ნინო ჩარგეიშვილი

ის ორჯერ უნდა გაატაროთ ხორცსაკეპ მანქანაში (ან ათქვიფოთ ბლენდერში), შემდეგ ნაწილ-ნაწილ დანაყოთ ხის სანაყში ზაფრანასთან ერთად. დამუშავებული ნიგოზი შეგიძლიათ გამოწუროთ. ზეთი უკეთ რომ გამოუვიდეს, დაამატეთ ერთი კბილი გახეხილი ნიორი, შემდეგ გადაიღეთ ფართო ჯამში და ცივ წყალში დასველებული ხელით განაგრძეთ ზელა. თუ ზეთის გამოყოფა ჭირს, შეგიძლიათ, ნიგოზს ცოტაოდენი (1-2 ჩაის კოვზი) ცხელი წყალი დაასხათ. ზეთი ცალკე ჭურჭელში ჩაასხით და ცოტაოდენი მარილი ჩაამატეთ.

ცეცხლზე მდგარ საცივში ძმარი არ ჩაასხათ, თორემ წვენი გაგიმუქდებათ. ძმარი საცივს სულ ბოლოს ჩაამატეთ. შეგიძლიათ, მის ნაცვლად ლიმონის წვენი გამოიყენოთ. თუ საცივის წვენი თხელი გამოგივიდათ, მოხალეთ 2-3 სუფრის კოვზი გაცრილი სიმინდის ფქვილი, დაასხით რამდენიმე კოვზი ნელთბილი საცივის წვენი, კარგად გახსენით, შემდეგ შეურიეთ საცივში და რამდენიმე წუთი ადუღეთ.

თუ საცივის წვენი ზედმეტად სქელი გამოგივიდათ, შეგიძლიათ, ადუღებული წყლით ან ნარჩენი ბულიონით გააზავოთ.

გოჭის შეწვა

კარგად გასუფთავებულ გოჭს გამოუღეთ შიგნეული, გარეცხეთ, გადაავლეთ ჯერ მდუღარე, შემდეგ ცივი წყალი, შიგნიდან გამოუსვით მარილი, სურვილისამებრ, აჯიკაც, თუნუქის ფურცელზე დაასხით 1 ჩაის ჭიქა წყალი, დადეთ ზედ გოჭი და შედგით ღუმელში მაღალ ტემპერატურაზე. ცოტა ხნის შემდეგ ცეცხლს საშუალო ტემპერატურამდე დაუწიეთ. წვის პროცესში გოჭს რამდენიმეჯერ დაასხურეთ წყალი. როცა გოჭი წყალს მთლიანად შეიშრობს, წაუსვით კარაქი. ასეთი წესით შემწვარი გოჭის კანი რბილი და მტვრევადია.

ხრამუნა გოზინაყი

სქელძირიან ქვაბში ჩაასხით 250 მლ თაფლი და შედგით ცეცხლზე. როცა წამოდუღდება, რამდენიმე წუთით გადმოდგით და ისევ შედგით. ასე გააკეთეთ სამჯერ. მეოთხე შედგმაზე, როცა თაფლი დაცხრება და მშვიდად დაიწყებს დუღილს, კოვზით ამოიღეთ რამდენიმე წვეთი და ლამბაქზე დააწვეთეთ. აცალეთ გაცივება და აზილეთ. თუ თაფლი თითებს შუა ცომივით აგორდა, ჩააყარეთ 500 გ მოხალული, დაჭრილი ნიგოზი. განუწყვეტლივ ურიეთ ხის კოვზით. დაახლოებით 10 წუთის შემდეგ მოაყარეთ ერთი სუფრის კოვზი შაქრის პუდრი, კარგად წამოადუღეთ და ცეცხლიდან გადმოდგით. გადაიღეთ სველ ხის დაფაზე, გააბრტყელეთ და სველი დანით დაჭერით.

ცომეულისთვის

• სახელდახელო ცომი: ერთი შეკვრა მარგარინი აურიეთ ერთ ქილა მაწონში, მოაყარეთ მარილი, 1 ს.კ. საფუარი, 1 ჩ.კ. ძმარში გარეული სოდა და შეაზილეთ ფქვილი. ცომი ნახევარ საათში მზად იქნება.
• თუ საფუარიანი ცომის მოზელისას ხელებს ზეთში დაისველებთ, ცომი არ მოგეკრობათ.
• ცომის მომზადებისას ფქვილს კი ნუ ჩაყრით რძეში ან წყალში, პირიქით, სითხე წვრილ ნაკადად ჩაასხით ფქვილში და ურიეთ.
• საფუარიანი ცომი განსაკუთრებულად ნაზი და ჰაეროვანი გამოვა, თუ გამოცხობის წინ წვრილად გახეხილ მოხარშულ კარტოფილს (2 კარტოფილი 1 კგ ფქვილზე) ჩაამატებთ.
• თხლად გაბრტყელებული ცომის თუნუქის ფურცელზე გადატანა ძნელია. სცადეთ ასეთი ხერხი: ცომს ფქვილი მოაყარეთ, საბრტყელებელ ჯოხზე დაახვიეთ, გადაიტანეთ თუნუქის ფურცელზე და იქ გაშალეთ.
• მოზელის წინ ცომისთვის განკუთვნილი ფქვილი უნდა გაიცრას. ის ჟანგბადით გამდიდრდება და უკეთ აფუვდება.
• რბილი, წებოვანი ცომი ადვილად გაბრტყელდება, თუ ზემოდან გასანთლულ ქაღალდს დააფარებთ.
• თუ მოზელის შემდეგ აღმოჩნდა, რომ ცომს მარილი აკლია, მარილი ცოტაოდენ წყალში ან რძეში გახსენით, ცომს შეურიეთ და კიდევ ერთხელ კარგად მოზილეთ.
• როცა ცხიმშეზელილ ცომს ტაფაზე აცხობთ, ტაფას ცხიმი კი არ წაუსვათ, სულ ცოტა წყლით დაასველეთ.
• ხაჭაპურს ნაპირებზე კვერცხს ნუ წაუსვამთ, თორემ გამოცხობისას ნაპირები გაუმაგრდება და ცომს აფუების საშუალებას არ მისცემს.
• თუ ნამცხვარი მიგეწვათ, გააცივეთ, ფრთხილად გადაუსვით წვრილი სახეხი და შაქრის პუდრი მოაყარეთ.
• მარგარინით მოზელილი ცომის ნამცხვარი დიდხანს ინარჩუნებს სირბილეს.
• ნამცხვრის მომზადებისას ჯერ გოგლიმოგლი უნდა გააკეთოთ, შემდეგ დაუმატოთ გამდნარი ან შერბილებული ცხიმი, მაწონი ან არაჟანი, შემდეგ - ძმარში არეული სოდა და მწიკვი მარილი. მხოლოდ ამის შემდეგ შეურიეთ ფქვილი.
• ფენოვანი ცომისთვის ცხიმად აუცილებლად მარგარინი გამოიყენეთ.