საკუთარი თავის ჩამოსაქნელად
რამდენიმე რეკომენდაციის შესრულება მოგიწევთ. უპირველეს ყოვლისა, უარი უნდა თქვათ მოწევაზე. მეორე - ერიდოთ ცხიმიან, ცხარე და ტკბილ საკვებს, ტკბილ გაზიან სასმელებს.
ჩაიცვით ხელთათმანი, აიღეთ მასაჟორი...პრობლემური ზონების მასაჟი აუცილებელია როგორც უკვე არსებულ ცელულიტთან საბრძოლველად, ასევე მისი პროფილაქტიკისთვისაც. სასურველია, ცელულიტის თავიდან აცილებაზე წინასწარ ვიზრუნოთ, მოგვიანებით მასთან ბრძოლას უფრო დიდი ნებისყოფა და ძალისხმევა დასჭირდება.
შეგიძლიათ გამოიყენოთ ელექტრო და ხელის მასაჟორები, ანტიცელულიტური კრემები, მუსები, გელები. ყოველ დილით შხაპის მიღებისას პრობლემური ზონები ენერგიულად დაიმუშავეთ უხეში სახეხით.
ანტიცელულიტური საშუალებები უფრო ეფექტურია, როდესაც რეგულარულად ვარჯიშობთ. ყოველდღიურად თუნდაც 7-წუთიანი ვარჯიში შესანიშნავ შედეგს იძლევა. საწოლიდან წამოდგომამდე გაავარჯიშეთ ქვედა კიდურები - შეასრულეთ "ველოსიპედი", "მაკრატელა". ეს ენერგიასაც შეგმატებთ და განწყობასაც გამოგიკეთებთ.
კონტრასტული შხაპი
ვიწრო, ტანზე შემოტმასნილი შარვლები, მჭიდრო და მაღალყელიანი ჩექმები, რა თქმა უნდა, ძალიან ლამაზი და მოდურია, მაგრამ, სამწუხაროდ, არღვევს სისხლის მიმოქცევას, აფერხებს ლიმფის ფინებას და ცელულიტს უდებს სათავეს. ეცადეთ, იშვიათად ჩაიცვათ ტანზე შემოტმასნილი სამოსი, რეგულარულად ივარჯიშოთ, იკეთოთ მასაჟი სისხლის მიმოქცევის გასაუმჯობესებლად. კონტრასტული შხაპი (ცხელი და ცივი წყლის მონაცვლეობა) შესანიშნავად უწყობს ხელს ტონუსის მომატებას, სისხლის მიმოქცევის გაუმჯობესებას, სისხლძარღვთა ელასტიკურობის შენარჩუნებას. ან შხაპის დროს, ან მის შემდეგ ენერგიულად დაიზილეთ ფეხები მასაჟორით ან ხელთათმანით ქვემოდან ზემოთ.
პილინგი შეიძლება ჩაიტაროთ ყავის ნალექითაც. ის გააუმჯობესებს სისხლის მიკროცირკულაციას, კანს მოაშორებს აქერცლილ და დაბერებულ უჯრედებს, საშუალებას მისცემს, უკეთ ისუნთქოს და შეითვისოს კოსმეტიკური საშუალებებიდან სასარგებლო ნივთიერებათა მაქსიმალური რაოდენობა. და, რაც მთავარია, ანტიცელულიტური ეფექტიც აქვს. პილინგისთვის ყავის ნალექს შაქარი (ან მარილი) და ერთი კოვზი ზეითუნის ზეთიდაუმატეთ. გაითვალისწინეთ: ეს რეცეპტი არ გამოადგებათ მათ, ვისაც მშრალი კანი აქვს!
სამი რჩევა საუკეთესო შედეგისთვის
- რაც უნდა ბანალურად ჟღერდეს, მაინც ეცადეთ, თავი არიდოთ სტრესს. რაც უფრო მეტია უარყოფითი ემოცია, მით უფრო მეტად ზიანდება სისხლძარღვები, ფერხდება სისხლის მიმოქცევა და იქმნება ხელშემწყობი პირობები ცელულიტის წარმოქმნისთვის.
- ცელულიტის წარმოქმნას ხელს უშლის პროდუქტები, რომლებიც მდიდარია უჯრედისით. ძალიან სასარგებლოა ახალგამოწურული ხილისა და ბოსტნეულის წვენები.
- ეცადეთ, უარი თქვათ შაქარზე, ნამცხვრებსა და ტორტებზე. ჩაის მოყვარულებს ვურჩევთ, შაქრის ნაცვლად ჩაიში 1 კოვზი თაფლი ჩაუშვან. ის გემრიელიც არის, სასიამოვნოც და, რაც მთავარია, სასარგებლოც.
თუ გსურთ, დიდხანს შეინარჩუნოთ კანის სინორჩე და სასურველი წონა, ასე იკვებეთ:
საუზმე: ასკილის ან შავი მოცხარის ნაყენი, დამტკბარი 1 ჩ/კ თაფლით (ეს ნაყენი შიმშილს აყუჩებს), 5-6 კოვზი ხაჭო. საუზმესა და სადილს შორის შეგიძლიათ ვაშლი ან სტაფილო მიირთვათ.
სადილი: ერთი ნაჭერი მოხარშული ხორცი, კვერცხი და ბოსტნეული. ეცადეთ, უპუროდ ისადილოთ.
ვახშამი: ცოტაოდენი ხორცი და რაც შეიძლება მეტი ბოსტნეული. არავითარი მაიონეზი და არაჟანი - ბოსტნეულის სალათი მხოლოდ მცენარეული ზეთით შეკაზმეთ. ძილის წინ დალიეთ ასკილის, პიტნის ან მრავალძარღვას ნაყენი. სანამ დიეტაზე ხართ, ძილის რეჟიმის დაცვა აუცილებელია. ვისაც ნებისყოფა აქვს, შეუძლია ხორცის ნაცვლადაც ბოსტნეული მიირთვას. სადილად შეგიძლიათ სალათს ერთი ნაჭერი შავი პურიც მიატანოთ.
