კიბოს უჯრედებზე აღმოაჩინეს საცეცები ჯანმრთელ ქსოვილში შეღწევისათვის
რომელთაც ფილოპოდიები ეწოდებათ. ამ აღმოჩენას კიბოს, ნევროლოგიური მოშლილობისა და სხვა დაავადებების კვლევისთვის აქვს დიდი მნიშვნელობა.
ფილოპოდიები უჯრედის გარეთა მემბრანის ძაფისებრი ფორმის გამონაზარდია. ცნობილია, რომ ფილოპოდიები ასრულებენ სენსორულ ფუნქციას და ეხმარებიან მაგალითად იმუნურ უჯრედებს ბაქტერიების ამოცნობასა და შთანთქმაში. ახალ ნაშრომში მეცნიერებმა აჩვენეს, რომ „საცეცებს“ შეუძლიათ უშუალოდ გადაადგილებაში მონაწილეობის მიღება.
მკვლევარებმა გამოიყენეს ოპტიკური პინცეტი და კონფოკალური მიკროსკოპი, რათა ფიზიკურად დაკვირვებოდნენ აქტინისა და მიოზინის ცილოვანი ძაფების შემოგრეხას. მიღებული მონაცემების საფუძველზე მეცნიერებმა ააგეს ფიზიკური მოდელი, რომლის საშუალებითაც მოხდა იმის დემონსტრირება, რომ მოძრაობა აღმოცენდა სპონტანურად, რადგანაც ცილოვანი მოლეკულები მოთავსებული იყო ფილოპოდიების შიგნით, ვიწრო არხებში.
ეს მექანიზმი აღმოჩენილი იქნა სხვადასხვა უჯრედებში სარძევე ჯირკვლის კიბოდან დაწყებული ადამინის თირკმლის ემბრიონალურ უჯრედებამდე დამთავრებული. მეცნიერები მიიჩნევენ, რომ სწორედ ფილოპოდიები უწყობს ხელს კიბოს უჯრედების ჯანმრთელ ქსოვილში შეჭრას და მეორეული სიმსივნური კერების ფორმირებას.
მკვლევარებმა მომავალში შესაძლებელია იპოვონ კიბოს უჯრედების ფილოპოდიების მუშაობის ბლოკადის საშუალებები, რათა მეტასტაზების წარმოქმნა იქნას შეფერხებული.