პაციენტის თავდასხმის შემდეგ ექიმს ტვინის შერყევა, ჭრილობა და სხეულის დაჟეჟილობები აღენიშნება
საავადმყოფოს კლინიკურის დირექტორის ზაზა ლურსმანაშვილის განცხადებით, ექიმს ქირურგიული ჩარევა დასჭირდა და ჯერჯერობით სტაციონარში რჩება. „აქვს ტვინის შერყევა, ასევე, მიყენებული აქვს ჭრილობა და სხეულის ზოგიერთ უბანზე დაჟეჟილობებიც აღენიშნება. ამ ეტაპზე მისი ჯანმრთელობის მდგომარეობა სტაბილურია“, - აღნიშნა ზაზა ლურსმანაშვილმა.
მისივე თქმით, პაციენტმა, რომელმაც ექიმს ფიზიკური შეურაცხყოფა მიაყენა, მიქაელ მთავარანგელოზის სახელობის საავადმყოფო ნებაყოფლობით დატოვა.
მიქაელ მთავარანგელოზის კლინიკური საავადმყოფოს ექიმზე თავდასხმა გუშინ მოხდა. არსებული ინფორმაციით, პაციენტი ექიმისგან ნარკოტიკულ საშუალებას ითხოვდა, რომლის მიღებაზე უარის შემდეგ, ექიმს ფიზიკური შეურაცხყოფა მიაყენა.
მომხდართან დაკავშირებით შინაგან საქმეთა სამინისტრომ გამოძიება სისხლის სამართლის კოდექსის 126-ე მუხლით დაიწყო, რაც ძალადობას გულისხმობს. ამასთან, უწყებამ ინციდენტში მონაწილე პაციენტი უკვე გამოავლინა.