მშობელთა კლუბი
კისერმრუდობა
კუნთოვანი კისერმრუდობა ჩვილ ბავშვთა 5%-ში გვხვდება. ის შესაძლოა გამოიწვიოს მკერდ-ლავიწ-დვრილისებრი კუნთის მოუმწიფებლობამ და არასიმეტრიულმა განვითარებამ. თანდაყოლილი კისერმრუდობის მიზეზად შესაძლოა იქცეს მშობიარობის დროს მიღებული ტრავმა. რაც უფრო ადრე შევამჩნევთ მას, მით უფრო შედეგიანი იქნება მკურნალობა, ამიტომ მშობლებს დაკვირვება მართებთ - პაწიას მხოლოდ სიყვარულით სავსე თვალებით კი ნუ შეხედავენ, კრიტიკულადაც შეაფასონ მისი ყოველი მოძრაობა დაბანისა თუ გამოცვლის დროს, კისერმრუდობის შემჩნევისთანავე კი პაწია ორთოპედს აჩვენონ. არსებობს ვარჯიშებისა და მასაჟების სპეციალური კომპლექსი, რომელიც თავდაპირველად მეთოდისტ-მასაჟისტთან ერთად უნდა ჩაუტაროთ პატარას, შემდეგ კი, როცა კარგად აითვისებთ - დამოუკიდებლად, შინ. გთავაზობთ ყველაზე ადვილად შესასრულებელ ვარჯიშებს:
- ბავშვი დააწვინეთ ზურგზე, თქვენ კი მის უკან დადექით, ხელებით დაუჭირეთ თავი, მსუბუქად მიიზიდეთ თქვენსკენ და ჯერ გამრუდებულ მხარეს მიაბრუნებინეთ, შემდეგ - ჯანმრთელ მხარეს და ნიკაპი აუწიეთ. ასეთი მოძრაობა ავარჯიშებს კისრის დაზიანებულ მხარეს არსებულ კუნთებს.
თუ პატარამ ტირილი დაიწყო, ვარჯიში მცირე ხნით შეწყვიტეთ და ბავშვი დაამშვიდეთ.
- ბავშვი დააწვინეთ გვერდზე, გამრუდებული კისრის მხარეს. ხელი თავქვეშ ამოუდეთ და თანდათან გამოაცალეთ, რომ თავი თვითონვე დაიჭიროს.
ორივე ვარჯიში გაიმეორეთ 5-10-ჯერ. ვარჯიშის შემდეგ კეთდება მასაჟი, რომელიც უმჯობესია, თავდაპირველად სპეციალისტს მიანდოთ. მასაჟის მიზანია დაზიანებულ მკერდლავიწდვრილისებრ კუნთში ლიმფისა და სისხლის მოძრაობის გაუმჯობესება, მისი მოდუნება, ხოლო საპირისპირო მხარეს - კუნთის სტიმულაცია და ტონუსი. პროცედურა 10-15 წუთს გრძელდება. მკურნალობის კურსი 15-20 პროცედურას მოიცავს. უმჯობესია, მასაჟთან ერთად ფიზიოპროცედურებიც ჩატარდეს. გარდა ამ კომპლექსისა, აუცილებელია, პატარას ძილისა და სიფხიზლის დროს შევუქმნათ სპეციალური პირობები. კერძოდ:
- შევუკეროთ სპეციალური კისრის დამჭერი, რათა თავი სწორად ეჭიროს და არა გვერდულად. ამისთვის დაზიანებულ მხარეს კისრის დამჭერი უფრო მაღალი უნდა იყოს, ხოლო ჯანმრთელ მხარეს იკვრებოდეს.
- შევუკეროთ ბალიში-რგოლი, რომელიც ჯანმრთელ მხარეს უფრო მაღალი იქნება.
- დავაწვინოთ ჯანმრთელი მხარით კედლისკენ.
ყოველივე ეს აიძულებს პატარას, არ დაზოგოს დაზიანებული კუნთი, რითაც მას თვითონვე ავარჯიშებს.
ბრტყელტერფიანობა
ბრტყელტერფიანობა ბავშვებს თანდათან უვითარდებათ და ტერფის ტკივილს მაინცდამაინც არ უჩივიან. ისიც უნდა ითქვას, რომ ჩვილ ბავშვებს ფიზიოლოგიური ბრტყე¬ლტერფიანობა აღენიშნებათ - ვიდრე პატარა ფეხს აიდგამს და დამოუკიდებლად სიარულს შეძლებს, ტერფი ბრტყელი აქვს, თაღი დროთა განმავლობაში, ფეხის ადგმის შემდეგ უყალიბდება. პათოლოგია რომ არ გამოგეპაროთ, ბავშვს პერიოდუ-ლად დაუთვალიერეთ ტერფები, ხოლო როდესაც ფეხს აიდგამს, ჩააცვით მაღალყელიანი (კოჭებს რომ უფარავდეს) და მაგარძირიანი, სასურველია, სუპინატორიანი ფეხსაცმელი.
რა შეგვიძლია გავაკეთოთ შინ?
გავუკეთოთ ბავშვს მასაჟი, რომლის მიზანია, ხელი შეუწყოს ტერფის კუნთების გაძლიერებას, მოხსნას კუნთების განსაზღვრული ჯგუფის დაძაბულობა, შეამციროს ტკივილი, აღადგინოს ტერფის ფუნქცია.
- ბავშვი ჯერ პირქვე დააწვინეთ მაგარზედაპირიან მაგიდაზე, შემდეგ - პირაღმა. მასაჟი იწყება ზემოდან, თანამიმდევრულად ხდება ბარძაყის, მუხლისა და ტერფის მასირება. გამოიყენება მასაჟის ყველა სახეობა - ხელსმა, ვიბრაცია, ჭყლეტა, ზეწოლა... განსაკუთრებული ყურადღებით უნდა ჩატარდეს თვით ტერფის მასაჟი.
სასურველია, მასაჟთან ერთად ჩავატაროთ ვარჯიშიც. სასარგებლოა წყლის კონტრასტული პროცედუ-რები, ცურვა. გარდა ამისა, მიაჩვიეთ პატარა თითის წვერებზე სიარულს, მონაცვლეობით თითის წვერებსა და ქუსლებზე დგომას, ფეხის თითებით იატაკიდან პატარა სათამაშოების აღებას, უსწორმას-წორო, ამობურცულ ზედაპირზე სიარულს, თბილ ქვიშაზე ფეხშიშველა სიარულს. შეგიძლიათ გამოიყე-ნოთ სპეციალური მასაჟორებიც. მკურნალობის კურსი - მასაჟი და ვარჯიშები - 12-15 სეანსს მაინც უნდა მოიცავდეს. გაითვალისწინეთ: თუ დროულად არ მივაქციეთ ყურადღება, ბრტყელტერფიანობა პროგრესირებას განაგრძობს. როგორც კი ბავშვი ფეხს აიდგამს, პედიატრსა და ორთოპედს აჩვენეთ, რათა დეფორმაცია დროულად გამოვლინდეს და მკურნალობა არ დაგვიანდეს.
თუ ბავშვი ფეხზე დადგომას არ ცდილობს, ნუ დააძალებთ. მით უმეტეს, თუ ნორმაზე მეტს იწონის. ნუ მიაყენებთ ზედმეტ დატვირთვას მის ჩამოუყალიბებელ ძვლებსა და კუნთებს. თვალი ადევნეთ პატარას, რომ ძილის დროს ერთსა და იმავე გვერდზე არ იწვეს, სეირნობისას კი ხელი ხან მარჯვენა, ხან მარცხენა ხელში ჩაჰკიდეთ, რათა საყრდენ-მამოძრავებელი სისტემის არათანაბარი განვითარება თავიდან აცილოთ. მშობლებო, გახდით ჩვენი კლუბის წევრები, გამოგვიგზავნეთ საინტერესო კითხვები, გაგვანდეთ თქვენი პრობლემები. მოდი, ერთად გადავჭრათ ისინი და ერთმანეთს ჯანსაღი თაობის აღზრდაში დავეხმაროთ.