დამატებითი საკვების მიცემას ნუ იჩქარებთ
ჩემი შვილი 3 თვისაა, არის ბუნებრივ კვებაზე. ორივე ძუძუს წოვს, მაგრამ მგონია, რომ არ ჰყოფნის. შეიძლება, დამატებითი საკვები მივცე?
დამატებითი საკვების მიცემა რეკომენდებულია 6 თვიდან. ექიმის დანიშნულებით შეიძლება უფრო ადრეც, მაგრამ არა უადრეს 4 თვისა. ამ შემთხვევაში საუბარია შემატებულ საკვებზე ანუ შერეულ კვებაზე. დედის რძეს უნდა დაემატოს ადაპტირებული ნარევი. მანამდე კი საჭიროა დარწმუნდეთ, რომ არ გაქვთ საკმარისი რძე, თუმცა ასეთი რამ იშვიათად ხდება - როდესაც ჩვილი ორივე ძუძუს ბოლომდე გამოწოვს, ეს ნიშნავს, რომ რძე შესატყვისი რაოდენობით მოგემატებათ. ეს საუკეთესო სტიმულაციაა ლაქტაციისთვის. აკონტროლეთ წონის ნამატი. ჰყოფნის თუ არა რძე ჩვილს, ამის გარკვევა ადვილია - ეცადეთ, 24 საათის განმავლობაში არ ჩააცვათ პამპერსი და დაითვალეთ, რამდენ საფენს დაასველებს. 10-დან 12-მდე - ყველაფერი რიგზეა, თუ ჩვილი იღებს მხოლოდ დედის რძეს და მეტს არაფერს (იგულისხმება ჩაი, წყალი, მედიკამენტები). შეიძლება, სხვაგვარადაც განვსაზღვროთ: ერთი დღის განმავლობაში აწონეთ ყოველი პამპერსი ჩაცმამდე და გამოცვლის შემდეგ. ბოლოს მონაცემები შეაჯამეთ. უნდა მიიღოთ დაახლოებით 0,9-1,0ლ ანუ იმდენი, რამდენ საკვებსაც იღებს ბავშვი 24 საათის განმავლობაში. ნუ იჩქარებთ დამატებითი საკვების მიცემას 6 თვემდე. ყველაფერს თავისი დრო აქვს. კარგად დაუკვირდით თქვენს პატარას და მიხვდებით, რა სჭირდება მას.
მყავს 6 თვის შვილი. ბუნებრივ კვებაზეა. 5 თვიდან ვაძლევ დამატებით საკვებს. ხილის პიურეს მიირთმევს სიამოვნებით, მაგრამ ბოსტნეულის პიურეს აღებინებს. შემდეგ მთელი დღე აქვს წამოქაფება. რძე თანდათან მაკლდება. მირჩიეთ, რა ვაჭამო!
ყველაფრის მიზეზია ნაადრევად დაწყებული დამატებითი კვება, თანაც თქვენ მეტისმეტად აქტიურად დაგიწყიათ მისი გაფართოება. 5 თვის ჩვილის კუჭ-ნაწლავი ჯერ არ არის მზად ყოველგვარი საკვების მისაღებად და ასათვისებლად. თუ ჩვილი ძუძუს არ წოვს, უნდა იკვებებოდეს ადაპტირებული ნარევით. ამ ასაკში სხვა საკვები არ არის საჭირო. თანამედროვე რეკომენდაციებით, დამატებითი საკვების მიცემა სასურველია დავიწყოთ 6 თვიდან და თანდათან, რათა ჩვილი შეეგუოს ახალ საკვებს. თუმცა არც დაგვიანება ღირს. ბავშვი თანდათან უნდა შევაგუოთ ახალ საკვებს: ჯერ ერთი ჩაის კოვზი გავასინჯოთ, მომდევნო ჯერზე - ორი-სამი და ა.შ. თუ პატარას ბოსტნეულის პიურეზე აღებინებს, უმჯობესია შეწყვიტოთ მისი მიცემა. 10-12 დღე აწოვეთ მხოლოდ ძუძუ. ნურც ღამის კვებაზე ეტყვით უარს. ამ პერიოდში ლაქტაციაც მოიმატებს. ეს მნიშვნელოვანია, რადგან ძუძუთი კვება კიდევ დიდხანს მოგიწევთ. შესვენების შემდეგ ისევ მიეცით დამატებითი საკვები. დაიწყეთ ნახევარი ჩაის კოვზით. ულუფა თანდათან გაზარდეთ. ბოსტნეულის პიურეს მიცემა დროებით გადადეთ. ჯობს დაიწყოთ ხილის პიურეთი ან სიმინდის, წიწიბურას, ბრინჯის ფაფით, ოღონდ - ერთ-ერთი მათგანით. შეცდომას ნუღარ დაუშვებთ და ჩვილს ყველაფერს ერთად ნუ მიაყრით! ფაფები, რომლებიც გლუტეინს შეიცავს (მანანისა, შვრიისა, ხორბლისა), პირველ ხანებში რეკომენდებული არ არის. უმჯობესია, მისცეთ მისი ასაკის ბავშვებისთვის განკუთვნილი მზა ფაფები. სისქე კი თქვენ თვითონ არეგულირეთ. ნუ დააძალებთ ბავშვს საკვებს, უმჯობესია 3 კოვზი გემრიელად მიირთვას, ვიდრე მოზრდილი ულუფა ძალით გადააყლაპოთ.