- მაქვს 2-ე სტადიის ბუასილი არ მტკივა სისხლი საერთოდ არ მომდის ექიმმა მითხრა მეორე სტადიისააო მაგრამ სულ არ მაწუხებს უბრალოდ ცოტა დისკომფორტს ვგრძნობ და ისიც შეიძლება იმიტომ რომ ძალიან დაშინებული ვარ ამ დაავადებით. სანთლებს ვიკეთებდი დავამთავრე რაღაც მალამოს ვისმევ ეხლა და შესაძლებელია რომ განვიკურნო ქირურგიული ჩარევის გარეშე? დიდი მადლობა წინასწარ ;(

- შესაძლებელია სწორი რეჟიმის დაცვითა და მკურნალობით დაავადების ხანგრძლივი რემისიის (ჩაცხრობის) მიღწევა, თუმცა ცხოვრების წესის დარღვევისას (არსწორი დღის რეჟიმი, ალკოჰოლი, კვების რეჟიმის და რაციონის დარღვევა) დაავადება შეიძლება ისევ გამწვავდეს.
I და II სტადიის ბუასილის დროს გამოიყენება მკურნალობის კონსერვატიული მეთოდი - მალამოები და ორალური (შინაგანად მისაღები) ფლებოტროპული პრეპარატები, რომლებიც სიმპტომატიკის სწრაფ და თვალსაჩინო უკუგანვითარებას უზრუნველყოფს.
ბუასილის კლინიკური მანიფესტირების (ტკივილის, სისხლდენის, დისკომფორტის) შემთხვევაში ავადმყოფმა დროულად უნდა მიმართოს პროქტოლოგს, რათა დაავადება არ გართულდეს და საჭირო არ გახდეს მკურნალობის ქირურგიული მეთოდის გამოყენება.
ქირურგიულ მეთოდს დაავადების III-IV სტადიებში მიმართავენ. ის ბუასილის კვანძების რადიკალურ მოცილებას ითვალისწინებს. მკურნალობის ეს მეთოდი იძლევა გარანტიას, რომ დაავადების რეციდივი თავიდან იქნება აცილებული.
ბუასილის შესახებ მეტი ინფორმაციის მისაღებად წაიკითხეთ ჩვენს საიტზე ენციკლოპედიების რუბრიკაში - ასო-ბგერა ბ-ზე - "ბუასილი", და ლალი ჩხიკვაძის ინტერვიუ ექიმ-პროქტოლოგ, მედიცინის დოქტორ, პროფესორ რომან პირტახიასთან "უხერხული პრობლემის დელიკატურად გადაჭრის გზები".