News
ერთი დღის შემდეგ ამ უჯრედებს ავადმყოფს უნერგავენ. მასპინძლის ორგანიზმში ისინი ემაგრებიან წვრილი ნაწლავის ჯორჯალს - იოგს, რომელიც წვრილ ნაწლავს იჭერს. უჯრედების ეს ნარევი დაახლოებით ორი კვირის შემდეგ თავად კისრულობს დაავადებული ღვიძლის მნიშვნელოვან ფუნქციებს და ნაწილობრივ ან მთლიანად აღადგენს მის მუშაობას. გამოყენებული უჯრედები ღეროვანი არ არის, ამიტომ მეთოდს ეთიკური თვალსაზრისით ზადი არ გააჩნია, მაგრამ აღსანიშნავია, რომ ამ ოპერაციამდე ავადმყოფებს გულდასმით უტარდებათ გამოკვლევები. ოპერაციაზე გასვლის უფლების მოსაპოვებლად პაციენტი საკმაოდ მკაცრ კრიტერიუმებს უნდა აკმაყოფილებდეს, თითქმის ისეთივეს, როგორსაც ღვიძლის გადანერგვის დროს. მედიკოსებს იმედი აქვთ, რომ ახალი მეთოდი ადამიანებს დაეხმარება, დაძლიონ თავიანთი სატკივარი და შეიგრძნონ ჯანმრთელობის სიტკბო.
კუბელებმა C ჰეპატიტის საწინააღმდეგო ვაქცინა შეიმუშავეს
90-იან წლებში კუბაში შეიქმნა ეფექტური ვაქცინა ბ ჰეპატიტის საწინააღმდეგოდ. ახლახან კი კუბელმა ექიმებმა განაცხადეს, რომ შექმნილია ახალი ვაქცინა, რომელიც ც ჰეპატიტისგან ახალშობილთა დასაცავად არის განკუთვნილი. ვაქცინა კუბის გენეტიკისა და ბიოტექნოლოგიის ინსტიტუტში შეიქმნა. პრეპარატს გერბევირონი ეწოდება. მისი გამოცდა უკვე ჩატარდა და ვაქცინის ეფექტურობაც დაადასტურა. კუბაში მას უკვე იყენებენ.
რა სიკეთის მოტანა შეუძლიათ პატიმრებს
პატიმრებს, რომლებსაც C ჰეპატიტის ვირუსის მიმართ ბუნებრივი იმუნიტეტი აქვთ, შეუძლიათ, მედიცინას C ჰეპატიტის საწინააღმდეგო ვაქცინის შექმნაში დაეხმარონ. სამხრეთ უელსის უნივერსიტეტში მეცნიერთა ჯგუფი შეისწავლის იმ პატიმრებს, რომლებიც C ჰეპატიტით არიან ინფიცირებულნი, მაგრამ სისხლში დაავადების კვალი ვერ აღმოუჩინეს და არც კლინიკური სურათი გამოვლენიათ. ასეთი უსიმპტომო მატარებლობა ინფიცირებულთა თითქმის 20%-ში გვხვდება. მეცნიერები რეგულარულად იკვლევდნენ იმ 160 პატიმარს, რომლებიც ვირუსის მატარებლები არ ყოფილან, მაგრამ ჰქონდათ ინფიცირების მაღალი რისკი, ვინაიდან ნარკოტიკების ინტრავენური მომხმარებლები იყვნენ. ამავე ჯგუფში შედიოდნენ ის პატიმრებიც, რომლებიც ხშირად იკეთებდნენ ტატუირებას. ერთი წლის განმავლობაში ც ვირუსით ოთხი მათგანი დაინფიცირდა, მაგრამ კლინიკური სურათი ყველას არ გამოვლენია, მოგვიანებით კი ამ იღბლიანებს სისხლში ვირუსი საერთოდ არ აღმოაჩნდათ. ყველაზე საინტერესო ის არის, რომ ინფიცირებულთა სისხლში ვერც ანტისხეულები აღმოაჩინეს. ამრიგად, რჩება მხოლოდ ერთი ვარიანტი: იმუშავა უჯრედულმა იმუნიტეტმა, უფრო სწორად, თ ლიმფოციტებმა. ექიმები არ გამორიცხავენ, რომ პაციენტები ადრეც ხვდებოდნენ ც ჰეპატიტის ვირუსს და მათმა თ ლიმფოციტებმა დაავადების ამოცნობა "ისწავლეს". მეცნიერებს იმედი აქვთ, რომ დროთა განმავლობაში შექმნიან ვაქცინას, რომელიც თ ლიმფოციტების "გავარჯიშების" პრინციპით იმუშავებს.
ათიდან რვა ინფიცირების პრეტენდენტია
ყოველი 10 ადამიანიდან რვას არ გააჩნია დონორის უსაფრთხო სისხლის მიღების საშუალებაო, ნათქვამია ჯანდაცვის მსოფლიო ორგანიზაციის პრესრელიზში. ორგანიზაციის გენერალური დირექტორის ლი იონგ-ვუკის აზრით, მთავარი პრობლემა ის არის, რომ, ჯერ ერთი, დონორის სისხლი არათანაბრად ნაწილდებ, მეორე კი ის, რომ მედპერსონალმა არ იცის ან სათანადოდ არ ატარებს ინფიცირებული სისხლით ინფექციათა გავრცელების საწინააღმდეგო ღონისძიებებს. პრესრელიზში ნათქვამია, რომ დედამიწის მოსახლეობის 82%-ს დონორის უსაფრთხო სისხლის მიღების გარანტია არ გააჩნია. თქვენ წარმოიდგინეთ, უსაფრთხო სისხლის პრობლემა განვითარებულ ქვეყნებშიც კი დგას. საკმარისია გავიხსენოთ კანადის საავადმყოფოში ც ჰეპატიტით დასნებოვნებული სისხლის გადასხმასთან დაკავშირებული სკანდალი - ეს ტრაგიკული შემთხვევითობა რამდენიმე ათასი ადამიანის დაავადებისა და გარდაცვალების მიზეზად იქცა.
C ჰეპატიტი და მისი სქესობრივი გზით გადაცემის ალბათობა
მეცნიერებმა დაადასტურეს, რომ ც ჰეპატიტი სქესობრივი გზით ნამდვილად გადაედება, თანაც რისკი მით უფრო მაღალია, რაც უფრო ხშირია სქესობრივი კონტაქტი. C ჰეპატიტის შემთხვევათაAთითქმის ნახევარში ვერ ადგენენ, როგორ მოხდა ინფიცირება. ასეთ შემთხვევებში მიიჩნევენ, რომ C ვირუსი სწორედ სქესობრივი გზით გადაეცა. თურქეთის მარმარის უნივერსიტეტის სპეციალისტთა ჯგუფი ც ჰეპატიტით ინფიცირებულ 600 პაციენტს და მათ პარტნიორებს იკვლევდა. მეცნიერები 36 თვის განმავლობაში შეისწავლიდნენ 216 HCV-ნეგატიურ ადამიანში ინფექციის გადაცემის სიხშირეს. გამოკვლევის დასრულების შემდეგ HCV-ნეგატიურ პარტნიორთა 2%-ს ვირუსის ანტისხეულები აღმოაჩნდა. ამასთანავე, დადგენილ იქნა, რომ ასაკსა და თანაცხოვრების ხანგრძლივობას ინფიცირების ალბათობაზე გავლენა არ მოუხდენია. C ჰეპატიტის სქესობრივი გზით გადაცემა მხოლოდ სქესობრივი კონტაქტის სიხშირეზე იყო დამოკიდებული.
ჰომოსექსუალებს დონორობას უკრძალავენ
აშშ-ში ძალაში შედის დონორის ქსოვილების აღებისა და შენახვის ახალი წესები, რომლებიც მათი გამოყენების უსაფრთხოების უზრუნველსაყოფად შეიმუშავეს. მკაცრდება სპერმის ანონიმური დონორობის წესებიც. კერძოდ, ჰომოსექსუალებს სპერმის ჩაბარება აეკრძალებათ, ვინაიდან ისინი აივ-ინფექციის რისკჯგუფში შედიან. მიუხედავად იმისა, რომ შეერთებულ შტატებში დიდი ხანია ფუნქციობს მძლავრი საკანონმდებლო ბაზა, რომელიც სისხლისა და ორგანოების დონორობას ეხება, 150-მდე კერძო კომპანიას, რომლებიც დონორის ქსოვილებთან მუშაობენ, სახელმწიფო თითქმის არ აკონტროლებდა. გართულებათა გახშირებამ FDA-ს (აშშ-ის სურსათისა და მედიკამენტების ადმინისტრაციას) წესების გამკაცრება აიძულა. ამჟამად ყველა დონორის ქსოვილი მოწმდება აივ-ინფექციაზე, ბ და ც ჰეპატიტებზე, ათაშანგზე და კრეიტცფელდ-იაკობის დაავადებაზე. გარდა ამისა, სპერმის დონორებს სქესობრივი გზით გადამდებ სხვა ინფექციებზე - გონორეასა და ქლამიდიოზზეც ამოწმებენ, ხოლო ჰომოსექსუალებს გენეტიკური მასალის ჩაბარება, როგორც ითქვა, საერთოდ ეკრძალებათ. სექსუალურ უმცირესობათა უფლებებისთვის მებრძოლნი ამ დოკუმენტმა აღაშფოთა, თუმცა National Gay and Lesbian Task Force-ის აღმასრულებელმა დირექტორმა მეთ ფორმანმა განმარტა, რომ ახალი წესი შეცდომით იქნა გაგებული - აკრძალვა ანონიმური დონორობის მსურველებს ეხება, ნაცნობისთვის კი ჰომოსექსუალი შეიძლება სპერმის დონორი გახდეს.
რასისტი ვირუსი
გამოკვლევამ ცხადყო, რომ აფროამერიკელებს შორის C ჰეპატიტის მკურნალობის ეფექტიანობა გაცილებით ნაკლებია, ვიდრე მათსავე თანამემამულე თეთრკანიანებს შორის. ამერიკის დიუკის უნივერსიტეტის სამედიცინო ცენტრში 100 თეთრკანიან და 100 აფროამერიკელ პაციენტს აკვირდებოდნენ. ალფა-2ბ პრეინტერფერონითა და რიბავირინით კომბინირებული თერაპიის დაწყებიდან 6 თვის შემდეგ 52 თეთრკანიან ავადმყოფს სისხლში ვირუსი ვეღარ აღმოუჩინეს, ხოლო აფროამერიკელებს შორის ეს მაჩვენებელი მხოლოდ 19 შემთხვევაში აღმოჩნდა დადებითი. არჩევითობის მიზეზი ჯერჯერობით გაუგებარია. მეცნიერებს განზრახული აქვთ, დაკვირვება განაგრძონ.