როგორ მოქმედებს მაღალი არტერიული წნევა თავის ტვინზე
ჰიპერტენზიას შეუძლია სერიოზულად იმოქმედოს ტვინის სისხლძარღვებზე, რამაც გამოიწვიოს მათი ფორმის შეცვლა, გამკვრივება და არტერიების ჩაკეტვა. როდესაც არტერიული წნევა გაზრდილია, იგი გადაეცემა უფრო დიდი სისხლძარღვებიდან თავის ტვინის მცირე სისხლძარღვებზე, რაც იწვევს მათ დისფუნქციას და მდგომარეობას, რომელიც ცნობილია, როგორც მცირე სისხლძარღვების დაავადება.
გარდა ამისა, მაღალმა წნევამ შეიძლება დააზიანოს თეთრი ნივთიერება ტვინში.
თეთრი ნივთიერება შედგება ნერვული ბოჭკოებისგან, რომლებიც გადასცემენ ინფორმაციას ტვინის სხვადასხვა რეგიონებს. ამ უბნების დაზიანებამ შეიძლება გამოიწვიოს შემეცნებითი ფუნქციის დარღვევა და ინსულტის რისკის გაზრდა.
კვლევისთვის პროფესორთა გუნდმა გამოიყენა ტვინის მაგნიტურ-რეზონანსული ტომოგრაფიის და გენეტიკური ანალიზის კომბინაციის შედეგები, ასევე დიდი ბრიტანეთის ბიობანკის და არტერიული წნევის საერთაშორისო კონსორციუმის ათასობით მონაწილის მონაცემები.
ანალიზის შედეგად, მკვლევარებმა გამოავლინეს ცვლილებები ტვინის ცხრა უბანში, რომლებიც დაკავშირებული იყო არტერიულ წნევასთან და კოგნიტური ფუნქციის გაუარესებასთან. ერთ - ერთი უბანი, სადაც ცვლილებები შეინიშნებოდა ოყო პუტამენი, რომელიც პასუხისმგებელია სწავლასა და მოტორულ კონტროლზე. ზოგიერთი კვლევა პუტამენის ფუნქციების დარღვევას ალცჰაიმერის დაავადების განვითარებასაც უკავშირებს.
ეს ყველაფერი ხაზს უსვამს არტერიული წნევის მონიტორინგისა და მენეჯმენტის მნიშვნელობას, რათა თავიდან იქნას აცილებული თეთრი ნივთიერების დაზიანება და მასთან დაკავშირებული კოგნიტური დარღვევები.
