News
აღმოაჩინეს პროტეინების ნაკრები, რომელიც თავის ტვინის 130-ზე მეტი დაავადების განვითარებაში ასრულებს მნიშვნელოვან როლს.
გარდა ამისა, გამოკვლევამ ცხადყო კავშირი ამ დაავადებებსა და ადამიანის ქცევის ევოლუციას შორის. ადამიანის თავის ტვინი ლაბირინთია, რომელიც მილიარდობით ელექტრული და ქიმიური გზით (სინაფსები) ერთმანეთთან დაკავშირებული მილიონობით უჯრედისგან შედგება. თითოეული სინაფსი, თავის მხრივ, შედგება ცილებისგან, რომლებიც ერთიანდება, ქმნის მოლეკულურ სამიზნეს, რომელიც პოსტსინაფსური სიმკვრივის (PSD) სახელწოდებით არის ცნობილი და რომელიც, წესისამებრ, არღვევს სინაფსების მუშაობას, იწვევს დაავადებას და ქცევის ცვლილებებს.
დიდ ბრიტანეთში, Wellcome Trust Sanger-ის ინსტიტუტში, მეცნიერთა ჯგუფმა, რომელსაც პროფესორი გრანტი ხელმძღვანელობდა, ტვინის ოპერაციაგადატანილი პაციენტის სინაფსიდან ამოიღო PSD და პროტეომიკის მეთოდით შეისწავლა მისი მოლეკულური შემადგენლობა (პროტეომიკა არის მეცნიერება ცილის შემადგენლობისა და შენების შესახებ). შედეგად აღმოჩენილ იქნა 1 461 ცილა, რომელთაგან თითოეული შესაბამისი გენით იყო კოდირებული. ამან მეცნიერებს იმ დაავადებათა სისტემატური იდენტიფიკაციის საშუალება მისცა, რომლებმაც სინაფსები დააზიანა. გარდა ამისა, სინაფსის ზუსტი შედგენილობის ცოდნა საჭიროა ტვინისა და ქცევის ევოლუციის შესასწავლად. "აღმოჩნდა, რომ 130-ზე მეტი დაავადება მიმდინარეობს PSD-ს დაზიანებით. ასეთ დიდ რიცხვს არავინ ელოდა. ამ დაავადებებს შორის არის ალცჰაიმერი, პარკინსონი, ეპილეფსია, აუტიზმი და სხვა ნეიროდეგენერაციული დარღვევები", - განაცხადა პროფესორმა გრანტმა.
აღმოჩენილი 100-ზე მეტი ცილიდან ყოველი მეშვიდე ამა თუ იმ დაავადების განვითარებაში მონაწილეობს. ბიოლოგები აღნიშნავენ, რომ PSD-ს პროტეომიკის კვლევა სტრატეგიულად მნიშვნელოვანი "გამშვები პუნქტია" თავის ტვინის დაავადებების კვლევის პროცესში.
"მრავალ დაავადებას მოქმედებაში მოჰყავს ცილების ერთი და იგივე კომბინაცია, ამიტომ ჩვენ შეგვიძლია შევქმნათ წამალი, რომელიც ეფექტური იქნება ერთდროულად რამდენიმე დაავადების დროს", - განაცხადა პროფესორმა. მეცნიერებმა შეადგინეს ადამიანის სინაფსების მოლეკულური ორგანიზაციის "რუკა", რომელიც გვიჩვენებს, როგორ არის მათში დაკავშირებული ცილები მძიმე დაავადების განვითარების შემთხვევაში. მათ იმედი აქვთ, რომ PSD-ს შესახებ არსებული ცოდნა მათ კოლეგებს ტვინის ფუნქციობასთან დაკავშირებული საკითხების მოგვარებას გაუადვილებს.
მეცნიერებმა შეისწავლეს ისიც, თუ როგორ მიმდინარეობდა PSD-ს ცილების ევოლუცია ძუძუმწოვრების განვითარების მილიონი წლის განმავლობაში. პროფესორ გრანტის თქმით, ამ ცილების (რომლებიც, ფაქტობრივად, მართავენ ჩვენს ქცევას) და მათთან დაკავშირებული დაავადებების სტრუქტურა მილიონი წლის განმავლობაში არ შეცვლილა. მაგალითად, მღრღნელებისა და ადამიანების PSD-ს ცილები მსგავსია. ეს კიდევ ერთხელ ამტკიცებს, რომ ვირთხები და თაგვები ადამიანის დაავადებათა დიაგნოსტირებისა და მკურნალობის მეთოდების შესასწავლად ხარისხიან და სანდო მოდელს წარმოადგენენ.
ქრონიკული დაღლილობის სინდრომის საწინააღმდეგო ვაქცინა ხუთ წელიწადში შეიქმნება
უფსალის უნივერსიტეტის კლინიკური ვირუსოლოგიის პროფესორმა იუნას ბლუმბერგმა განაცხადა, რომ უახლოეს 5 წელიწადში შეიქმნება ვაქცინა, რომელიც ადამიანს ქრონიკული დაღლილობის სინდრომისგან დაიცავს.
ბოლოდროინდელი გამოკვლევების თანახმად, აღნიშნული სინდრომი გამოწვეულია იმუნურ სისტემაზე თაგვის ლეიკემიის ქსენოტროპული ვირუსის - XMRV-ის ზემოქმედებით. ვირუსი ქრონიკული დაღლილობის სინდრომის მქონე პაციენტს დაახლოებით ერთი წლის წინ აღმოუჩინა ამერიკელმა სპეციალისტმა ჯუდი მიკოვიცმა.
უფსალის უნივერსიტეტში ჩატარებულმა გამოკვლევამ ვირუსის არსებობა დაუდასტურა რამდენიმე ათეულ მონაწილეს, რომელთა 67% დაავადებული აღმოჩნდა. მეცნიერებს განზრახული აქვთ, უახლოეს მომავალში კიდევ მოიპოვონ ქრონიკული დაღლილობის სინდრომისა და ვირუსის კავშირის დამამტკიცებელი მონაცემები, რათა შესაძლებელი გახდეს მუშაობის დაწყება ვაქცინის შესაქმნელად.
თუ ვირუსთან ქრონიკული დაღლილობის სინდრომის კავშირი საბოლოოდ დადასტურდა, ეს იმის ნიშანი იქნება, რომ დაავადება გადამდებია. პროფესორ ბლუმბერგს მიაჩნია, რომ ვირუსი გადაეცემა ნერწყვის, სისხლის, დედის რძის, დაუცველი სქესობრივი აქტის საშუალებით.
ხახვსა და ნიორს ოსტეოართრიტის განვითარების შეფერხება შეუძლია
ქალები, რომელთა რაციონი მდიდარია ნივრით, ხახვითა და პრასით, მენჯ-ბარძაყის ოსტეოართროზისგან დაზღვეულნი არიან, - ასეთი დასკვნა გამოიტანეს ლონდონის სამეფო კოლეჯისა და ჩრდილოეთ ინგლისის უნივერსიტეტის მეცნიერებმა გამოკვლევის შედეგად. ოსტეოართრიტი აზიანებს მენჯ-ბარძაყის სახსარს, მუხლის სახსარსა და ხერხემალს, რაც იწვევს ტკივილსა და შრომის უნარის დაქვეითებას შუახნისა და ხანდაზმულ ადამიანებში. მკურნალობის ეფექტური მეთოდი ჯერჯერობით არ არსებობს. პაციენტებს სთავაზობენ ოპერაციას ან ტკივილგამაყუჩებლებს.
მეცნიერებმა გამოიკვლიეს 1000 ჯანმრთელი მდედრობითი სქესის ტყუპი. მრავალ მათგანს ართრიტის არავითარი სიმპტომი არ ჰქონდა. მკვლევრებმა ერთმანეთს შეადარეს ტყუპების კვების რაციონი და ჩაატარეს ძვლების სკანირება რენტგენის მეშვეობით, რითაც ზოგიერთ მონაწილეს ართრიტის ადრეული ნიშნები გამოუვლინეს. აღმოჩნდა, რომ ქალებს, რომელთა რაციონიც მდიდარი იყო ნივრითა და ხახვით, გაცილებით ჯანმრთელი სახსრები ჰქონდათ. მიზეზის გასარკვევად მეცნიერებმა ნიორში შემავალი ნაერთები შეისწავლეს. მათი ყურადღება მიიპყრო ნაერთმა, რომელსაც დიალილური დისუფიდი უწოდეს. ის აქვეითებს სახსრის დამაზიანებელი ენზიმების ცვლას.
თაფლი ყველაზე ჯანსაღ და უნივერსალურ პროდუქტად აღიარეს
ძველ საბერძნეთში ათლეტები მთელ ტანზე სპეციალურად ისვამდნენ თაფლს, რათა ძალ-ღონე მომატებოდათ. თაფლი შეიცავს გლუკოზას და ფრუქტოზას, რომლებიც ღვიძლში ცხოველური სახამებლის დაგროვებას იწვევს. მართალია, ერთი კოვზი თაფლის ენერგეტიკული ღირებულება 22 კილოკალორიაა, მაშინ როცა ანალოგიური რაოდენობის შაქრისა 15 კილოკალორიას არ აღემატება, მაგრამ თაფლი უფრო სასარგებლოა, ვინაიდან ის, გლუკოზისა და ფრუქტოზის თანაბარი შემცველობის გამო, ორგანიზმში მოხვედრისთანავე კვებავს ტვინს. ძილის წინ მიღებული 1 ჩაის კოვზი თაფლი ტვინს ღამის განმავლობაში დასვენების საშუალებას აძლევს. ფრუქტოზა ლაგდება ღვიძლში და ელოდება დროს, როდესაც ტვინის გამოკვება გახდება საჭირო. ტვინი ღამითაც განაგრძობს მუშაობას, ამიტომ ენერგიაც სჭირდება.
ჰიპოკრატე თაფლს ყოველდღე მიირთმევდა. ამავე პროდუქტით მკურნალობდა სიფილისს, წყლულებს. თაფლი აძლიერებს იმუნური სისტემის დაცვით ფუნქციას. მას აქვს ანტიბაქტერიული ეფექტი, ეხმარება ორგანიზმს ჭრილობების შეხორცებასა და ინფექციასთან ბრძოლაში.
რამდენიმე წლის წინ დადგენილ იქნა, რომ თაფლი რეზისტენტული მიკროორგანიზმებით გამოწვეულ ინფექციებსაც ებრძვის, რის შემდეგაც მას ოფიციალურად მიეკუთვნა სუპერპროდუქტის სახელი. ექსპერტები გვირჩევენ, თაფლი გამოვიყენოთ ჰერპესის, პაროდონტის დაავადებების, კიდურების ინფიცირებული წყლულების, ფსორიაზის, ეგზემისა და ართრიტების სამკურნალოდ.
პენსილვანიის შტატის სამედიცინო კოლეჯის მეცნიერები ამტკიცებენ, რომ ერთი კოვზი თაფლი გაციების საწინააღმდეგოდ გამოყენებულ ნებისმიერ მედიკამენტზე ეფექტურია. თაფლი ასევე უხდება იმუნოდეფიციტს (დაღლილობა, ხშირი გაციება, ინფექციები, ალერგია). ეს პროდუქტი შეიცავს ვიტამინებს, მინერალებს, ამინმჟავებს, ბიოფლავონოიდებს. დაბოლოს, ის კარგია საჭმლის მონელების დარღვევის დროსაც, რადგანაც მასში შედის სასარგებლო ბაქტერიებიც.