კორონავირუსით დაინფიცირების შემთხვევების ზრდის გამო, ჩინეთის ქალაქ სიანის 13 მილიონ მცხოვრებს ქალაქის დატოვება აეკრძალა
ჩინეთის ქალაქ სიანის 13 მილიონ მცხოვრებს ქალაქის დატოვება აეკრძალა. Reuters-ის ინფორმაციით, 9-დან 22 დეკემბრამდე ქალაქში ვირუსის 200-ზე მეტი შემთხვევა დაფიქსირდა, რაც გაცილებით მეტია გასული თვეების მაჩვენებლებზე.
როგორც ცნობილია, ადგილობრივები სიანის დატოვებას მხოლოდ იმ შემთხვევაში შეძლებენ, თუ დამსაქმებლისგან სპეციალური ნებართვა ექნებათ და ამასთან, კორონავირუსის ტესტის უარყოფით პასუხს წარადგენენ. ამასთან, ახალი რეგულაციის მიხედვით, სახლიდან გასვლა ყოველ მეორე დღეს თითოეული ოჯახის მხოლოდ ერთ წევრს ექნება, რომელიც პროდუქტების შეძენის შემდეგ პირდაპირ სახლში უნდა დაბრუნდეს. ადგილობრივი ხელისუფლების ცნობით, ამ დროისათვის ქალაქში „ომიკრონ“ ვარიანტის შემთხვევა არ დადასტურებულა. პანდემიის დაწყების დღიდან ჩინეთში კორონავირუსის 100 644 შემთხვევა დაფიქსირდა, ვირუსს 4 636 პირი ემსხვერპლა.