პროსტატის კიბოს განვითარებაში პაპილომავირუსს ადანაშაულებენ
დადასტურებულია, რომ ადამიანის პაპილომავირუსის (HPV) ზოგიერთი შტამი იწვევს საშვილოსნოს ყელის კიბოს, მაგრამ მათი როლი პროსტატის კიბოს განვითარებაში ამ დრომდე გაურკვეველია. ბიოტექნოლოგიისა და ბიომოლეკულური კვლევის სკოლის მკვლევარებმა ჯეიმს ლოუსონმა და ვენდი გლენმა გააანალიზეს 26 წინა კვლევის მონაცემები ამ თემაზე. „მიუხედავად იმისა, რომ HPV არის მხოლოდ ერთ-ერთი იმ მრავალი პათოგენიდან, რომლებიც შესაძლოა ასოცირებული იყოს პროსტატის კიბოსთან, ის ერთადერთია, რომლისთვისაც ჩვენ გვაქვს ეფექტური ვაქცინა, რის გამოც მნიშვნელოვანია მისი როლის გაგება“, - განმარტა ლოუსონმა.
მეცნიერებმა დაადგინეს, რომ HPV-16 და HPV-18 საშვილოსნოს ყელის კიბოს გამომწვევი შტამების დნმ გვხვდება როგორც პროსტატის ნორმალურ ქსოვილში, ასევე პროსტატის კეთილთვისებიანი და ავთვისებიანი სიმსივნეების ქსოვილში. ამავდროულად, როგორც მსოფლიოს სხვადასხვა ქვეყანაში ჩატარებულმა ბოლო კვლევებმა აჩვენა, ავთვისებიანი სიმსივნეების ქსოვილებში გაცილებით მეტია ვირუსის ონკოგენური შტამების არსებობის გენეტიკური კვალი, ვიდრე პროსტატის ჯანსაღ ქსოვილებში.
ამრიგად, პროსტატის კიბოს 1071 შემთხვევიდან 21%-ზე მეტში და კეთილთვისებიანი სიმსივნეების 1103 შემთხვევიდან მხოლოდ 7%-ზე ოდნავ ნაკლებში იყო HPV დადებითი.
უფრო მეტიც, როგორც ლოუსონმა და გლენმა აღმოაჩინეს, სტატისტიკა ნათლად აჩვენებს, რომ არსებობს კავშირი საშვილოსნოს ყელის კიბოსა და პროსტატის კიბოს სიხშირეს შორის: საშვილოსნოს ყელის კიბოსგან მაღალი სიკვდილიანობის მაჩვენებლის მქონე ქვეყნებში ასევე მაღალია სიკვდილიანობის მაჩვენებელი პროსტატის კიბოსგან, და ანალოგიურად, თუ სიკვდილიანობის მაჩვენებელი „ქალის“ კიბოთი დაბალია, მაშინ ნაკლებია სიკვდილიანობა „მამაკაცის“ კიბოთი. „რადგან საშვილოსნოს ყელის კიბო გამოწვეულია HPV-ის ონკოგენური შტამებით, ეს მონაცემები აჩვენებს, რომ ინფექცია, სავარაუდოდ, სქესობრივი გზით გადამდებია და ვირუსით ინფექცია ორივე ტიპის კიბოს საფუძველს უდევს“, - განმარტა ლოუსონმა.
- აქედან გამომდინარე, განსაკუთრებით მნიშვნელოვანია HPV-ის საწინააღმდეგო მასობრივი ვაქცინაცია, - ხაზს უსვამენ მეცნიერები. „ბევრი ფიქრობს, რომ HPV მხოლოდ ქალებში იწვევს კიბოს, მაგრამ ეს შორს არის სიმართლისგან. მამაკაცებში HPV-მ შეიძლება გამოიწვიოს გენიტალური კიბო, ისევე როგორც პირის ღრუს, ენისა და ყელის კიბო. იმის გამო, რომ არსებობს ძალიან კარგი მტკიცებულება იმისა, რომ ვირუსების ეს ჯგუფი ასევე პასუხისმგებელი არიან პროსტატის კიბოს განვითარებაზე, HPV-ის საწინააღმდეგო ვაქცინაციამ შესაძლოა დაგვიცვას ამ დაავადებისგან“, - თქვა ლოუსონმა.