პრობლემები და ფსიქოლოგიური დახმარება
მყავს მეგობარი მამაკაცი. ერთხელ ჩემი ხელფასით დაინტერესდა. მომეჩვენა, რომ შეცბა, როცა საკმაოდ სოლიდური თანხა დავასახელე. როცა ანალოგიური კითხვა დავუსვი, პასუხს თავი აარიდა. როგორც ჩანს, ახლა ნაწყენია ჩემზე იმის გამო, რომ ჩემი შემოსავალი მისაზე მაღალია... როგორ მოვიქცე?
- როგორც ჩანს, თქვენ მართალი ხართ. მიხვდით, რომ თქვენი საყვარელი მამაკაცი ჯერჯერობით ისე წარმატებული არ არის, როგორც თქვენ. ბუნებრივია, მან ამის გამო უხერხულობა იგრძნო და აღარ სურს ამ თემაზე საუბარი. იმისათვის, რომ თავი დათრგუნულად არ იგრძნოს, შეეცადეთ ხშირად დაინტერესდეთ მისი აზრით იმ სფეროში, რომელშიც ნამდვილად კომპეტენტურია. ასე უფრო თავდაჯერებულად იგრძნობს თავს და ის უხერხულობაც თანდათანობით გაუვლის. განცდა იმისა, რომ თქვენ რაიმე უპირატესობა გაქვთ, შენელდება, ურთიერთობაც მოწესრიგდება და მხოლოდ ამის შემდეგ შეგიძლიათ დაუბრუნდეთ მის გამომუშავებულ თანხაზე საუბარს.
ძალიან დამღალა დედის კონტროლმა. როცა თავის საქმეებზე მიდის, ეშინია ჩემი შინ მარტო დატოვება. როცა მეგობრებთან ერთად ვსეირნობ, ყოველ საათში ერთხელ მირეკავს და მამოწმებს. საერთოდ არ მენდობა! მე მგონია, ამის მიზეზი მხოლოდ ჩემი ასაკი არ არის...
- უნდობლობისა და ეჭვების გაფანტვა შესაძლებელია გულახდილი საუბრით. უთხარით დედას და დაწვრილებით აუხსენით, რომ მისმა ზედმეტმა ყურადღებამ და კონტროლმა ამა თუ იმ კონკრეტულ შემთხვევაში როგორ უხერხულ მდგომარეობაში ჩაგაგდოთ და რა უსიამოვნო შედეგები მოჰყვა ამას. აღწერეთ თქვენი განცდები, ესაუბრეთ თქვენს გრძნობებზე და საპასუხო გულახდილობა მოითხოვეთ მისგანაც.
ჩემი სამუშაო მხოლოდ უარყოფით ემოციებს იწვევს ჩემში. ვერანაირ სიამოვნებას ვერ მანიჭებს. მინდა სხვა სამუშაოს, საინტერესო საქმეს მივყო ხელი, მაგალითად, ვიმუშაო ჟურნალისტიკაში, მაგრამ გადაწყვეტილების მიღება მიჭირს.
- საინტერესო სამუშაოს პოვნა ადვილი საქმე არ გახლავთ. იმისათვის, რომ გრძნეულ წრეს თავი დააღწიოთ, დიდი ძალისხმევაა საჭირო. გამოსცადეთ თქვენი თავი ახალ სფეროში. შეეცადეთ დაწეროთ სტატია, როგორც დამატებითი შემოსავლის წყაროს გაჩენის საშუალება, და ნახეთ, რა გამოვა ამისგან, მიიღებთ თუ არა სიამოვნებას ასეთი შემოქმედებითი საქმიანობისგან.
ჩემი ახლობლები ჩემს წარმატებებს უმნიშვნელოდ თვლიან. მე სხვა ქალაქიდან ჩამოვედი და ჩავაბარე ინსტიტუტში. სწავლა არც ისე იოლია, თუმც პირველი კურსის გამოცდები ცუდად არ ჩამიბარებია, მაგრამ ჩემს მშობლებს სურთ, მხოლოდ უმაღლესი შეფასებები მქონდეს. გამუდმებით ლაპარაკობენ "მაღალ" ნიშნებზე და თან მთხოვენ, არ ვინერვიულო, თუ "უმაღლესი" შეფასებები არ მექნება. ამავე დროს კი სულ მოითხოვენ ჩემგან, გამოცდები ვადაზე ადრე ჩავაბარო...
/* (c)AdOcean 2003-2021, Advertline.https:mkurnali.ge.mkurnali zones.________ _____ */
ado.slave('adoceanadvertlinegelpmmhkfobb', {myMaster: 'gC_g7BxQlx9UWDeCK7yaEdkgIoxg2l6o6JUmNs2rvgn.i7' });
- ალბათ, აუცილებლად უნდა გაარკვიოთ მშობლებთან, კონკრეტულად რას ელიან თქვენი სწავლისგან. იქნებ თქვენს სწავლაზე სულაც არ ამყარებენ ისეთ იმედებს, რომელთა ვერგამართლებაც ასე გაშინებთ? შესაძლოა, იმიტომაც ღელავენ, რომ ჰგონიათ, ფრიადოსნობის სურვილი გაქვთ და ძალიან განიცდით, დაბალ შეფასებებს. ხოლო სესიების ვადამდელ ჩაბარებაზე კი მხოლოდ იმიტომ საუბრობენ, სურთ, რაც შეიძლება მალე ჩახვიდეთ მათთან არდადეგებზე. ყველაზე მთავარი ამ სიტუაციაში არის ის, რომ პირველ ყოვლისა, თქვენვე იყოთ კმაყოფილი თქვენი მეცადინეობითა და სწავლით.
ჩვენი შეხვედრის შემდეგ მთელი წელი გავიდა, მე კი ვერაფრით ვახერხებ ამ ახალგაზრდა კაცის დავიწყებას. ეს იყო ერთი ნახვით შეყვარება, მე კი ჩემი გულუბრყვილობისა და მორიდებულობის გამო ვერ მოვახერხე მისთვის ჩემი ტელეფონის ნომრის დატოვება. მას შემდეგ განვიცდი და თავისთვის ვერ მიპატიებია... როგორ მოვიქე?
- შემთხვევითი ნაცნობის შესახებ აკვიატებული აზრები შეიძლება იყოს შირმა, რომლის უკანაც ცდილობთ დაემალოთ სხვა პრობლემებს, რომელთაც ვერ წყვეტთ. ხომ არ არის თქვენს ცხოვრებაში პრობლემები, რომლებსაც გაურბიხართ? რაც შეეხება თქვენს ერთი ნახვით შეყვარებას: ხომ არ აიდეალებთ ამ ყმაწვილს? იქნებ ისე მოხდეს, რომ თქვენ მას კიდევ შეხვდეთ, მაშინ კი ძალიან გაგიჭირდებათ რეალურ ადამიანთან შეხვედრა.
ჩემი და ყველა თავისი პრობლემის გამო მე მადანაშაულებს. ვერ მიტანს. როცა ვკამათობთ ან სერიოზულად ვჩხუბობთ, ხშირად მეუბნება, რომ "წავართვი ბავშვობა" და "დავუმახინჯე ცხოვრება" . ორივეს უკვე ჩვენ-ჩვენი ოჯახი გვაქვს და თითქოს გასაყოფიც არაფერი უნდა გვქონდეს. როგორ შეიძლება ეს ურთიერთობა მოგვარდეს?
- თქვენი დის წყენის მიზეზი ძალიან ღრმაა და მოძველებული. ბავშვებს შორის ასეთი მტრული დამოკიდებულების მიზეზი, ჩვეულებრივ, არის ხოლმე მშობლების არასწორი ქცევა, რომელთაც არ იციან კეთილსასურველი ატმოსფეროს შექმნა ოჯახში, რათა დებს ან ძმებს შორის აღარ წარმოიშვას კონკურენციის გრძნობა. თუმცა არც თქვენი და არის მართალი. მორიგი ჩხუბის დროს ნუ წამოეგებით პროვოკაციას და დაეთანხმეთ მას, რომ ბევრი რამ თქვენ ურთიერთდამოკიდებულებაში არ იყო სწორი. ჰკითხეთ დას, მისი აზრით, რა შეიძლება შეცვალოთ, რომ შეწყდეს თქვენ შორის გაუთავებელი უთანხმოება.
დიდი ხანია მიყვარს ცოლიანი მამაკაცი და ვოცნებობ, მისგან შვილი ვიყოლიო. ვიცი, ცოლს არ მიატოვებს, სამაგიეროდ, მე მეყოლება ბავშვი, რომელიც ჩემი საყვარელი მამაკაცის მსგავსი იქნება.
- ორსულობა სასურველი უნდა იყოს ორივე მშობლისთვის. ბავშვის მარტო გაზრდა არც ისე სახარბიელო და სწორი არჩევანია. გარდა ამისა, თქვენ უკვე დიდ იმედებს ამყარებთ ბავშვზე. იქნებ ის არ იყოს მამის მსგავსი გარეგნულად და თქვენ დაგემსგავსოთ? არ დაგავიწყდეთ, რომ თქვენ გაქვთ საშუალება მომავალში დაუკავშირდეთ თავისუფალ მამაკაცს, შექმნათ ოჯახი და გააჩინოთ შვილები.
ჩემი გოგონა ძალიან მოძრავი, ხმაურიანი და შემაწუხებელი გახდა. იგი 5 წლის არის. უყვარს სირბილი, ხტუნაობა, ისე ლაპარაკობს, რომ პრაქტიკულად ყვირის. ჩვენ, მე და ჩემი ქმარი, წყნარი და მშვიდი ადამიანები ვართ, ამიტომ გვიჭირს ჩვენი გოგონას საქციელის ატანა. იქნებ გვირჩიოთ, როგორ მოვიქცეთ.
- შესაძლოა, გრძნობათა ამგვარი გამოვლინება-გამოხატვა თქვენი ქალიშვილის ინდივიდუალური თავისებურებაა, როცა "ხმის დაწევა" არც ისე იოლია. მაგრამ გამორიცხული არ არის, რომ გოგონას აქვს მშობლების ყურადღების დეფიციტი. ყურადღების მიქცევას კი ის ასეთი ხერხით ცდილობს. ასე მაშინ ხდება ხოლმე, როცა დედ-მამა ე.წ. ემოციურად ცივ ადამიანთა კატეგორიას მიეკუთვნებიან. მეტი კონტაქტი გქონდეთ პატარასთან; აგრძნობინეთ, რომ ძალიან გიყვართ; გაუჩინეთ იმის განცდა, რომ ის თქვენი მუდმივი მზრუნველობისა და ყურადღების ქვეშაა.
დისკოთეკაზე ყოფნის დროს რატომ არ მიწვევენ საცეკვაოდ? მე ძალიან პლასტიკური ვარ და მომხიბვლელად ვმოძრაობ! ვხედავ, რომ ბევრი ბიჭი ინტერესით მიყურებს და მადევნებს თვალს, როცა ვცეკვავ. მაგრამ რატომ არ მოდიან ჩემთან ახლოს?
- დისკოთეკა - ეს გართობის ადგილია, ურთიერთობის საშუალებაა და არა ცეკვების კონკურსი. იქნებ მამაკაცებს აშინებს თქვენი სითამამე და კონცენტრირება, რითაც თქვენ ახდენთ თქვენი ქორეოგრაფიული ხელოვნებისა და შესაძლებლობათა დემონსტრირებას. ვიღაცას არ სურს თქვენთვის ხელის შეშლა, ზოგს აფრთხობს ის, რომ თქვენს ფონზე მოუხერხებელი გამოჩნდეს. თუ მეტ ყურადღებას დაუთმობთ იმას, რაც ირგვლივ ხდება, მამაკაცები უფრო ადვილად გადმოდგამენ ნაბიჯს თქვენკენ!
საავადმყოფოში დაწოლა მელის, ამაზე ფიქრიც კი მაშინებს! გავიგე, რომ იქ ორი კვირის გატარება მომიწევს. ბოლოს საავადმყოფოში შვიდი წლის წინ ვიწექი და ამას კანკალით ვიხსენებ...
- შეეცადეთ დაარწმუნოთ საკუთარი თავი იმაში, რომ თავადვე გადაწყვიტეთ ჯანმრთელობას მიხედოთ და არა იმიტომ, რომ მაინც და მაინც ექიმის მითითებები შეასრულეთ. თუ იქნებით დარწმუნებული იმაში, რომ მკურნალობა წარმატებით ჩაივლის, უფრო მშვიდად შეხვდებით ყოფით პრობლემებს. იფიქრეთ არა მკურნალობის პროცესზე, არამედ იმაზე, თუ რა სასიამოვნოა გამოჯანმრთელება.
