ნანა კალანდაძე

არ მინდა, ექიმის ეშინოდეს. როგორ მოვახერხო ეს? კბილის ექიმთან ვიზიტი არამცთუ პატარებს, უფროსებსაც კი აშინებთ. ვიდრე სტომატოლოგთან ვიზიტს დაგეგმავთ, მნიშვნელოვანია, ბავშვი ამისთვის მოამზადოთ.

პირველად

სტომატოლოგთან სიარულის დაწყება უმჯობესია 2,5-3 წლის ასაკიდან. თუნდაც ერთი შეხედვით ყველაფერი რიგზე იყოს, პატარას კიჭებზე ღრმულები არ ჰქონდეს და არც არაფერი სტკიოდეს, კბილის ექიმთან მაინც წაიყვანეთ - საწყის სტადიაში კარიესის შემჩნევა მხოლოდ სპეციალისტს შეუძლია. რაც შეეხება პირველ გასინჯვა-დათვალიერებას, კარგი იქნება, თუ მას ერთი წლის ასაკში ჩაატარებთ. სტომატოლოგი შეამოწმებს, სწორად ვითარდებიან თუ არა ახალამოჭრილი კბილები, მოგცემთ რეკომენდაციებს კბილების მოვლის შესახებ, შეაფასებს ღრძილების მდგომარეობას. რაც მთავარია, ეს იქნება პირველი კონტაქტი ექიმთან, საწყისი ახალი ურთიერთობისა, რომელზეც ბევრად არის დამოკიდებული ბავშვის მომავალი განწყობა თეთრხალათიანების მიმართ. ამიტომ დიდი მნიშვნელობა აქვს, როგორი პიროვნება შეხვდება მას, როგორი იქნება პირველი შთაბეჭდილება. პირველი ვიზიტი სტომატოლოგთან არავითარ შემთხვევაში არ უნდა ასოცირდებოდეს ტკივილთან - მას მხოლოდ გაცნობითი ხასიათი უნდა ჰქონდეს. სასიამოვნო პირველი შთაბეჭდილება თქვენს პატარას ექიმთან შემდგომ ურთიერთობასა და კბილების მოვლის კულტურის ფორმირებაში დაეხმარება.

შიშის გარეშე

ბავშვმა, რომელიც არასოდეს ყოფილა კბილის ექიმთან, არ იცის, რას გაუკეთებენ იქ და უნდა შეეშინდეს თუ არა რამისა. სიტყვებით "ნუ გეშინია", "არ გეტკინება" თვითონვე ვუწევთ პროვოცირებას მის შიშს. ბავშვს, უპირველეს ყოვლისა, აშინებს გაურკვევლობა, არცოდნა, ახალი გარემო, უცხო ადამიანები, შეუცნობლის მოლოდინი. უნდა ვეცადოთ, ეს მოლოდინი სასიამოვნო გავხადოთ.

მოდი, ვითამაშოთ

ექიმთან ვიზიტის თანმხლები უარყოფითი ემოციები მინიმუმამდე რომ დავიყვანოთ, ბავშვს უნდა ვუამბოთ, რას გააკეთებს კეთილი ექიმი, ოღონდ მისთვის გასაგებ და მისაღებ ენაზე, მაგალითად, ასე: "ექიმი დაათვალიერებს შენს კიჭებს და მოგვცემს ვიტამინებს". თავი არიდეთ "საშიში" სიტყვების წარმოთქმას - ისეთებისას, როგორიც არის "გაქლიბვა", "ნემსი", "ჩხვლეტა". ისარგებლეთ ბავშვური ცნობისმოყვარეობით და ბავშვთან ერთად გაითამაშეთ "კბილისექიმობანა", აჩვენეთ, როგორ უნდა შევიდეს ოთახში და დაჯდეს სტომატოლოგის სავარძელში, როგორ უნდა გააღოს პირი. ერთად დაათვალეთ პატარას კბილები, დაათვალიერეთ ისინი სარკით.

როგორ შევარჩიოთ კარგი კლინიკა?

ყველაზე საიმედო, რა თქმა უნდა, მეგობრების რეკომენდაციაა. ყურადღება მიაქციეთ შემდეგ მომენტებს:

არის თუ არა მოცემულ კლინიკაში ბავშვთა სტომატოლოგი;აღჭურვილია თუ არა სამკურნალო დაწესებულება თანამედროვე მოწყობილობებით, მასალებითა და აპარატურით;იძლევიან თუ არა გარანტიას სტომატოლოგიურ მომსახურებაზე.

ჩვენთან არ ტირიან!

სტომატოლოგთან ვიზიტისთვის დილის საათები შეარჩიეთ, რათა მომავალ შეხვედრაზე ბავშვმა მთელი დღე არ იფიქროს.აჭამეთ ბავშვს შინიდან გასვლამდე ნახევარი საათით ადრე.კლინიკაში დანიშნულ დრომდე 10 წუთით ადრე მიდით (და არა ერთი საათით ადრე), რომ პატარა პაციენტი ლოდინმა არ დაღალოს.ვიზიტი ხანგრძლივი არ უნდა იყოს, არა უმეტეს 10-15 წუთისა - ბავშვი მეტს ვერ გაძლებს, ხოლო თუ დაიღალა, ჭირვეულობას დაიწყებს.

ჩვეულებრივი საქმიანობა

• ბავშვი რომ არ შეშინდეს და "კეთილი" თანატოლებისგან "საშინელებები" არ მოისმინოს, სტომატოლოგთან ვიზიტის შესახებ ერთი-ორი დღით ადრე შეატყობინეთ.
• ნუ ეტყვით პატარას, რომ ექიმი არაფერს არ უზამს, ნუ დაუწყებთ მტკიცებას, რომ არ ეტკინება. თუ პირიქით მოხდა, ბავშვი მიხვდება, რომ მოატყუეთ და თქვენდამი ნდობას დაკარგავს.
• ნუ გაამახვილებთ ყურადღებას სტომატოლოგთან ვიზიტზე, ნუ აქცევთ მას კვირის მნიშვნელოვან მოვლენად. პირიქით, ხაზი გაუსვით იმას, რომ ეს ჩვეულებრივი საქმიანობაა, ბუნებრივი პროცედურა. აუხსენით, რომ ბავშვებიცა და უფროსებიც რეგულარულად აჩვენებენ თავიანთ კბილებს სპეციალისტებს.
• თუ თქვენ თვითონ ძალიან გეშინიათ სტომატოლოგის, ბავშვი სხვას - მამას ან ბებიას გაატანეთ. საქმე ის არის, რომ ბავშვები ძალიან მგრძნობიარენი არიან მშობლების ემოციების მიმართ. თქვენი შიში, როგორც არ უნდა მალავდეთ, მაინც გადაედება პატარას, ეს კი შესაძლოა მისთვის ფსიქოლოგიურ ბარიერად იქცეს.