სამკურნალო წერილები - მკურნალი.გე

ჟურნალის რედაქცია

ბუასილი

ბუასილი ბევრს აწუხებს, მაგრამ უმეტესობას ჩემსავით ერიდება ექიმთან მისვლის, ავადმყოფობა კი თავისთავად არ რჩება, მკურნალობა სჭირდება. მე ხალხური საშუალებები მოვიძიე და მივაგენი კიდეც ორიოდე შესანიშნავ რეცეპტს. გიგზავნით, იქნებ სხვასაც გამოადგეს:

• 1 სუფრის კოვზ დაქუცმაცებულ კრაზანას დაასხით 1 ჩაის ჭიქა მდუღარე წყალი, ადუღეთ 15 წუთი, გაფილტრეთ 2-3 ფენა დოლბანდში და მიიღეთ 1/4 ჭიქა დღეში 4-ჯერ.
• 2-3 სუფრის კოვზ გვირილის ყვავილს დაასხით 1 ჩაის ჭიქა მდუღარე წყალი, 1 საათი გააჩერეთ თავდახურულ ჭურჭელში, შემდეგ გაფილტრეთ და მიღებულ წვენში დასველებული ტილოს ნაჭრები კვანძებზე დაიფინეთ. 4-5 დღეში შესანიშნავ შედეგს მიიღებთ.

გასტრიტი უწამლოდ მოვირჩინე

ორიოდე წლის წინ დამჩემდა კუჭის ტკივილი, გულისრევის შეგრძნება. მივედი ექიმთან, ჩამიტარეს გამოკვლევა - აღმომაჩნდა გასტრიტი დაქვეითებული მჟავიანობით. ძალიან დადარდიანებული დავბრუნდი შინ. ბედად, ახლობელი მოსულიყო სტუმრად. ჩემი ამბავი რომ შეიტყო, მითხრა, თუ დამიჯერებ, ისეთ რეცეპტს გასწავლი, უწამლოდ მორჩებიო. დავუჯერე და მადლობის მეტი მართლაც არაფერი მეთქმის - გამოვჯანმრთელდი. თქვენც გასწავლით, როგორ ვიმკურნალე:

დღეში 3-ჯერ ვსვამდი მრავალძარღვას ცოცხალ, ახალგამოწურულ წვენს (კარგად გარეცხილი ფოთლები წვრილად უნდა დაჭრათ, დაჭყლიტოთ და გამოწუროთ). შეიძლება მიიღოთ გამომშრალი ფოთლების ნახარშიც ასეთი წესით:

• 1/2 ჩაის ჭიქა დღეში 3-ჯერ, ჭამამდე 15 წუთით ადრე. ნახარშის მოსამზადებლად 10 გ (2 სუფრის კოვზი) ხმელი მრავალძარღვა დაფშვენით, ჩაყარეთ მომინანქრებულ ჭურჭელში, დაასხით 200 მლ (1 ჩაის ჭიქა) ცხელი წყალი, დაახურეთ თავზე, ადუღეთ წყლის აბაზანაში 30 წუთის განმავლობაში, მერე 10 წუთის განმავლობაში ოთახის ტემპერატურაზე გააგრილეთ და გადაწურეთ. გამოწურეთ დოლბანდში ჩარჩენილი ფოთლებიც. ნახარში საწყის მოცულობამდე (200 მლ-მდე) შეავსეთ ანადუღარი წყლით.

გულძმარვის საუკეთესო წამალი

წლების განმავლობაში მაწუხებდა გულძმარვა, დროდადრო ვმკურნალობდი კიდეც სხვადასხვა საშუალებით, მაგრამ როგორც კი წამლის სმას შევწყვეტდი, 2-3 დღეში ისევ მეწყებოდა. ერთი წლის წინ მეზობელმა რამდენიმე შინაური რეცეპტი მასწავლა, რომლებიც ძალიან მომიხდა. ახლა წამლებს აღარ ვსვამ და როცა გულძმარვა დამეწყება, მეზობლის რეცეპტებით ვუმკლავდები. მინდა, ისინი თქვენს მკითხველსაც ვასწავლო:

ა) აიღეთ 1 ჩაის კოვზი წნორის (თეთრი ტირიფის) დაქუცმაცებული მშრალი ქერქი, დაასხით 2 ჭიქა ანადუღარი ცივი წყალი, დააყენეთ თავდახურულ ჭურჭელში 4 საათი. მიიღეთ 2 სუფრის კოვზი დღეში 3-ჯერ.

ბ) გულძმარვის, გულისრევის შეგრძნების, ბოყინის დროს უებარია კომბოსტოს მწნილი. თუ მას ხშირად მიირთმევთ, გულძმარვა უფრო და უფრო იშვიათად შეგაწუხებთ.

სახსრების ტკივილს დაგიამებთ

ხშირად მაწუხებს სახსრები, განსაკუთრებით მაშინ, როცა ამინდი იცვლება. უამრავი ხალხური საშუალება ვცადე და ბევრი მომიხდა კიდეც, ამ ორ რეცეპტს კი ყველაზე ხშირად და ეფექტურად ვიყენებ:

ა) აიღეთ 1,5 ჩაის ჭიქა ბოლოკის წვენი, 1 ჩაის ჭიქა თაფლი, ნახევარი ჩაის ჭიქა არაყი, 1 სუფრის კოვზი მარილი და კარგად აურიეთ ერთმანეთში. წაისვით მტკივან სახსარზე.

ბ) აიღეთ 1 სუფრის კოვზი თავშავა, 2 სუფრის კოვზი ვირისტერფა, 2 სუფრის კოვზი ჟოლო და ათქვიფეთ. 1 სუფრის კოვზ ამ ნარევს დაასხით 2 ჩაის ჭიქა მდუღარე წყალი. ადუღეთ 10 წუთი, გაწურეთ და მიიღეთ ცხელი ნახარში დღეში 3-4-ჯერ.

კუჭ-ნაწლავს მოგიწესრიგებთ

დამეთანხმებით, წამლები ძალიან გაძვირდა, ამიტომ ბევრი ცდილობს, ხალხური რეცეპტებით გავიდეს იოლას. მეც მათ რიცხვს ვეკუთვნი. უამრავი შინაური წამალი ვიცი და მომავალში სხვა რეცეპტებსაც მოგაწვდით, ამჯერად კი გთავაზობთ კუჭის აშლილობისა და შეკრულობის საწინააღმდეგო წამლების რეცეპტებს.

კუჭის აშლილობის დროს:

ა) აიღეთ 4 ჩაის კოვზი ცირცელის ნაყოფი, 3 ჩაის კოვზი კრაზანა, 2 ჩაის კოვზი ტუხტის ფესვი. 1 სუფრის კოვზ ნარევს დაასხით ნახევარი ლიტრი მდუღარე წყალი, დააყენეთ 1 საათით და გაწურეთ. მიიღეთ დღეში 4-ჯერ, ნახევარ-ნახევარი ჩაის ჭიქა.

ბ) 1 სუფრის კოვზ მუხის ქერქს დაასხით ნახევარი ლიტრი მდუღარე წყალი და დააყენეთ ნახევარი საათით, მიიღეთ თბილ-თბილი ნაყენი დღეში 5-ჯერ.

შეკრულობის დროს:

უებარია შვრიისა და ქლიავის ნახარში, ბოლოკის წვენი, კომბოსტოს მწნილის შემთბარი წვენი - მიიღეთ დღეში 3-ჯერ 1 ჩაის ჭიქა.

ძალზე ეფექტურია კიტრის მწნილის წვენიც, ოღონდ კიტრი 1 თვე მაინც უნდა იყოს მარილწყალში ნადები. მიიღეთ სანელებლების გარეშე 4 ჩაის ჭიქა დღე-ღამეში.

მაღალი არტერიული წნევა

მე და ჩემს მეუღლეს დიდი ხანია მაღალი წნევა გვაქვს. ექიმის დანიშნულებას შეძლებისდაგვარად ვასრულებთ, მაგრამ წამალს ყოველთვის ვერ ვყიდულობთ - ძვირია, აფთიაქიც შორია (სოფლად ვცხოვრობთ). ამიტომ გადავწყვიტე, ხალხური მეთოდებიც მეცადა. ერთგან ამოვიკითხე, რომ მაღალ წნევას ბროწეულის წვენი უხდება. დავიწყე სმა - 30 გ დღეში. წნევა მომეშვა, თავი უფრო მსუბუქად ვიგრძენი. ვსვი ორი თვე, ახლა წნევა ნორმალური მაქვს. ვიცი სხვა რეცეპტებიც და მინდა, გამოცდილება თქვენი ჟურნალის მკითხველს გავუზიარო.

კრიზის დროს:

• აიღეთ 2 სუფრი კოვზი მდოგვი, გახსენით ნახევარ ვედრო წყალში და 15 წუთით ჩაყავით ფეხები.
• აიღეთ 1 ჩაის ჭიქა მიხაკი, წმინდად დაფქვით და შეურიეთ 1 სუფრის კოვზ თაფლს. მიიღეთ, როცა წნევა აგიწევთ. დაიმახსოვრეთ ეს დღე და სამი თვის განმავლობაში ამავე რიცხვში, წნევის უქონლობის შემთხვევაშიც კი, მიიღეთ.
• შალის წინდები დაასველეთ ძმარში, ჩაიცვით და ზედვე შეიშრეთ. კისერი და შუბლი დაიზილეთ ძმრით. პარალელურად აკონტროლეთ წნევა.
• აურიეთ ერთმანეთში ორი სუფრის კოვზი ძმარი და ერთი სუფრის კოვზი არაყი, ამ ნარევით დაიზილეთ ჯერ ზედა და ქვედა კიდურები, მერე - ზურგი და გულმკერდი (უმჯობესია, ამაში ვინმე დაიხმაროთ). ამავე ნარევში დასველებული ტილო დაიდეთ შუბლზე. ფეხები 15-20 წუთით ჩაყავით თბილ ძმრიან წყალში.
• ყვავილობამდე მოკრეფილ 400 გ პიტნას დაუმატეთ 150 გ შაქრის ფხვნილი. დანაყეთ, გამოწურეთ, შეინახეთ მინის ქილაში. მიიღეთ დღეში ორჯერ თითო სუფრის კოვზი ჭამამდე 2 საათით ადრე.
• აიღეთ კაკლის 9 ფოთოლი, დაასხით 1 ლიტრი წყალი და ადუღეთ, ვიდრე სითხე არ განახევრდება. მიიღეთ თითო სუფრის კოვზი დღეში სამჯერ, სანამ წნევა ნორმამდე არ დაიწევს.
• ცხელი აბაზანის შემდეგ გახურებულ ფეხისგულებზე დაიკარით ლეღვის ფოთოლი, სანამ წნევა არ დაიწევს.
• 5-6 ცალ ანწლის ფოთოლს დაასხით 1 ლიტრი წყალი. ადუღეთ, სანამ წყალი არ განახევრდება. მიიღეთ არყის ჭიქით ჭამამდე, დღეში სამჯერ 3-4 დღის განმავლობაში. პარალელურად აკონტროლეთ წნევა.

---

იშიასის მკურნალობის ხალხური მეთოდები

დიდი ხანია, იშიასი მაწუხებს. ხან მოუხერხებლად დავიხრები, ხან ნიავი დამკრავს... უამრავი მეთოდი ვცადე, ის კი არა, ამასობაში საკუთარიც შევიმუშავე... მინდა, რამდენიმე ხალხური რეცეპტი თქვენი ჟურნალის მკითხველსაც ვასწავლო:

• დაიდეთ მტკივან ადგილზე აბაზანაში გაცხელებული ფუტკრის ცვილი. ჯერ - ერთი თხელი ფენა, რათა გაიგოთ, გაუძლებთ თუ არა ამ ტემპერატურას. თუ ცხელია, ოდნავ გააგრილეთ. შპატელით მოიცილეთ საცდელი შრე, წაისვით მტკივან ადგილას 10-15%-იანი დინდგელის, კრაზანას ან ბირკავას ზეთი, ზემოდან კი განიერი ფუნჯით ფენებად დაიდეთ ცხელი ცვილი. ზემოდან ჯერ კომპრესის ქაღალდი დაიფარეთ, მერე - შალის ნაჭერი და დაიტოვეთ, ვიდრე კარგად არ გაგრილდება. შესაძლოა, დაგწვათ, მაგრამ არ შეგეშინდეთ - მოთმინებისთვის სათანადო საზღაურს მიიღებთ. შესაძლოა, ერთი პროცედურის მეტი აღარც კი დაგჭირდეთ.
• აიღეთ იასამნის გამხმარი, დაფშვნილი კვირტები ან 1 ჩაის კოვზი იასამნის ნაყენი და 4 ჩაის კოვზი გახურებული ღორის ქონი, აურიეთ ერთმანეთში, დაიდეთ მტკივან ადგილას, დაიფარეთ კომპრესის ქაღალდი და თბილი შალის ნაჭერი. გაიჩერეთ იმდენ ხანს, რამდენ ხანსაც, ჩვეულებრივ, კომპრესს იჩერებენ.

დაამარცხეთ სურდო

რაც თავი მახსოვს, სულ სურდო მქონდა, ხელში სულ ცხვირსახოცი მეჭირა. ბოლოს და ბოლოს, როცა ამ პრობლემამ მეტისმეტად შემაწუხა, ხალხურ მედიცინას მივმართე და ბევრ კარგ საშუალებას მივაგენი, ყოველ შემთხვევაში, სურდოს მართვა ვისწავლე და დღეს მას თავად ვუმკლავდები. გიგზავნით სურდოს საწინააღმდეგო საშუალებების რეცეპტებს იმ იმედით, რომ სხვებსაც დაეხმარება:

• ღამით ცხვირში ჩაიყარეთ მდოგვის ფხვნილი ან ყოველ საღამოს გაიკეთეთ ფეხების აბაზანა ცხელი მდოგვიანი წყლით. წყალი ისეთი ტემპერატურისა უნდა იყოს, რამდენსაც გაუძლებთ. პროცედურის ხანგრძლივობა 15-20 წუთია.

გაითვალისწინეთ: ფეხის ცხელი აბაზანები არ შეიძლება გულისა და თირკმლის დაავადებების, ორსულობისა და მენსტრუალური ციკლის დროს.

• ალერგიული რინიტის დროს ორივე მკლავი ჩაყავით 37⁰C ტემპერატურის წყალში (წყალი იდაყვებს ოდნავ რომ ასცდეს) და თანდათანობით, ყოველ ორ წუთში - თითო გრადუსით, გაზარდეთ წყლის ტემპერატურა (10 წუთის განმავლობაში ტემპერატურა 43-მდე უნდა აიყვანოთ). პროცედურის ხანგრძლივობა 10 წუთია.
• სურდოს შველის ნივრისა და ნატურალური თაფლის (1:1) ნარევი. ღამით, ძილის წინ, გადაყლაპეთ 1 სუფრის კოვზი და მიაყოლეთ ანადუღარი წყალი.
• არანაკლებ ეფექტურია თაფლისა და კენკრის ნაყენი: თითო სუფრის კოვზ თაფლს, ასკილს, მოცხარს და მოცვს დაასხით 100 მლ მდუღარე წყალი და თბილ, ბნელ ადგილას 15 წუთი გააჩერეთ თავდახურულ ჭურჭელში. ეს ნაყენი მიიღეთ ჭამამდე, 1/2-1/2 ჭიქა, დღეში 2-3-ჯერ.

გაითვალისწინეთ: უკუნაჩვენებია მათთვის, ვისაც ფუტკრის პროდუქტებზე ალერგია აქვს.

როცა სისუსტეს ვერაფერს უხერხებთ

შარშან, გაზაფხულის დამდეგს, ისეთი ძლიერი სისუსტე ვიგრძენი, დილით საწოლიდან ადგომა მეზარებოდა. სამსახურში მუდმივად ვიგვიანებდი და საყვედურს საყვედურზე ვიღებდი. საგონებელში ჩავვარდი, ყველას დახმარებას ვთხოვდი, ზოგი რას მირჩევდა და ზოგი რას. ბოლოს, როგორც იქნა, ვიპოვე საშუალება, რომელსაც ვენდე. თქვენც გთავაზობთ.

• აიღეთ 2 წილი მოცვის ნაყოფი, 3 წილი ჭინჭრის ფოთოლი და 3 წილი ასკილის ნაყოფი. დააქუცმაცეთ და შემდეგ ერთმანეთში აურიეთ. აიღეთ 4 ჩაის კოვზი და დაასხით ერთი ჭიქა მდუღარე წყალი, დააყენეთ 3-4 საათი და შემდეგ გაფილტრეთ.

მიღებული ნაყენი უნდა დალიოთ ერთ დალევაზე. სასურველია, თუ მას დღეში 3-ჯერ მაინც დალევთ. მოცვი, ჭინჭარი და ასკილი მდიდარი ყოფილა ანტიოქსიდანტური თვისებების მქონე ნაერთებით, რომლებიც სხვადასხვა მავნე ნივთიერებით დაბინძურებულ ორგანიზმს საიმედოდ ასუფთავებს და მას ძველ ენერგიასა და ამტანობას უბრუნებს.

• 2 ჩაის კოვზ პილპილის მარცვალს დაასხით 2 სადილის კოვზი ნატურალური თაფლი და კარგად აურიეთ, შემდეგ დაასხით 2 ჭიქა მდუღარე წყალი და ნახევარი საათი ხარშეთ ნელ ცეცხლზე. გადმოდგმის შემდეგ ისევ ნახევარი საათით დააყენეთ თავდახურულ მომინანქრებულ ჭურჭელში და გადაწურეთ.

მიღებული ნახარში დალიეთ დღეში ორჯერ. მკურნალობის კურსი 10 დღეა.