პარკინსონის დაავადებამ შესაძლოა გადანერგილი უჯრედებიც დააზიანოს
ჩიკაგოს რაშის უნივერსიტეტის სამედიცინო ცენტრის მეცნიერმა ჯეფრი კორდოვერმა და მისმა კოლეგებმა ტვინოვანი ქსოვილის გადანერგვიდან 14 წლის შემდეგ გარდაცვლილი ქალის ტვინი გამოიკვლიეს. მათი მონაცემებით, 1993 წელს ჩატარებული ტრანსპლანტაციის შემდეგ პაციენტის მდგომარეობა გაუმჯობესდა, მაგრამ 2004 წელს დაავადებამ კვლავ დაიწყო პროგრესირება, ხოლო 2007 წელს ავადმყოფი დაიღუპა. ვალენბერგის ნევროლოგიურ ცენტრში მომუშავე შვედმა მეცნიერებმა კი ტრანსპლანტაციიდან 11 და 16 წლის შემდეგ გარდაცვლილი ორი პაციენტის ტვინი შეისწავლეს. ტრანს-პლანტანტი სამივე შემთხვევაში პარკინსონის დაავადებით აღმოჩნდა დაზიანებული. გადანერგილი ნეირონები ამ დაავადებისთვის დამახასიათებელ ლევის სხეულაკებს (ცილა ალფა-სინუკლეინის გროვას) შეიცავდა. ლევის სხეულაკები 40 წელზე ახალგაზრდა უჯრედებში არ წარმოიქმნება, ამიტომ 11-16 წლის წინ გადანერგილ უჯრედებში მათი ფორმირება არ შეიძლება ბუნებრივი პროცესებით აიხსნას. მეცნი-ერები ვარაუდობენ, რომ გადანერგილი ჯანმრთელი უჯრედები ანომალიურმა ცილამ ალფა-სინუკლეინმა დააავადა. მეორე ჰიპოთეზის თანახმად, ტრანსპლანტანტების დაზიანება იმუნურ რეაქციასა და ანთებას უკავშირდება. ჯერჯერობით უცნობია, ავნებს თუ არა დაავადება პაციენტის საკუთარ (მაგალითად, კანის უჯრედებისგან მიღებულ) ღეროვან უჯრედებს. მეცნიერთა აზრით, ამ კითხვაზე პასუხის გასაცემად უფრო ღრმა კვლევაა აუცილებელი.