შოპინგი ორ ხმაში
19.01.2009
არსებობს მოარული აზრი, რომ მამაკაცებს არ უყვართ საყიდლებზე სიარული. ცხადია შოპინგი რთული და ხანგრძლივი საქმიანობაა, მაგრამ ზოგჯერ მაღაზიაში ერთად წასვლა აუცილებელია.
არსებობს საგნები, რომლებსაც მამაკაცები სიამოვნებით ყიდულობენ: საყოფაცხოვრებო ტექნიკა, ინსტრუმენტები, ავტონაწილები... ცხადია, არსებობს ისეთი ნივთებიც, რომელთა ავ-კარგში მამაკაცები სრულიად ვერ ერკვევიან, ისიც კი არ იციან, რა საჭიროა ესა თუ ის საგანი. გარდა ამისა, ქალები და მამაკაცები საყიდლების მიმართ სხვადასხვანაირად არიან განწყობილნი.
- მამაკაცმა მაღაზიაში შესვლისთანავე იცის, რა სურს. იგი მიემართება საჭირო განყოფილებისკენ, იღებს საქონელს, სინჯავს და თუ მოეწონა, ყიდულობს. მამაკაცისთვის შოპინგი გარემოებებით ნაკარნახევი აუცილებლობაა.
- თუ ქალი რამდენიმე წესს დაიცავს, შესაძლოა, მეორე ნახევრის ტანჯვა-წამებაც შეამციროს და სიმშვიდე თვითონაც შეინარჩუნოს.
- თუ მამაკაცი შოპინგის კატეგორიული წინააღმდეგია, მარტომ შემოიარეთ ყველა სავაჭრო წერტილი, შეათვალიერეთ ყველა საჭირო ნივთი და მერეღა წაიყვანეთ ქმარი წინასწარ დაზვერილ ადგილებში.
- თუ მამაკაცი თანახმაა, თქვენთან ერთად იაროს მაღაზიებში, ყველა განყოფილებას ნუ მოივლით, ყველა თაროსა თუ ვიტრინასთან ნუ შეჩერდებით. იარეთ მიზანმიმართულად. მან უნდა იცოდეს, რას ეძებთ. ამ შემთხვევაში ის თვითონაც სიამოვნებით დაგეხმარებათ.
- ნუ აიძულებთ მამაკაცს წვრილმანებისთვის მაღაზიებში ხეტიალს. საცვლების, წინდებისა და ამგვარი ნივთების შეძენა მარტოც შეგიძლიათ.
- მამაკაცების უმრავლესობა ძალიან პრაქტიკულია, ამიტომ სეზონური ფასდაკლება თქვენი კოზირია.
- ერიდეთ მაღაზიაში პიკის საათებში სიარულს. სავაჭრო ცენტრებში მყიდველთა სიუხვე მამაკაცს გააღიზიანებს.
- ნუ ჩააყენებთ თქვენს თანამგზავრს რიგში.
- მამაკაცს უჭირს არჩევანის გაკეთება, ამიტომ ნუ შესთავაზებთ რამდენიმე ერთნაირ საგანს, თორემ თავს არაკომფორტულად იგრძნობს.
- არ დაგავიწყდეთ, შოპინგის დასასრულს მადლობა გადაუხადოთ მოთმინებისა და გულუხვობისთვის.
