პრობლემები და ფსიქოლოგიური დახმარება - მკურნალი.გე

ნანა კალანდაძე

,

• "ჩემი ქმარი უამრავ დროსა და თანხას ახარჯავს მანქანას. მზად არის, ყველაფერი მოიკლოს, ოღონდ კი ავტომობილისთვის საუკეთესო შეიძინოს. დამღალა მასთან ომმა! როგორ მოვიქცე?"

საინტერესოა, ასე ძალიან რატომ ზრუნავს მანქანაზე თქვენი მეუღლე. იქნებ ის მისთვის პრესტიჟის სიმბოლოა? თუ ასეა, სცადეთ, მისი ყურადღება სოციალური სტატუსის სხვა ატრიბუტებზე: ტანსაცმელზე, ფეხსაცმელზე, ჯანმრთელობის მდგომარეობაზე - გადაიტანოთ. შესაძლოა, თქვენს ქმარს უსაფრთხოება აღელვებს. უთხარით, რომ როდესაც ადამიანი ავტომობილის სრულყოფაზე უსასრულოდ ზრუნავს, დაზიანების ან გაუმართაობის აღმოჩენა უფრო მეტად უჭირს. როცა დაინახავს, რომ მხოლოდ სიძუნწე არ გამოძრავებთ, ყურს მიუგდებს თქვენს რჩევას და შესაძლოა, თქვენი აზრიც გაიზიაროს.

• "ბოლო ხანებში სტუმრად წასვლა აღარ მინდა - როცა ჩემი ახლობლების გარემონტებულ, ძვირფასი ავეჯით მორთულ ბინებს ვხედავ, ჩემი ბინის მოკრძალებული იერი კიდევ უფრო მაღიზიანებს..."

როგორც თვითონვე აღნიშნავთ, საკუთარი ბინით უკმაყოფილების განცდა ნაცნობებთან ვიზიტის შემდეგ გიპყრობთ. მეეჭვება, რომ ჩვეულებრივი შური გამოძრავებთ. ეცადეთ, სიტუაციას სხვა კუთხით შეხედოთ: აღიქვათ საკუთარი ბინა როგორც თქვენი ინდივიდუალობის ანარეკლი. გემოვნებაზეც, როგორც ცნობილია, არ დაობენ. თქვენი სახლის ინტერიერი საგრძნობლად განსხვავდება სხვათა ინტერიერისგან? ეს იმას ნიშნავს, რომ თქვენ შეძელით გამოგეხატათ საკუთარი წარმოდგენა სტილსა და სილამაზეზე.

• "არ ვიცი, როგორ გადავლახო სტომატოლოგის შიში. ექიმთან მისვლას იმდენ ხანს ვაჭიანურებ, რომ კბილები საბოლოოდ მიფუჭდება და შემდეგ მკურნალობა უამრავი თანხა მიჯდება..."

ალბათ, საკმაო ხანი დაგჭირდებათ, რომ კბილის ექიმთან მისასვლელად განეწყოთ. შეგიძლიათ, უბრალოდ ეჩვენოთ ექიმს, მიიღოთ რჩევა, შემდეგ კი ერთგვარი ტაიმ-აუტი აიღოთ და ფსიქოლოგიურად მოემზადოთ პროცედურებისთვის. რეგულარული შემოწმება მხოლოდ კბილებს კი არ წაადგება სასიკეთოდ, არამედ შიშთან გამკლავებაშიც დაგეხმარებათ.

• "გამუდმებით ვყიდულობ ლატარიის ბილეთს. მესმის, რომ მოგების შანსი არც ისე დიდია, მაგრამ მოვკრავ თუ არა თვალს ბილეთების ჯიხურს, ფეხებს ჩემდაუნებურად მისკენ მივყავარ. თითქოს ვიღაც ჩამძახის, რომ ამჯერად აუცილებლად გამიმართლებს. ამას წინათ ვიანგარიშე, რამდენი ფული დავხარჯე ლატარიის ბილეთებზე მთელი წლის განმავლობაში - საკმაოდ დიდი თანხა გამოვიდა. ნუთუ აზარტული თამაშებისკენ მაქვს მიდრეკილება?!"

თქვენს გატაცებას ერთმნიშვნელოვნად დამოკიდებულებას ვერ დავარქმევთ, თუმცა ფაქტია, მას თქვენთვის ნეგატიური ემოციები უფრო მოაქვს, ვიდრე დადებითი. გამდიდრებაზე ოცნებობთ? ეცადეთ, ამისთვის სხვა გზა იპოვოთ. მაგალითად, როცა ლატარიის ბილეთების შეძენას გადაწყვეტთ, საჭირო თანხა, უბრალოდ, გადადეთ, შემდეგ კი ბანკში შეიტანეთ. გარდა ამისა, დაიწყეთ მაღალანაზღაურებადი სამუშაოს ძებნა, რომლის წყალობითაც მატერიალური მდგომარეობის გაუმჯობესებაზე ოცნება სწრაფად იქცევა რეალობად.

• "შეფი ჩემს არც ერთ თანამშრომელს არ უყვარს, მხოლოდ მე ვიცავ. მიმაჩნია, რომ ის პროფესიონალია, თუმცა შესაძლოა, არცთუ ისე სასიამოვნო პიროვნება იყოს. როდესაც კოლეგები მას ჩემი თანდასწრებით აკრიტიკებენ, მე მხარს არ ვუბამ. საქმე იქამდე მივიდა, რომ აღარ მენდობიან. ეჭვის თვალითაც კი მიყურებენ. როგორ მოვაგვარო მათთან ურთიერთობა?"

ეცადეთ, ხშირად გამოხატოთ თქვენი კეთილგანწყობა კოლეგების მიმართ. მშვიდად გამოთქვით საკუთარი აზრი, სხვებს ის არამც და არამც არ მოახვიოთ თავს. ჰკითხეთ თანამშრომლებს, რატომ არ უყვართ უფროსი, რა აღიზიანებთ მასში, შესთავაზეთ შესაძლო გამოსავალი. როცა თქვენს გულწრფელ თანაგრძნობას დაინახავენ, ნდობა თანდათან დაუბრუნდებათ და აღარ გაგრიყავენ.

• "მართალია, ჩემი ძაღლი ჯიშიანი არ არის, მაგრამ ძალიან ჭკვიანი და კარგად აღზრდილია. როცა სასეირნოდ მიმყავს, ხშირად გვხვდება მეზობელი ქალი თავის პუდელთან ერთად. ის ყოველთვის უხეშად და მკაცრად მომმართავს, მოითხოვს, მისგან და მისი ძაღლისგან შორს დავიჭირო თავი, რადგან მიაჩნია, რომ ჩემი ძაღლი აგრესიული და ჭუჭყიანია. ყელში ამომივიდა მისი საქციელი! როგორ მოვიქცე?"

თქვენს ძაღლს თქვენსავით არავინ იცნობს. სწორედ ასე უთხარით თქვენს მკაცრ მეზობელს. ამასთანავე, ეცადეთ, გამოიჩინოთ კეთილგანწყობა, ტაქტი. ყურადღებას ნუ მიაქცევთ შეურაცხყოფას. ამ ქალბატონს საყვარელი ძაღლის შესახებ საუბარი გაუბით, უთხარით რამდენიმე კომპლიმენტი. როდესაც ის თავისი პუდელის ღირსებების ჩამოთვლას მოჰყვება, თქვენ თქვენი ცუგას შესახებ უამბეთ. სასაუბრო თემა გაგიჩნდებათ, ერთმანეთს უკეთ გაიცნობთ და თქვენი ძაღლის მიმართ აგრესიაც გაუვლის.

• "ვცხოვრობ მარტო. მყავს გოგონა. პირადი ცხოვრება ვერაფრით ავაწყვე, თუმცა გარეგნობას არ ვემდური. პრობლემა სხვა რამ არის: შინაგანად დავიცალე, მეტისმეტად გულჩათხრობილი გავხდი და საკუთარი ნაჭუჭიდან გამოსვლა არ მინდა. ალბათ, მამაკაცები გრძნობენ ამას და ამიტომაც არ მეკარებიან. ფსიქოლოგიურ ტრეინინგებზე სიარული ვცადე, მაგრამ ვერ მიშველა. არ ვიცი, რა გზას დავადგე."

ადამიანი მუდმივად უნდა ისწრაფოდეს, შეივსოს შინაგანი სიცარიელე, და არა მხოლოდ იმისთვის, რომ საპირისპირო სქესის ყურადღება მიიპყროს, არამედ იმისათვისაც, რომ მოიპოვოს სულიერი კომფორტი და უფრო ჰარმონიული ურთიერთობა დაამყაროს გარესამყაროსთან. მამაკაცები მშვენივრად გრძნობენ, როდის არის ქალი შეპყრობილი პარტნიორის ძებნის ჟინით, ამან კი, დამეთანხმეთ, არ შეიძლება ისინი არ დააფრთხოს. იფიქრეთ საკუთარ თავზე, ეძებეთ გატაცება, ეცადეთ, ხშირად გამოჩნდეთ საზოგა-დოებაში გოგონასთან ერთად. საინტერესო, თავდაჯერებული და ენერგიული ქალი, რომელიც სიცოცხლეს შეხარის, აუცილებლად მიიპყრობს ყურადღებას. ასეთ ადამიანთან ურთიერთობის, მისი გაცნობის, მასთან დაახლოების სურვილი ბევრს გაუჩნდება. მენდეთ, როგორც კი საკუთარი თავის მიმართ დამოკიდებულებას შეიცვლით, მამაკაცების ყურადღებასაც მაშინვე იგრძნობთ.

• "ვიცი, რომ ჩემი ძმის მეგობარს მოვწონვარ, მას არაერთხელ უთქვამს ამის შესახებ. დიდი ხანია ველოდები, რომ პაემანს დამინიშნავს, მაგრამ ის რატომღაც სხვა გოგონებს ხვდება. როგორ მოვიქცე?"

როგორც ჩანს, ის აბრკოლებს, რომ მისი მეგობრის და ხართ. ლოდინით დაიღალეთ? ინიციატივა თავად გამოიჩინეთ და მისი გაუბედაობის მიზეზი ჰკითხეთ.