ნანა კალანდაძე

საუზმე ორგანიზმს ავსებს ენერგიით და მკვებავი ნივთიერებებით, რომელიც საჭიროა დღის განმავლობაში. ცხიმიანი, მარილიანი და ტკბილი საკვები ზრდის არტერიების ბლოკირების რისკს და უფრო მეტი ზიანი მოაქვს, ვიდრე სარგებელი.

გთავაზობთ 9 ჯანსაღი პროდუქტის ჩამონათვალს, რომლის ჩართვაც მნიშვნელოვანია საუზმეში, რომ ის გამდიდრდეს მკვებავი ნივთიერებებით და ამით გაძლიერდეს ჩვენი ჯანმრთელობა.

1. კენკრა

კენკრა მდიდარია ანტიოქსიდანტებით: მარწყვი, შტოში, მოცვი და ჟოლო – ყოველ მათგანს უნარი აქვს სისხლში ქოლესტერინი შეამციროს, გაწმინდოს ის, დადებითად იმოქმედოს გულის მუშაობაზე, შეანელოს სიბერის პროცესი და გააუმჯობესოს კანის მდგომარეობა. საკმარისია სულ მცირე რაოდენობის კენკრა, რომ საჭირო, ჯანსაღი და ენერგეტიკული მუხტი მიიღოს ორგანიზმმა.

2. ხილი

მდიდარია ვიტამინებით, მინერალებით, ბოჭკოთი, წყლითა და ანტიოქსიდანტებით. ეს გააძლიერებს თქვენს იმუნიტეტს და საშუალებას მოგცემთ თავი დასვენებულად, კონცენტრირებულად და აქტიური დღისთვის მომზადებულად იგრძნოთ. მიიღეთ ის სალათის ან სმუზის სახით.

3. კვერცხი

ეს ნამდვილად კარგი იდეაა, რადგან, გარდა იმისა, რომ გემრიელია, მდიდარია ცილითა და კალცითაც. ეს თვისებები ეხმარება სისხლში შაქრის დონის კონტროლს და ამცირებს გულ-სისხლძარღვთა დაავადებების განვითარების რისკებს. კვერცხის გული მდიდარია ანტიოქსიდანტებით, რომელიც აუმჯობესებს მხედველობას, ტვინის, ღვიძლისა და გულის მუშაობას.

4. ბერძნული იოგურტი

გარდა იმისა, რომ გემრიელია, მდიდარია კალცით და პრობიოტიკებით, ეხმარება PH დონის დაბალანსებას, ნაწლავებში მეგობარი ბაქტერიების ზრდის სტიმულირებას ახდენს, ხელს უწყობს ნივთიერებათა ცვლას, ამცირებს სარძევე ჯირკვლის სიმსივნის განვითარების რისკს და აუმჯობესებს კანის მდგომარეობას. თუ თაფლსა და ხილს დაუმატებთ – არაჩვეულებრივი კომბინაცია იქნება საუზმისთვის!

5. ხაჭო

მდიდარია ცილით, კალცით და პრობიოტიკებით, რომლებიც აძლიერებს ძვლებს, აღადგენს ორგანიზმის დაზიანებულ უჯრედებს, აჩქარებს ნივთიერებათა ცვლას და აკონტროლებს მადას.

6. კაკალი

ერთ-ერთი საუკეთესო საშუალებაა, რომ ორგანიზმმა ვიტამინი E და ცხიმოვანი მჟავები მიიღოს, რომლებიც ეხმარება თავისუფალი რადიკალების მიერ მიყენებული ზიანის შემცირებაში, წმენდს სისხლს, ამცირებს ანთებას და შაქრის დონეს სისხლში. ხელს უწყობს გულის ჯანმრთელობას და ამაგრებს თმის ფოლიკულებს. შეგიძლიათ ჭამოთ ცალკე ან დაუმატოთ კერძში.

7. შვრია

ბოჭკოთი მდიდარი შვრია ეფექტურია კუჭ-ნაწლავის ტრაქტის ჯანმრთელობის ხელშეწყობის პროცესში. ასევე ეფექტურად არეგულირებს ქოლესტერინის დონეს და ამცირებს არტერიულ წნევას. შეურიეთ შვრიის ფაფას თაფლი და ჩია სრულფასოვანი და გემრიელი საუზმის მისაღებად.

8. ჩიას თესლი

ბოჭკოვანას მდიდარი წყაროა, რომელიც ხელს უწყობს საჭმლის მომნელებელი სისტემის ნორმალურ მუშაობას. ის ასევე არეგულირებს სისხლში შაქრის დონეს და არტერიულ წნევას, იცავს ორგანიზმის უჯრედებს და აღადგენს დაზიანებებს უჯრედულ დონეზე. კენკრასთან და იოგურტთან ერთად ძალიან გემრიელ საუზმეს მიიღებთ.

9. სელის თესლი

ამცირებს ორგანიზმში უჯრედების ანომალურ ზრდას, აბალანსებს ინსულინის დონეს და არეგულირებს სისხლში შაქრის დონეს. სელი ცილის ერთ-ერთი უმდიდრესი წყაროა, რომელიც განსაკუთრებით ვეგეტარიანელებისთვისაა კარგი ვარიანტი. რეკომენდებულია მისი დაფქვა და ფხვნილის სახით მიღება, რათა ადვილად მოხდეს მონელება და მკვებავი ნივთიერებების შეთვისება.

• მწვანე ჩაი

თავისი ანტიოქსიდური უნარით, ერთი ფინჯანი მწვანე ჩაი ბოსტნეულის ერთი ულუფის ეკვივალენტია. მდიდარია ნივთიერებებით, რომლებიც ებრძვის სიმსივნურ და გულსისხლძარღვთა დაავადებებს. ამცირებს სისხლში შაქრისა და ქოლესტერინის შემცველობას. შეიცავს დიდი რაოდენობით კატეხინებს – ბუნებრივ ანტიოქსიდანტებს, რომლებიც ხელს უშლის დაბერების პროცესს და ეხმარება გახდომის პროცესს. კვლევის თანახმად, მწვანე ჩაის რეგულარული გამოყენება 15-20%-ით უფრო აჩქარებს ცხიმების წვას ორგანიზმში.

ზოგიერთი კვლევა კი ადასტურებს, რომ ის გენებისთვის სერიოზული „ჩამრთველია“, რომელიც ორგანიზმს სიმსივნისგან იცავს. მაგალითად, მკერდის კიბო ქალებს შორის და პროსტატის სიმსივნე კაცების შემთხვევაში. ამასთან, მწვანე ჩაი აახალგაზრდავებს კანს და აუმჯობესებს ტვინის მუშაობას. მიიღეთ უზმოზე, ჭამამდე 20-25 წუთით ადრე. დაიმახსოვრეთ, რომ საკვებთან ერთად სითხის მიღება დიდ ზიანს აყენებს თქვენს ჯანმრთელობას – ხდება კუჭის წვენის გაზავება, საჭმლის გადამუშავება ბოლომდე ვერ ხერხდება, რის შედეგადაც ორგანიზმში შლაკები და სხვა მავნე ნივთიერებები ილექება, რაც სხვადასხვა სერიოზული დაავადების განვითარების ერთ-ერთი გამომწვევი მიზეზია.

• ყავა

ითვლება, რომ კოფეინი პოზიტიურად მოქმედებს ტვინის შრომისუნარიანობაზე, ზრდის კონცენტრაციას და აუმჯობესებს გუნება-განწყობილებას. ის ასევე ხელს უწყობს მსხვილი ნაწლავისა და შარდის ბუშტის ჯანმრთელობას, მოქმედებს როგორც საფაღარათო და შარდმდენი საშუალება, წვავს ზედმეტ ცხიმს.

მიუხედავად უამრავი მითისა ამ საკითხთან დაკავშირებით, ყავა არის პროდუქტი, რომელსაც სიცოცხლის გადარჩენა შეუძლია. მთელი რიგი კვლევების თანახმად, ამ სასმელის ზომიერად, რეგულარული მიღებით 20%-40%-ით მცირდება ინფარქტისა და ინსულტის რისკები.