ფიტნესი ჩვენს ცხოვრებაში
გთავაზობთ ინფორმაციას იმის თაობაზე, რა შეუძლია ფიტნესს.
- ზრდის კუნთოვან მასას. 40 წელს გადაცილებული ადამიანები ჰიპოდინამიის გამო სწრაფად კარგავენ კუნთოვან მასას, სხეული ეშვებათ და ურბილდებათ, ხოლო სწორად შერჩეული ვარჯიშთა კომპლექსით 2-თვიანი, 25-წუთიანი ყოველდღიური ვარჯიშით ამ ასაკშიც კი შესაძლებელია კუნთოვანი ტონუსისა და მასის საგრძნობი მომატება.
- ამცირებს ცხიმოვანი უჯრედების რაოდენობას. ვარჯიშის წყალობით იმატებს ნივთიერებათა ცვლის ინტენსივობა და ორგანიზმის ყოველდღიური ენერგეტიკული დანახარჯი, რაც იმას ნიშნავს, რომ ცხიმი გაძლიერებულად იწვება. ცხიმოვანი უჯრედები 2-ჯერ მეტ ადგილს იკავებს, ვიდრე იმავე წონის კუნთოვანი ბოჭკოები. სწორედ ამიტომ იცვლება ასე სწრაფად სხეულის ფორმები წონის კლებისას.
- ზრდის ძვლებში მინერალური ნივთიერებების შემცველობას. ძლიერი, რეგულარული დატვირთვა სერიოზული სტრესია ძვლებისა და მათთან კუნთების დამაკავშირებელი მყესებისთვის, რის საპასუხოდაც ორგანიზმში სტიმულირდება მინერალური ნივთიერებების ძვლებისკენ გადასროლა. ექვსთვიანი რეგულარული ვარჯიშის შედეგად ძვლებში მინერალური ნივთიერებების დონე 10%-ით იმატებს.
- ორგანიზმს უფრო სიცოცხლისუნარიანს ხდის. კუნთები ჩვენი ორგანიზმის მამოძრავებელი ნაწილია. მათი კარგ ფორმაში ყოფნა საგრძნობლად აუმჯობესებს ცხოვრების ხარისხს, უბრალო ენით რომ ვთქვათ, გვმატებს შრომის უნარსა და ხალისს.
- გვმატებს ძალას. გავარჯიშებული კუნთები, ბუნებრივია, გაცილებით ამტანი და გამძლეა.
- ზრდის სახსრების სიმტკიცეს და ხელს უწყობს სიარულის სწორი მანერის გამომუშავებას. სახსრის სიმტკიცე, ძვლის აგებულებასთან ერთად, იმ კუნთების სიმტკიცეზეცაა დამოკიდებული, რომლებსაც ორი ძვლის ერთმანეთთან მტკიცედ დაკავშირება ავალია. კარგად განვითარებული კუნთები ამას კიდევ უფრო სრულყოფილად ახერხებენ. თანაც სხეული გაცილებით მომზადებული ხვდება დატვირთვას, რომელსაც “საკუთარ ტერიტორიაზე” თანაბარზომიერად ანაწილებს.
- ამცირებს ართრიტებისა და ართროზების განვითარების რისკს. რაციონალური დატვირთვისას საგრძნობლად მცირდება უხერხული და ძვალსახსროვანი სისტემისთვის ზიანის მომტანი მოძრაობები, შესაბამისად, მცირდება ართრიტებისა და ართროზების განვითარების რისკიც.
- აქვეითებს არტერიულ წნევას. ფლორიდის უნივერსიტეტის მეცნიერებმა დაადასტურეს, რომ ფიტნესი საგრძნობლად აქვეითებს არტერიულ წნევას და ამით გულ-სისხლძარღვთა დაავადებების რისკსაც ამცირებს.
- ამცირებს საყოფაცხოვრებო ტრავმების რისკს. ძლიერ კუნთებს უნარი შესწევთ, ტონუსში ჰყავდეთ და დაიცვან მთელი სხეული. ისინი აძლიერებენ იმუნიტეტს, აჩქარებენ ტრავმისა და ავადმყოფობის შემდეგ აღდგენით-სარეაბილიტაციო პერიოდს.
- აქვეითებს შაქრიანი დიაბეტის განვითარების რისკს. ვარჯიშების შესრულებისას, რომლებიც კუნთური მასის გაზრდას ითვალისწინებს, ძლიერდება სისხლში არსებული შაქრის კუნთოვანი უჯრედებისკენ მიდენა, კარგი ნივთიერებათა ცვლა კი ხელს უწყობს ცხიმოვანი უჯრედების რაოდენობის შემცირებას. ეს ორი ფაქტორი ერთად საგრძნობლად ამცირებს შაქრიანი დიაბეტის განვითარების რისკს.
ფიტნესმითები
- სპორტსმენი ყოველთვის ჯანმრთელია
პროფესიონალი სპორტსმენი არასპორტული ცხოვრების წესის მიმდევარზე გაცილებით ნაკლებს ცოცხლობს, რადგან რეგულარული, ძლიერი დატვირთვა სხეულის სწრაფ გამოფიტვას და ადრეულ დაბერებას იწვევს.
- გულის ნელი მაჯისცემა სპორტული სრულყოფილების ნიშანია
ბევრს ჰგონია, რომ თუ სპორტსმენს განსაკუთრებით ნელი მაჯისცემა აქვს, იგი შესანიშნავ სპორტულ ფორმაში იმყოფება, არადა ბრადიკარდიამ შესაძლოა გამოიწვიოს ნერვული სისტემის გამოფიტვა და დაღლილობა, ზოგადი სისუსტე, უძილობა და ტკივილები. მამაკაცებისთვის ნორმალური მაჯისცემა 60-70-ია წუთში, ხოლო ქალებისთვის - 70-80. ამაზე დაბალი მაჩვენებელი უკვე თავბრუხვევას იწვევს და ექიმის კონსულტაციას მოითხოვს.
- დატვირთეთ სხეულის ის ნაწილი, რომლის გახდომაც გსურთ
ბევრს მიაჩნია, რომ სხეულის განსაზღვრული ნაწილის გასახდომად აუცილებელია მისი განსაკუთრებული დატვირთვა. სიმართლე კი ის არის, რომ თუ ცხიმისგან გათავისუფლება გსურთ, ის მთელი ორგანიზმიდან უნდა განდევდნოთ. სხეულის კონკრეტული ნაწილების გავარჯიშებით ამ ნაწილებზე ცხიმის დაწვას ვერ შეძლებთ, უბრალოდ გაიუმჯობესებთ კონკრეტული ჯგუფის კუნთების ტონუსს.
- ჩაჯდომები და დახრები წელის ზომას ამცირებს
ამგვარი ვარჯიშები აუმჯობესებს მუცლის კუნთების ტონუსს, რაც საბოლოო ჯამში ზრდის წელის გარშემოწერილობას. მის შემსამცირებლად აუცილებელია, მთლიანად მოიკლოთ.
- სპორტული სასმელები გაუწყლოებისგან იცავს და შედეგებს აუმჯობესებს
გაითვალისწინეთ, ასეთ სასმელებში საკმაოდ ბევრია შაქარი. ისინი სინამდვილეში თავად იწვევენ გაუწყლოებასა და სპორტული შედეგების გაუარესებას. ინტენსიური ფიზიკური ვარჯიშის შემდეგ დაკარგული სითხის დეფიციტის შესავსებად საუკეთესოა ჩვეულებრივი სასმელი წყალი.
საინტერესო ფაქტები
ფიტნესი და მამაკაცთა “მეორე გული”
დადგენილია, რომ მამაკაცები, რომლებიც რეგულარულად მისდევენ ფიტნესს, თავიანთ არასპორტულ თანამოძმეებზე ნაკლებად ავადობენ წინამდებარე ჯირკვლის სიმსივნით. ამასთან, რაც მეტად ვარჯიშობენ, მით ნაკლებად ემუქრება საფრთხე მათ მეორე გულს.
ფიტნესი და ქალის ახალგაზრდობა
კალიფორნიელმა მეცნიერებმა დაადგინეს, რომ შესაძლებელია ქალის გაახალგაზრდავება 16 წლით, 12 კვირის განმავლობაში, ყოველგვარი ბოტოქსისა და პლასტიკური ოპერაციის გარეშე, მხოლოდ ველოსიპედის დახმარებით. კვირაში 5 დღე ველოსიპედით ერთსაათიანი სეირნობა ამის რეალურ საშუალებას იძლევა.
საინტერესოა, რომ მამაკაცებზე ველოსპორტი იმავე ეფექტს არ ხდენს.
სპორტი და წონა
გაგიკვირდებათ და ქალს წონის კლებაში ყველაზე უკეთ ეხმარება სპორტის ისეთი არაქალური სახეობა, როგორიც ფეხბურთია.
ფიტნესი და სექსი
მეცნიერებმა დაადასტურეს, რომ აქტიური სქესობრივი ცხოვრება დღეგრძელობისა და იმუნური სისტემის ძლიერების საწინდარია, სქესობრივი კავშირი ფიტნესის ერთგვარი სახესხვაობაა, რომლის დროსაც იწვება 200 კალორია, მაღლა იწევს არტერიული წნევა და იმატებს ნივთიერებათა ცვლის ტემპი.