკვლები.

სიცივე ორგანიზმისთვის ნამდვილი სტრესია, განსაკუთრებით ხელებისთვის.

როდესაც ტემპერატურა ქვეითდება, კანში გამომუშავდება და გროვდება განსაკუთრებული მოლეკულები - ციტოკინები, რომლებიც ზრდის მის მგრძნობელობას. გარდა ამისა, ქარის დროს ზიანდება ეპიდერმისი, ტემპერატურის მკვეთრი ცვლილება კი აფერხებს განახლების პროცესს. ამის გამო ზამთარში ხელის კანი შრება, უხეშდება, იქერცლება და ჩნდება ნახეთქები.

თუ სიმშრალეს და აქერცვლას ზამთრობით დაემატა ისეთი უსიამოვნო სიმპტომები, როგორებიცაა სიწითლე, წვა და ქავილი, ეს შეიძლება იყოს სიცივეზე ალერგია, რომელიც საჭიროებს მედიკამენტურ მკურნალობას.

ზამთარში ხელები ლამაზი და ნაზი რომ იყოს, საჭიროა მათი მოვლა:

დათბილვა - მარტივი და მნიშვნელოვანი წესი: გარეთ გასვლის წინ უნდა ჩავიცვათ ხელთათმანები.

დაბანის შემდეგ ხელები კარგად გავიმშრალოთ. საზოგადოებრივ ადგილებში არ გაიშროთ ხელები გამშრობ-ავტომატებზე, ამის ნაცვლად გამოიყენეთ მშრალი ხელსახოცი.

სიცივით დასუსტებულ კანზე ცუდად მოქმედებს საყოფაცხოვრებო ქიმიის საშუალებები, რომლებსაც დალაგებისას ვიყენებთ. ისინი არღვევენ ეპიდერმისის დამცავ გარსს, იწვევენ გაღიზიანებასა და ნახეთქების განვითარებას. აგრესიული ნივთიერებების ზემოქმედებისაგან ხელები უნდა დავიცვათ ხელთათმანით, ამით ავირიდებთ კანის სიმშრალეს და გაღიზიანებას.

ხელის კანის მოვლა ზამთარში მოიცავს 4 აუცილებელ ეტაპს: გასუფთავებას, დატენიანებას, კვებასა და დაცვას. თითოეული მათგანი მნიშვნელოვანია.

ზამთარში ხელის დასაბანად ჯობს კოსმეტიკური საპნის გამოყენება. ის შეიცავს კანის მკვებავ და დამატენიანებელ კომპონენტებს და ჩვეულებრივისგან განსხვავებით არ აშრობს კანს. ხელები დაიბანეთ თბილი წყლით. ცივმა წყალმა შეიძლება გამოიწვიოს კანის აქერცვლა.

ზამთარში არ უნდა დავივიწყოთ პილინგი. პროცედურის საშუალებით ვიშორებთ დაბინძურებულ და მკვდარ უჯრედებს, ის ამზადებს კანს კრემებისა და ნიღბებისთვის და ზრდის მის ეფექტურობას. ხელის კანის პილინგი ზამთარში კვირაში 1-2-ჯერ საკმარისია. უპირატესობა მიანიჭეთ რბილ სქრაბებს. ამ საშუალებების შემადგენლობაში არსებული მიკროგრანულები დელიკატურად ასუფთავებს კანს, არ ფხაჭნის და აზიანებს მას, მცენარეული ექსტრაქტები კი დამატებით არბილებს და ამშვიდებს ხელის კანს.

თუ კანი სიცივისგან უკვე გაუხეშდა და იქერცლება, სიგლუვისა და სინაზის დასაბრუნებლად დაგვეხმარება სპეციალური კოსმეტიკური ხელთათმანები. განსაკუთრებული გელი, რომლითაც გაჟღენთილია ხელთათმანი, შეიცავს ნატურალურ კომპონენტებს - დამატენიანებელი, შემახორცებელი და გამაახალგაზრდავებელი მოქმედებით: კერამიდებს, ჟოჟობას, ლავანდის ზეთს, ალოეს ექსტრაქტს და სხვა. აქტიური კომპონენტები დადებითად მოქმედებს არა მარტო მტევნების კანზე, არამედ ფრჩხილის ნუნაზე. ისინი არბილებენ მას, ეწინააღმდეგებიან კოჟრების წარმოქმნას.

კოსმეტიკური ხელთათმანით სარგებლობა ძალიან მოსახერხებელია. უბრალოდ, უნდა ჩავიცვათ სუფთა ხელებზე 20-30 წუთით ყოველდღიურად. მაქსიმალური ეფექტისთვის შეიძლება მთელი ღამით დატოვება.

ხელის კანის სრულფასოვანი მოვლა წარმოუდგენელია ზამთარში სპეციალური კრემის გარეშე. უპირატესობა მიანიჭეთ გაჯერებულ ცხიმიან ტექსტურას. თუ კანი ძალიან გამომშრალი გაქვთ, კრემი ჩანთით მუდმივად ატარეთ და გამოიყენეთ ყოველი დისკომფორტისას.

ზამთარში ხელის კრემის არჩევისას ყურადღება მიაქციეთ აქტიურ კომპონენტებს. ეფექტური საშუალება, რომელიც იცავს და აღადგენს კანს, შეიცავს:

• მძლავრ დამატენიანებელს - შარდოვანა, ალანტოინი, გლიცერინი;
• მკვებავ ეთერზეთებს - ზეითუნი, კარიტე, ჟოჟობა;
• ბუნებრივ ანტიოქსიდანტებს, А, Е, F, С ვიტამინებს.

აღნიშნული რეკომენდაციები დაგეხმარებათ, ზამთრის ცივ დღეებში შეინარჩუნოთ გლუვი, ნაზი და ხავერდოვანი ხელის კანი.