ამ დროს ადამიანის იმუნური სისტემა იწყებს ბრძოლას საკუთარი ნერვული ბოჭკოების მფარავ გარსთან - მიელინთან, რაც არღვევს კავშირს ტვინსა და ნერვულ სისტემას შორის. საბოლოოდ, დაავადება იწვევს ნერვთა მდგომარეობის გაუარესებას, მათ შეუქცევად დაზიანებას.

დაავადების კლინიკური ნიშნები შეიძლება საკმაოდ მრავალფეროვანი იყოს, რაც დამოკიდებულია დაზიანებული ნერვების რაოდენობასა და იმ გარემოებაზე, თუ რომელი ნერვია დაზიანებული. პაციენტთა ნაწილს შეიძლება დაეკარგოს დამოუკიდებლად სიარულის უნარი ან საერთოდ გაუჭირდეს გადაადგილება, მაშინ როცა ზოგ პაციენტს შესაძლოა ხანგრძლივად ჰქონდეს სტაბილური მდგომარეობა ყოველგვარი გაუარესების გარეშე.

სამწუხაროდ, იძულებულნი ვართ ვაღიაროთ, რომ გაფანტული სკლეროზი განუკურნებელი დაავადებაა. მკურნალობის მიზანი გამწვავებათა შორის პერიოდის გახანგრძლივება, დაავადების მიმდინარეობის შეცვლა და სიმპტომების სათანადო მართვაა.

გაფანტული სკლეროზის მქონე ადამიანებმა შეიძლება განიცადონ განწყობის ცვლილებები. ეს ცვლილებები სხვადასხვა ფორმისაა, ასევე განსხვავებულია მისი მიზეზები და მკურნალობის ვარიანტებიც.

გაფანტული სკლეროზის მქონე ადამიანებს ახასიათებთ:

მწუხარება

როდესაც ექიმი ადამიანს MS-ის დიაგნოზს უსვამს, ამან შესაძლოა, გავლენა მოახდინოს მის განწყობაზე. ადამიანი შეიძლება წუხდეს მის ცხოვრებაში მიმდინარე იმ ცვლილებებზე,რომლებიც დაავადების გაჩენას ახლავს თან. ისინი ასევე განიცდიან, რომ მათ არ შეეძლებათ საყვარელი საქმიანობის გაგრძელება.

დეპრესია

MS-მა შეიძლება გაზარდოს დეპრესიის რისკი. ამერიკის ნევროლოგიის აკადემია აცხადებს, რომ MS-ის მქონე ადამიანების თითქმის ნახევარი განიცდის დეპრესიას რაღაც მომენტში.

დეპრესიის მქონე ადამიანმა შესაძლოა, თავი უმწეოდ იგრძნოს და ვერ შეძლოს ცხოვრების სირთულეებთან გამკლავება ან ყოველდღიური საქმიანობისგან სიამოვნების მიღება. ყოველივე ეს გრძელდება თვეების ან წლებიც განმავლობაშიც კი.

თუმცა ექიმს ან ფსიქოლოგს, რა თქმა უნდა, შეუძლია პაციენტის დახმარება დეპრესიის მართვაში.

გარე ფაქტორები

სხვადასხვა ფაქტორებმა შეიძლება გავლენა მოახდინონ ადამიანის განწყობაზე.

• ტკივილი
• დაღლილობა
• შფოთვა სიმპტომების პროგრესირების გამო
• ნერვიულობა იმაზე, რომ ვერ იზრუნებენ საკუთარ თავსა და საყვარელ ადამიანებზე
• გავლენა მათ სამუშაო ცხოვრებაზე
• მარტოობა

ამ ფაქტორებმა შეიძლება გამოიწვიოს მწუხარება, სტრესი ან შეიძლება ხელი შეუწყოს დეპრესიულ და შფოთვით აშლილობას.

განწყობის ცვლილებები MS-ის გამო

ზოგჯერ, განწყობის ცვლილებები შეიძლება უშუალოდ გამოწვეული იყოს ნევროლოგიური ცვლილებებით, რომელსაც იწვევს გაფანტული სკლეროზი

თუ MS გავლენას ახდენს ნერვებზე ან ტვინის იმ ნაწილებზე, რომლებიც აკონტროლებენ ემოციებს, ადამიანმა შეიძლება განიცადოს ისეთი გრძნობები, როგორიცაა:

• სევდა
• შიში
• შფოთვა
• უძილობა
• აგრესია

და ბოლოს, კიდევ ერთი ნაკლებად გავრცელებული სიმპტომია ეიფორია ან უკიდურესი და არარეალური ბედნიერება. ის ასახავს თავის ტვინში არსებულ გარკვეულ ცვლილებებს, რომლებიც ხდება დაავადების შედეგად.