თინათინ ქორიძე

გთხოვთ, ყველაფერი გვიამბოთ ღვინის სასარგებლო თვისებებზე.

თუ ბავშვი ღვინოს ითხოვს, კატეგორიულ წინააღმდეგობას ნუ გაუწევთ, შეგიძლიათ, მისცეთ, ოღონდ ცოტა და უმჯობესია წყალგარეული. მთავარია, ამას სისტემატური ხასიათი არ მიეცეს. უმჯობესია, ღვინის მაგივრად ბავშვს ყურძნის ან ღვინის მსგავსი შეფერილობის სხვა ხილის წვენი დაალევინოთ. თუ პატარა მეტისმეტად გაჭირვეულდა, შეიძლება უკიდურესი ზომის მიღებაც - ღვინოში უსიამოვნო გემოს მქონე პროდუქტის (მაგალითად, მდოგვის) ჩამატება. არა მგონია, მისი დაგემოვნების შემდეგ ბავშვმა ღვინო კიდევ მოითხოვოს.

ღვინო და დაავადებები

ღვინის გამოყენება შეიძლება სხვადასხვა დაავადების დროს. ბავშვებისთვის წითელი მშრალი ღვინო დასაშვებია:

• კუჭის აშლილობის დროს - საფერავი, კაბერნე;
• ანემიის დროს - 2 სადილის კოვზი წითელი ღვინო დღეში;
• ავიტამინოზის დროს - ნებისმიერი ნატურალური ღვინო;
• გრიპის, ბრონქიტის, პნევმონიის დროს - ცხელი წითელი ღვინო, დამტკბარი შაქრით ან თაფლით.

მაგრამ ეს იმას არ ნიშნავს, რომ მედიკამენტურ მკურნალობაზე უარი ვთქვათ. ანემიის დროს გადადუღებულ წითელ ღვინოს ანტიოქსიდანტური თვისების გამო უნიშნავენ და არა სისხლწარმოქმნის სტიმულაციის მიზნით. ის ანემიის მკურნალობისას დამხმარე საშუალებად ითვლება და შეიძლება დაინიშნოს ძირითადად ანტიანემიურ პრეპარატებთან ერთად, ისიც მხოლოდ ექიმთან კონსულტაციის შემდეგ.

ღვინის სამკურნალო თვისებები

ყურძნის ღვინო მდიდარია ვიტამინებითა და მაკროელემენტებით. იგი აუმჯობესებს ნივთიერებათა და მარილოვან ცვლას. მასში შემავალი ნივთიერებები ხელს უწყობს ნახშირწყლების, აზოტისა და მინერალების ცვლის პროცესს, ზრდის ორგანიზმის ტონუსს, აქვს შარდმდენი, ანტისტეროიდული, ბაქტერიციდული და ანტიალერგული მოქმედება. აქედან გამომდინარე, თუ ზომიერად გამოვიყენეთ, ღვინოს შეუძლია სარგებლობა მოუტანოს როგორც ბავშვის, ასევე მოზრდილის ორგანიზმს. განსაკუთრებით მნიშვნელოვანია ყურძნის ღვინის თვისება - გაზარდოს ორგანიზმის მედეგობა ინფექციური დაავადებების მიმართ. თანამედროვე მეცნიერები ადასტურებენ ღვინის ანტივირუსულ მოქმედებას A ჰეპატიტისა და გრიპის ხუთი ცნობილი ვირუსის მიმართ. წითელი ღვინო მარგებელია ანგინის (ტონზილიტის), ხოლო მშრალი შამპანური - რევმატიზმის დროს. ეს დასკვნა ფრანგ მედიკოსებს ეკუთვნით და კიდევ ერთხელ ადასტურებს ღვინის როგორც ანტივირუსულ, ასევე ანტიბაქტერიულ მოქმედებას. გარდა ამისა, მათივე დაკვირვებით, მიკრობებით დაბინძურებული წყალი სასმელად საშიში აღარ იქნება, თუ იმავე ოდენობის (1:1) წითელ ღვინოს დავუმატებთ. წითელი ღვინის შემადგენლობაში შემავალი ტანინები ბაქტერიებს სპობს. უმჯობესია, სამკურნალო მიზნით ღვინო გადავადუღოთ - ამით მასში ალკოჰოლის შემცველობა მცირდება, ხოლო მიკროელემენტების კონცენტრაცია იმატებს.

როგორ გადავადუღოთ ღვინო

მომინანქრებულ ჭურჭელში ჩაასხით 1 ლ წითელი მშრალი ღვინო და განახევრებამდე ადუღეთ, შემდეგ დაუმატეთ 1/2 ჩაის ჭიქა შაქარი და ადუღეთ კიდევ 2-3 წუთი. გააცივეთ, გადაიღეთ მინის ჭურჭელში და შეინახეთ გრილ, ბნელ ადგილას. შეგიძლიათ, ბავშვს დაალევინოთ 1 სადილის კოვზი დღეში 2-ჯერ. უმჯობესია, ჭამამდე. მშრალი ღვინო მაქსიმალურ სარგებლობას მოგვიტანს, თუ მას ჭამამდე დავალევინებთ პატარას. გირჩევთ, სამკურნალოდ არ გამოიყენოთ იზაბელა და ნოა (თეთრი იზაბელა). ამ ჯიშის ყურძნისგან დაწურული ღვინის დუღილისას ორგანიზმში გამოიყოფა არა მარტო ეთანოლი, არამედ მეთანოლიც, რომელიც საწამლავია. ღვინის ზომიერი მიღება 30%-ით ამცირებს გულ-სისხლძარღვთა სისტემის დაავადების ალბათობას - წითელი ღვინო შეიცავს ნივთიერებებს, რომლებიც სისხლძარღვებს ქოლესტერინისგან წმენდს. თუმცა ეს, ცხადია, იმას არ ნიშნავს, რომ მომავალში გულ-სისხლძარღვთა ან ჰიპერტონიული დაავადებების თავიდან აცილების მიზნით ბავშვებს ყოველდღიურად ვასვათ წითელი ღვინო, თუნდაც ერთი სადილის კოვზი.