ამის შესახებ დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელმა ამირან გამყრელიძემ უწყებათაშორისი საკოორდინაციო საბჭოს სხდომის დასრულების შემდეგ პრესკონფერენციაზე განაცხადა.

როგორც გამყრელიძემ აღნიშნა, ქვეყანაში ეპიდვითარება დასტაბილურებულა, თუმცა, მოსახლეობამ სიფრთხილე მაინც უნდა გამოიჩინოს.

„შეგვიძლია ვთქვათ, რომ ეპიდსიტუაცია ქვეყანაში დასტაბილურდა. ყველა მაჩვენებელი, რაც ეპიდსიტუაციისთვის არის დამახასიათებელი - ახალი შემთხვევების რაოდენობა ბოლო ერთი კვირის განმავლობაში, ასევე ბოლო ორი კვირის განმავლობაში დადებითობის მაჩვენებელი 5%-ს არის ჩამოცილებული, რეპროდუქციის ინდექსი 0,47 გვაქვს დღეს და უკვე კარგა ხანია ინარჩუნებს 1-ზე დაბალ ნიშნულს. ასევე, ყველაზე მძიმე ინდიკატორი - სიკვდილიანობა, ივნის-ივლისის შემდეგ ყველაზე დაბალ ნიშნულზეა, 7 გვაქვს. უკვე შეგვიძლია ვთქვათ, რომ სიტუაცია სტაბილიზირდება, მაგრამ ამან არ უნდა გაგვათამამოს, რადგან ჯერჯერობით გლობალურად ახალი შემთხვევების რაოდენობა მილიონზე ზემოთაა. სერიოზული ეპიდაფეთქებებია ჩინეთის სამხრეთ რეგიონებში, ასევე ჰონკონგში, სამხრეთ კორეაში და ევროპის რიგ ქვეყნებში - ავსტრიაში, შვეიცარიაში, დანიაში. მაგრამ ის, სადაც აცრის მაჩვენებელი მაღალია, იქ არის შემთხვევები, მაგრამ ჰოსპიტალიზაცია და სიკვდილიანობა არ იმატებს“, - განაცხადა გამყრელიძემ.

გამყრელიძემ ასევე ისაუბრა პირბადის გარე სივრცეში ტარების ვალდებულების მოხსნაზე და აღნიშნა, რომ მისი რეკომენდაციაა, იქ, სადაც რამდენიმე ადამიანი იკრიბება მოსახლეობამ პირბადე გარე სივრცეშიც ატაროს.

„ჩემი საექიმო რჩევა იქნება, ჯერჯერობით მაინც ვუფრთხილდეთ ვირუსს, რამეთუ კორონავირუსი ისეთი ვერაგი ვირუსი აღმოჩნდა, რომ სიურპრიზებს უმზადებს კაცობრიობას, რომლის წინასწარ განჭვრეტა ადვილი არ არის. ბევრ ქვეყანაში ახალმა, ჰიბრიდულმა შტამმა დაიწყო ცირკულირება, რომელსაც „დელტაკრონს“, „დელტამიკრონს“ ეძახიან. არის ჯერჯერობით ათეული შემთხვევები, თუმცა, შესაძლებელია ეს გავრცელდეს. წინასწარი მონაცემები ამ შტამის ის არის, რომ „ომიკრონის“ თვისებები სჭარბობს და სწრაფად ვრცელდება. აქედან გამომდინარე, მთავარი რეკომენდაციაა, რომ უნდა ავიცრათ“, - განაცხადა გამყრელიძემ.