-რა არის ასა? სპერმაში და სისხლში მაღალი მაქვს

- ასა ეს არის ანტისპერმული ანტისხეულები (იმუნოგლობულინები - IgG, IgA, IgM), რომლებიც წარმოიქმნებიან მამაკაცის და/ან ქალის რეპროდუქციული სისტემის სხვადასხვა უბანში და სპერმატოზოიდის სხვადასხვა ნაწილის წინააღმდეგ არიან მიმართულნი. 
ანტისხეულების გავლენა მრავალმხრივია. სახელდობრ, მათი ზემოქმედების შედეგია:
_სპერმატოზოიდების მოძრაობის შეზღუდვა. ამ დროს ანტისხეულები სპერმატოზოიდის მემბრანას სხვადასხვა ადგილას ემაგრებიან, იწვევენ სპერმატოზოიდების აგლუტინაციას (შეწებებას) და აფერხებენ მათ მოძრაობას. რამდენად შეასუსტებენ ანტისხეულები სპერმატოზოიდების მოძრაობის უნარს, მათ რიცხვსა და ფიქსაციის ადგილზეა დამოკიდებული;
_სპერმატოზოიდების მოძრაობის ბლოკადა საშვილოსნოს ყელის ლორწოში.
_კვერცხუჯრედის გარსში სპერმატოზოიდების შეღწევის შეფერხება.
_გარდა ამისა, ანტისპერმული ანტისხეულები ნაყოფის ზრდა-განვითარებაზეც ახდენენ გავლენას.
მამაკაცის გამოკვლევისას ანტისპერმული ანტისხეულები უმჯობესია სპერმაში განისაზღვროს.
ქალის გამოკვლევისას ანტისპერმული ანტისხეულები უნდა განისაზღვროს როგორც ცერვიკალური სითხის ასპირატში, ისე სისხლის პლაზმაში.
უნაყოფობის ამ ფორმის დროს მოწოდებულია მკურნალობის მრავალი სქემა, რომელიც ეტაპობრივად ხორციელდება. პირველი ეტაპზე სასურველია ყველა იმ მიზეზის აღმოფხვრა, რომელმაც შეიძლება აღნიშნული პრობლემა გამოიწვიოს. ასეთია უროგენიტალური ინფექციები, ვარიკოცელე, თესლგამომტანი გზების დახშობა და სხვა.