პედიატრი გვირჩევს - მკურნალი.გე

მარიკა დვალი

უპირველეს ყოვლისა, უნდა ვიცნობდეთ ამ დაავადების რისკფაქტორებს და შეძლებისდაგვარად ვერიდებოდეთ მათ ზემოქმედებას.

• რა უწყობს ხელს პატარებში ბრონქიტის აღმოცენებას?

1. ხშირი რესპირატორული ინფექცია;
2. ქრონიკული ტონზილიტი, ჰაიმორიტი, რინიტი, ადენოიდები;
3. თამბაქოს კვამლით გაჯერებულ გარემოში ხშირად ყოფნა;
4. მემკვიდრეობითი დატვირთვა;
5. დედის რთული ორსულობა და მშობიარობა.

ზოგიერთი ფაქტორისთვის თავის არიდება შეუძლებელია (მაგალითად, გენეტიკას ვერ შევცვლით), მაგრამ ნამდვილად შეგვიძლია, საყვარელ პაწიას თავიდან ავაცილოთ თამბაქოს კვამლის ზემოქმედება.

• გაციება თუ ბრონქიტი?

ბრონქიტის სიმპტომები ძალიან ჰგავს უბრალო გაციების კლინიკას, თუმცა არსებობს ნიშნები, რომელთა ცოდნაც დაგვეხმარება, დროულად ვივარაუდოთ დაავადება და მივმართოთ ექიმს.

ბრონქიტისთვის ტიპურია:

1. წვისა და ჩახეხვის შეგრძნება მკერდის ძვლის უკან;
2. ჯერ - მშრალი, მტკივნეული ხველა, შემდეგ - ნახველის გაჩენა;
3. ტემპერატურის მომატება 38-39⁰C-მდე;
4. ტემპერატურა მაღალი არ არის, მაგრამ დიდხანს გრძელდება ან დაწევის შემდეგ კვლავ მაღლა იწევს;
5. ხველა შეტევითია, თან სდევს თავბრუხვევა და თავის ტკივილი;
6. ბავშვის გულმკერდიდან ისმის ხიხინი და სტვენა;
7. პატარას სუნთქვა უჭირს;
8. ხველა 2-3 კვირას გრძელდება.

თუ ბავშვს ჩამოთვლილი სიმპტომები აღენიშნება, დიდია ალბათობა, ბრონქიტი ჰქონდეს, ასე რომ, დროულად მიმართეთ პედიატრს. გახსოვდეთ, განსაკუთრებული ყურადღება გმართებთ, თუ პროცესი უკვე 4-6 კვირაა გრძელდება.

• ვარჯიში ბრონქებისთვის

სპეციალური ვარჯიშები გააუმჯობესებს ნახველის გამოყოფას და სასუნთქი აპარატის ფუნქციას. ისინი შეიძლება თამაშს დავამსგავსოთ. სუნთქვითი ვარჯიში რეკომენდებულია როგორც დაავადების გამწვავებისას, ისე გამოჯანსაღების პერიოდში.

1. ქარიშხალი ჭიქა წყალში – აიღეთ რაც შეიძლება მაღალი ჭიქა, ჩაასხით წყალი, ჩადეთ კოქტეილის ჩხირი, ბავშვს სთხოვეთ, ღრმად ჩაისუნთქოს და შემდეგ რაც შეიძლება ნელა ჩაბეროს ჩხირში. ჭიქაში წყალი ბუყბუყს იწყებს, პატარა ერთობა, თანაც სუნთქვით ვარჯიშს ასრულებს. ეს პროცედურა უნდა გაიმეოროთ დღეში 4-5-ჯერ, რამდენიმე წუთის განმავლობაში. ამავე მიზნით შეიძლება პატარას გავაბერინოთ ბუშტი ან რეზინის სათამაშო, ოღონდ ფრთხილად, რომ თავბრუ არ დაეხვეს.
2. ბურთი მუცელში – სთხოვეთ პატარას, წარმოიდგინოს, რომ მუცელში ბურთი აქვს და ღრმა ამოსუნთქვისას მუცლის წინა კედელი ისე მიუახლოვოს ხერხემალს, რომ `ბურთი~ გაჭყლიტოს, შემდეგ კი სწრაფად ჩაისუნთქოს და მუცელი გამობეროს.

ამ ვარჯიშის შესრულება შეიძლება როგორც ფეხზე დგომისას, ისე წოლისას.