კარგი სკოლა
რას ნიშნავს "კარგი სკოლა"
ყოველი მშობლისთვის "კარგი სკოლის" ცნება სხვადასხვა შინაარსს გულისხმობს, ყოველ სკოლას თავისი პრიორიტეტები და ამოცანები აქვს, ამიტომ კარგად უნდა განსაზღვროთ, რა უფრო მნიშვნელოვანია თქვენთვის: კარგი განათლება? შემოქმედებითი პოტენციალის განვითარება? დამოუკიდებელი აზრო-ვნება? ახალი მეგობრები? ნებისმიერ შემთხვევაში, სკოლა უნდა იყოს დაწესებულება, სადაც ბავშვი თავს კომფორტულად იგრძნობს და სადაც მას შესაძლებლობათა განვითარებისთვის ოპტიმალურ პირობებს შეუქმნიან. სკოლამ სამი ძირითადი ფუნქცია უნდა შეასრულოს: სწავლება, აღზრდა და განვითარება. კარგი სკოლა ის არის, რომელიც სამივე ამოცანას ართმევს თავს.
როგორი სკოლები არსებობს?
- სახელმწიფო ზოგადსაგანმანათლებლო სკოლა სკოლის ყველაზე გავრცელებული ტიპია, სადაც ბავშვების უმრავლესობა სწავლობს. ზოგიერთი სკოლა დაყოფილია გიმნაზიურ, ჩვეულებრივ და საკორექციო კლასებად. კარგად მომზადებულ ბავშვებს გიმნაზიურ კლასებში იღებენ. ბავშვებს, რომლებსაც ჯერ კიდევ არ შეუძლიათ ელემენტარული დავალებების შესრულება, საკორექციო კლასებში სწავლას სთავაზობენ, დანარჩენებს კი ჩვეულებრივ კლასებში რიცხავენ.
- სახელმწიფო სპეციალიზებული სკოლები - ეს არის სკოლები, სადაც ცალკეულ დისციპლინებს, მაგალითად, ფიზიკა-მათემატიკას ან უცხო ენებს, გაღრმავებულად ასწავლიან. იქ მოხვედრა არც ისე ადვილია, ვინაიდან ასეთი სკოლები ბავშვებს საგანგებო ტესტირების საფუძველზე იღებენ. კიდევ უფრო რთულია ასეთ სკოლაში სწავლა: გაძლიერებული პროგრამა მძიმე ტვირთად აწვება ბავშვის ჯანმრთელობასა და ფსიქიკას. ასე რომ, ზედმიწევნით უნდა შეაფასოთ საკუთარი შვილის შესაძლებლობები. იქნებ სჯობს, მაღალ კლასებში რეპეტიტორი დაიქირავოთ? ზოგიერთ პედაგოგს შეუძლია, მეცხრეკლასელს ერთ წელიწადში მისცეს ყველაფერი, რასაც სპეცსკოლის ბავშვები პირველიდან მერვე კლასამდე სწავლობენ.
- თუ შემოსავალი ამის უფლებას გაძლევთ, გირჩევთ, გადახედოთ საქართველოში არსებული კერძო სკოლების ნუსხას. მათ აშკარა ღირსებები აქვთ. ასეთ სკოლებში უფრო მცირერიცხოვანი კლასებია, რაც ინდივიდუალური მიდგომის მეტ საშუალებას იძლევა. გარდა ამისა, კერძო სკოლებში მეფობს თბილი, ოჯახური ატმოსფერო, უზრუნველყოფილია სათანადო მეთვალყურეობა და კარგი კვება, ბავშვები სკოლაში სპეციალური ავტობუსით მიჰყავთ და მოჰყავთ. ასეთი კომფორტული პირობები ზედგამოჭრილია ქრონიკული დაავადებების მქონე და არასტანდარტული - ჰიპერაქტიური ან შენელებული რიტმის მქონე - ბავშვებისთვის.
ბევრი მშობელი მიიჩნევს, რომ სასურველია, ბავშვმა დაწყებითი კლასები კომფორტულ პირობებში გაიაროს, შემდეგ კი მისი ჩვეულებრივ სკოლაში გადაყვანაც შეიძლება, თუმცა ასეთ შემთხვევაში ხშირად იჩენს თავს ახალ გარემოსთან ადაპტირების პრობლემა.
პირველი მასწავლებელი
როგორიც არ უნდა იყოს სკოლა, მთავარი მაინც მასწავლებელია - ადამიანი, რომლის გვერდითაც ბავშვი ყოველდღე, სულ მცირე, 4-5 საათს ატარებს. ნაცადი, საიმედო გზაა ინფორმაციის მიღება ძველი მშობლებისგან. ზოგიერთი სკოლა საგანგებოდ აწყობს ღია კარის დღეს და მშობლებს საშუალებას აძლევს, პედაგოგებს გაესაუბროს.
რით ვიხელმძღვანელოთ შეფასებისას?
საკუთარი ალღოთი. ეძებეთ პედაგოგი, რომელსაც აქვს კარგი მანერები, სათანადო მომზადება, მცირე ასაკის ბავშვებთან მუშაობის გამოცდილება, გაწონასწორებული ხასიათი. გააკეთეთ სწორი არჩევანი - ამაზე ხომ თქვენი შვილის მომავალია დამოკიდებული.