რაზე მიუთითებს, როცა ბავშვს ფოტოებზე სახეების წაშლა ან სათამაშოებისთვის თვალების ამოთხრა უყვარს
4-5 წლის ასაკში ზოგიერთ ბიჭუნას კოსმოსი ან წყალქვეშა სამყარო იტაცებს, ზოგიერთი კი ფანტასტიკური პერსონაჟებით არის მოხიბლული. არ არის გამორიცხული, თქვენი შვილიც ადამიანი-ობობას ან ბეტმენის თაყვანისმცემელთა არმიის წევრი იყოს. თუ ასეა, მაშინ მიზეზიც მარტივია - დასახელებულ გმირებს ხომ სახე დაფარული აქვთ. პატარა ფოტოებზე სახეს კი არ შლის, არამედ ცდილობს, მათ ნიღაბი "მოარგოს". სამწუხაროდ, ბავშვი ამას ვერ ახერხებს, ჩვენ კი მცდარ დასკვნას ვაკეთებთ - გვგონია, რომ მან ფოტო შეგნებულად დააზიანა.
თუ პატარას მშვიდად მიუახლოვდებით და ჰკითხავთ: "რას ხატავ?", - ის გიპასუხებთ: "ბეტმენის (ან კოსმონავტის) ნიღაბს". შესაძლოა, ბავშვს თქვენი ყურადღება აკლდეს. მაშინ ის უდავოდ ეჭვით იქნება აღვსილი ლამაზი ჟურნალების ან ფოტოების მიმართ. ასეთ შემთხვევაში გასაგებია "კონკურენტის" განადგურებისკენ სწრაფვა. პატარა გულმოდგინედ არჩევს სურათის ყველაზე მნიშვნელოვან ობიექტს - ადამიანს და მის ყველაზე მთავარ ნაწილს - სახეს. ასეთ შემთხვევებში, "ბეტმენის ნიღბისგან" განსხვავებით, იოლად შეამჩნევთ, რომ ბავშვი სახეს აგრესიული იერით ანადგურებს. ეს ზოგჯერ ემოციური სფეროს სერიოზულ დარღვევებზე მეტყველებს.
ბავშვის სწრაფვა, სურათს სახე წაუშალოს, შესაძლოა თვალებით კონტაქტის დარღვევაზე მიუთითებდეს. ამ შემთხვევაში ბავშვები ცდილობენ, თვალები "ამოსთხარონ" სათამაშოებსაც და საერთოდ, უცნაურად იქცევიან. მათ თვალებით კონტაქტი ადრეულ ასაკშივე აქვთ დარღვეული. ჩვეულებრივ, სიცოცხლის მეშვიდე კვირას ახალშობილი უკვე ამყარებს კონტაქტს თვალებით. ჯანმრთელი ბავშვი დედას სიამოვნებით უყურებს თვალებში, იჭერს მის მზერას, ხოლო სამი თვის ასაკისთვის დედის დანახვისას იცინის, ფეხებს იქნევს, ღუღუნებს - კმაყოფილებას გამოხატავს. თუ ბავშვს ემოციური სფეროს დარღვევები აქვს, ის სიცოცხლის პირველი თვეებიდანვე გაურბის დედასა და სხვა ადამიანებთან თვალებით კონტაქტს, თითქოს ირიბად, ქვეშ-ქვეშ იყურება. თვალებში შეხედვამ შესაძლოა აგრესიის შეტევა ან თავშეუკავებელი ტირილი გამოიწვიოს. ასე რომ, დააკვირდით პატარას და თუ მის ქცევაში უცნაური, თქვენთვის აუხსნელი რამ შემჩნიეთ, დროულად მიმართეთ ექიმს.